Read Nguna Togoa Etafe North MARKO 5 Bible Online

MARKO 5 - Nguna Togoa Etafe North bible

MARKO 5

¹Go eu rumai paki taleva kerua ni natasi, paki navanua ki naka ni Cerasa.

²Go ragi waina e m̃elu dua ki sua rarua umai, m̃araverave naatam̃oli sikai waina e peani naatana loa sikai e sua e, e pae matigo maga umai,

³waina e peani malo tokoana aneana matigo maga: go te naata sikai e da moro mari atae soli a mau, e da mari atae a ki namori ni vatu sikai mau;

⁴nalakena e paka laapa pei tea soli‐sua‐ana ki tea moti nam̃elena maga go ki namori ni vatu maga, go namori ni vatu maga eu pei tea vuakotoviana pae asa, go tea moti nam̃elena maga eu pei tea marikotokotoviana: go te naata sikai e da kasua mau naga ega mari a ega matemate.

⁵Go sara ragi, p̃ogi go aleati, e doko matigo maga go tava maga, e do pioso po do dum̃ana dovae a ki vatu maga.

⁶Go ragi waina e punusi Yesu pae uvea, e sava po kolo suai natano paki nia;

⁷go e pioso ki nadaleo kasua sikai, po naga, Aga kasa ki‐go, Yesu, Natu ni Sup̃e Vakilagi Mau? A pavarani ko pae Sup̃e, naga p̃a ta mari au aga vitinu mau.

⁸Nalakena e noa ki nia, e naga, P̃a tave umai, naatana loa, m̃elu dua ki naatam̃oli wanae pano.

⁹Go e pusuusu paki nia, e naga, Nagisam̃a sei? Go e noa ki nia, e naga, Nagisagu Lecion; nalakena au laapa.

¹⁰Go e pavarani p̃arua ki nia naga ega ta dip̃aki lua ra m̃elu dua ki navanua wanogoe pano mau.

¹¹Go navata warua sikai ni wago eu doko tokora wanogoe eu do ganikani taleva ni tava.

¹²Go eu pavarani a, po naga, P̃a tip̃aki lua gami auga sili wago, naga auga vaki nap̃alauda.

¹³Go e suasua ki da. Go naatana loa maga eu dave umai, po paki nap̃alau ni wago maga: go navata e sava siwo napatira paki natasi, eu alagoro pei manu dua; go eu suapunu natasi.

¹⁴Go tea maga waina eu do pagani ra eu sava pano, po dogorogo ki nia natokoana, go navanua. Go eu rumai naga euga vunusi tea waina e pakilina e pei nasava?

¹⁵Go eu rumai punusi Yesu, po leo punusi tea waina e pei dimon e do natano, e pei tea sugoroana po midodoa p̃ia, nae waina e peani lecion: go eu mataku.

¹⁶Go tea maga waina eu punusi a eu dogorogo ki nia paki da dapala waina e pakilina ki tea waina e pei dimon, go nalo ni wago maga.

¹⁷Go eu atulake pavarani a naga ega m̃elu dua ki navanua adeada pano.

¹⁸Go ragi waina e naga ega vagi rarua, tea waina e pea pei dimon e pavarani a naga ega sikoti a doko.

¹⁹Go e da suasua ki nia mau, ma e noa ki nia, e naga, P̃a vaki nasum̃a anigo pano punusi namatarau anigo maga, po noa ki da tea warua maga waina Nawota e po manigo mari a, go naga e dodomi ko.

²⁰Go e pano, po atulake dogorogo Dekapolis ki tea warua maga waina Yesu e maneana mari a: go naatam̃oli maga mamau puti eu maga.

²¹Go ragi waina Yesu e moro duagoto sua pae rarua paki taleva kerua, taua warua sikai ni naatam̃oli maga eu saisai punusi a: go e doko elau.

²²Go sikai ni tea maraki maga ni nasum̃a ni nasaisaiana e umai, nagisana Yairo; go ragi waina e punusi a, e dowo pakitano pisari nam̃elena, po pavarani p̃arua ki nia, po naga,

²³Natugu nagoroi kiki e m̃aladigi mate: A pavarani ko, naga p̃a umai po doropusi nam̃elearum̃a maga asa, naga ega vei tea maripauriana po mauri.

²⁴Go e sikoti a pano; go taua warua sikai ni naatam̃oli maga eu dausi a, go eu sogosogoni a.

²⁵Go nagoroi sikai, waina e dape nada varau natau rualima sikai tamate dua,

²⁶go waina e sua navitinuana laapa pae naatam̃oli ni medisine laapa, go waina e sori naleo maga mamau puti waina e peani ra, po da p̃ia asa mau, ma e do sa p̃arua, e dogo tea maga nalo ni Yesu,

²⁷go e umai sari taua ni naatam̃oli maga paki natakuna, po kisidogo sugoro aneana.

²⁸Nalakena e naga, A pe kisidogo sugoro aneana maga, a pe wo pei tea maripauriana.

²⁹Go m̃araverave namata noai ni nadana e dap̃a; go e atae a nap̃atokona naga e pei tea maripauriana m̃elu dua ki navaratiana wanogoe.

³⁰Go m̃araverave Yesu, waina e atae nap̃alauna naga nakasuana wanogoe e po dave m̃elu dua ki nia pano, e dum̃ana doa e m̃aleoputo ni taua ni naatam̃oli maga, po naga, Sei e kisidogo sugoro aginau?

³¹Go tea vasapiseikiana aneana maga eu noa ki nia, eu naga, Ku punusi taua ni naatam̃oli maga eu do sogosogoni ko, go ku naga, Sei e kisidogo au?

³²Go e leo pilialia naga ega vunusi naata waina e mari tea wanogoe.

³³Ma nagoroi wanogoe waina e mataku po duruuru, waina e atae tea waina e po maneana pei tea mariana, e umai po dowo pakitano naraena, po noa ki nia nalomauana mamau.

³⁴Go e noa ki nia, e naga, Lei, nasaralomauana anigo e po maripauri ko; p̃a vaki natam̃ateana pano, go p̃a wia m̃elu dua ki navaratiana anigo.

³⁵Ragi waina e ko do pasa, seara eu pae nasum̃a ki tea maraki ni nasum̃a ni nasaisaiana umai, po naga, Natum̃a nagoroi e mate: ekasana ku ko do mari Tea Vasapiseiki ki navitinuana?

³⁶Ma Yesu e sara tea p̃alo navasaana wanogoe, po noa ki tea maraki ni nasum̃a ni nasaisaiana, e naga, P̃a ta mataku mau, p̃a saralomau sikai maau.

³⁷Go e da suasua ki te naata mau naga ega rausi sikoti a, ma e suasua ki Petero, go Yakobo, go Yoane Yaboko taina eu sikida.

³⁸Go eu rumai paki nasum̃a ki tea maraki ni nasum̃a ni nasaisaiana; go e leo punusi nawaraiana sikai, go tea maga waina eu dagi po lalagaarova p̃arua.

³⁹Go ragi waina e paki ekopu, e noa ki da, e naga, Ekasana ku p̃arai, po dagi? Piakiki e da mate mau, ma e maturu.

⁴⁰Go eu muru ki nia. Ma nae, ragi waina e mari ra eu mamau puti paki katama, e piragi lua piakiki tamana go p̃ilana go tea maga waina eu sikoti a doko, po sili paki tokora waina piakiki e one asa.

⁴¹Go e puati nam̃elearu ni piakiki, po noa ki nia, e naga, Talitha kumi; waina e pei tea vasadoaana, e pei, Koroi kiki, a noa ki‐go, P̃a tuleana.

⁴²Go koroi kiki e duleana m̃araverave, po surata; nalakena e pei tea ni natau rualima sikai tamate dua. Go eu m̃araverave saram̃akoto ki nasaram̃akotoana warua.

⁴³Go e pasa parati ki p̃arua ki da naga te naata ega ta atae tea wanogoe mau: go e pitip̃aki naga euga tua e te navatuna ega kani a.