Read Nguna Togoa Etafe North LUKA 10 Bible Online

LUKA 10 - Nguna Togoa Etafe North bible

LUKA 10

¹Go edaku ki tea maga wanogoe, Nawota e pasadawona ki rualima larua p̃ota, po dip̃aki lua ra eu duarua eu pea ki naraena paki sara natokoana go sara tokora, waina nae e pei m̃aladigi naga ega umai paki ara.

²Go e noa ki da, e naga, Nalolovaeana e p̃arua, ma tea wosiwosi maga eu pisa mau: nalakena tea wanogoe kuga vavarani Nawota ni nalolovaeana, naga ega tip̃aki lua tea wosiwosi maga paki nalolovaeana aneana.

³Kuga vano: kuga leo, kinau a dip̃aki lua mu ku dapala shiip natuda maga m̃aleoputo ni wulf maga.

⁴Kuga ta dape nala ni m̃ane mau, kite nala ni navinaga mau, kite nam̃elevasiana maga mau: go kuga ta pasadodomi te naata napua mau.

⁵Go nasum̃a waina ku pe wo paki ekopu asa, kuga vea naga, Natam̃ateana ega vei agi nasum̃a waia.

⁶Go natam̃ateana natuna sikai e pe toko nasum̃a wanogoe, natam̃ateana animu e pe wo doko asa doko: ma e pe tika, natam̃ateana animu e pe wo liliu paki mu.

⁷Go kuga toko nasum̃a wanogoe doko, po do gani po do munu tea maga waina eu pitua ki da: nalakena tea wosiwosi e p̃ia ki namoriana aneana. Kuga ta pae nasum̃a paki nasum̃a mau.

⁸Go natokoana waina ku pe wo sili asa, go waina eu pe wo piragi mu asa, kuga kani tea maga waina eu pei tea toropusiana naraemu:

⁹go kuga mari pauri tea sasana maga waina eu doko asa, go kuga noa ki da, Namarakiana ki Sup̃e e po umai paki m̃aladigi ki mu.

¹⁰Ma natokoana waina ku pe wo sili asa, go waina eu pe wo da piragi mu asa mau, kuga tave paki napua lapa maga kakana po naga,

¹¹Nam̃otam̃ota ni natokoana animu, waina e puluti nam̃elegami maga, au kasi lua e dip̃a mu: ma kuga atae tea waia, naga namarakiana ki Sup̃e e po umai paki m̃aladigi.

¹²A noa ki mu, naga Navaratiana ni Sodom naaleatia wanogoe ega wo p̃arua, ma navaratiana ni natokoana wanogoe ega wo p̃arua liu sa.

¹³Ai kigo, Korasin! Ai kigo, Bethsaida! Nalakena namariana kasua maga waina eu pei tea mariana mu, eu pe vei tea mariana Tair go Sidon, eu pe midoaki doa tuai, po do natano po suni nakulukulu ni sak go natanoapu.

¹⁴Ma navaratiana ni Tair go Sidon navasap̃otaeana ega wo p̃arua, ma navaratiana animu ega wo p̃arua liu sa.

¹⁵Go nigo, Kapernaum, p̃a wo pei tea tapeana sake paki nakoroatelagi kite? P̃a wo pei tea tapeana siwo paki Hades.

¹⁶Tea waina e dogo mu e dogo au; go tea waina e dip̃adoa mu e dip̃adoa au; go tea waina e dip̃adoa au e dip̃adoa tea waina e dip̃aki lua au umai.

¹⁷Go tea rualima larua wanogoe eu liliu laelaea, po naga, Nawota, dimon maga ma eu doko etano paki gami nalakena nagisam̃a.

¹⁸Go e noa ki da, e naga, A leo punusi Satan e dowo pae nakoroatelagi dapala navila.

¹⁹Kuga leo, a dua mu naveinawotaana naga kuga vasi m̃aata maga go mataloa maga, go waina e dap̃au nakasuaana mamau ki tea kokona: go te navatuna sikai ega wo da mari sa ki mu mau.

²⁰Ma kuga ta laelaea tea waia mau, nalakena naatana maga eu doko etano paki mu; ma kuga laelaea nalakena nagisamu maga eu pei tea midiriana nakoroatelagi.

²¹Aura wanogoe e laelaea p̃arua ki Naatana Tapu, po naga, A pasadodom̃ata ki‐go, Mama O, Talakea ni nakoroatelagi go maramana, nalakena ku dasuru ki tea manumatua maga go ki tea midoakiatae maga tea maga waia, po magi pipia maga mari pakasa ki da: ioro, Mama; nalakena ku midoaki m̃ata ki nia naga ega tapala nogoe naraem̃a.

²²Naleo maga mamau puti eu pei tea vituakiana paki nau pae Tamagu: go te naata sikai e da atae naga Natuna e pei sei, ma Tamagu e sikina atae a; go naga Tamagu e pei sei, ma Natuna e sikina atae a, go naata waina Natuna e pe suasua naga ega maneana mari pakasa ki nia.

²³Go e dum̃ana doa e punusi tea vasapiseikiana maga, eu pei nara mau, po noa, Namata maga waina eu punusi tea maga waina nimu ku punusi ra eu maro pa:

²⁴nalakena a noa ki mu, naga profeta laapa go nawota laapa eu masauna naga euga vunusi tea maga waina nimu ku punusi ra, go eu da punusi ra mau; go naga euga rogo tea maga waina ku dogo ra, go eu da dogo ra mau.

²⁵Go kuga leo, naatam̃oli sikai ni nawotaeana e duleana po maridogo e, po naga, Tea Vasapiseiki, aga mari nasava naga aga veani namauriana waina e du mau du?

²⁶Go e noa ki nia, e naga, Nasava e pei tea midiriana nawotaeana? Ku peve dapale sava?

²⁷Go e pasadara po naga, P̃a dodomi Yehovah Sup̃e anigo ki nap̃op̃om̃a mamau, go ki naatam̃a mamau, go ki nakasuaana anigo mamau, go ki namidodoana anigo mamau; go tea ni m̃aladigi ki‐go p̃a dodomi a ega tapala waina ku dum̃am̃a dodomi ko.

²⁸Go e noa ki nia, e naga, Ku po pasa dara gara: p̃a mari tea wanogoe, go p̃a wo mauri.

²⁹Ma e masauna naga ega tum̃ana mari leana ki nia, go e noa ki Yesu, e naga, Go tea ni m̃aladigi ki nau e pei sei?

³⁰Yesu e pasa dara po naga, Naatam̃oli sikai e pae Yerusalem siwo paki Yeriko pano; go e dua p̃alausi tea tapepavakoto maga, waina eu duatilua puti sugoro kiana po p̃okawokati a, po pano, eu doropusi a e one e m̃aladigi mate.

³¹Go tea viri sikai e siwo napua wanogoe pano: go ragi waina e punusi a, e liu sa pano nadigi kerua ni napua.

³²Go dapala nogoe nawora ni Levi sikai, ragi waina e umai paki tokora wanogoe, po punusi a, e liu sa pano nadigi kerua ni napua.

³³Ma naatam̃oli ni Samaria sikai, ragi waina e surata, e umai pakilina ki nia: go ragi waina e punusi a, e maritadodomi a,

³⁴go e umai punusi a, po kalutigoro wotu aneana maga, e daki naroro go waine ara; go e pusake a nam̃adu ni nalo tuavati aneana, po musagi a paki nasum̃a ni nam̃enakiana sikai, po leo parati ki nia.

³⁵Go matamai ki nia e dape lua denario dua, po dua talakea ni nasum̃a ni nam̃enakiana asa, po noa ki nia, e naga, P̃a leo parati ki nia; go ku pe sori dua e tea waina e p̃arua liu m̃ane waia kinau, ragi waina aga wo moro liliu umai, aga wo lagati dua ko asa.

³⁶Ku midoaki nia naga nara dolu sei kakada e pei tea ni m̃aladigi ki tea waina e dua p̃alausi tea tape pavakoto maga?

³⁷Go e naga, Tea waina e mari nadodomiana paki nia. Go Yesu e noa ki nia, e naga, P̃a vano, go nigo p̃a mari ega tapala nogoe.

³⁸Go ragi waina eu do pano, e sili natokoana kiki sikai: go nagoroi sikai nagisana Martha e piragi a paki ekopu ni nasum̃a aneana;

³⁹Go e peani taina sikai waina e pei tea sosoana ki Maria, go waina e do natano pisari nam̃ele ni Nawota, po dogo navasaana aneana.

⁴⁰Ma Martha nap̃op̃ona e pa putuaki nalo ni nasuasuana warua; go e umai lawodu pisari a, po naga, Nawota, ku dodop̃arop̃aro naga taigu e doropusi au naga aga sikigu suasua kite? Nalakena tea wanogoe p̃a noa ki nia naga ega silae au.

⁴¹Ma Nawota e pasa dara po noa ki nia, e naga, Martha, Martha, ku midoaki paratiki po pei tea ruruakiana nalo ni naleo laapa:

⁴²ma natikaana ni tea sikai e doko: go Maria e matadoa matele wia, waina ega wo da pei tea tapeluaana kiana mau.