Read Nguna Togoa Etafe North LUKA 11 Bible Online

LUKA 11 - Nguna Togoa Etafe North bible

LUKA 11

¹Go e pakilina, ragi waina e do dapasavasa tokora sikai, naga ragi waina e makoto ki nia, tea vasapiseikiana aneana maga sikai kakada e noa ki nia, e naga, Nawota, p̃a vasa piseiki gami naga auga tapasavasa atae, ega takiusi waina Yoane ma e pasa piseiki tea vasapiseikiana aneana maga asa.

²Go e noa ki da, e naga, Ragi waina ku dapasavasa kuga naga, Mama aginami, Nagisam̃a ega tapu. Namarakiana anigo ega umai.

³P̃a tua gami sara naaleatia navinaga waina e p̃ia ki gami.

⁴Go p̃a maginami midoakikorokoro namarinaleosaana aginami maga; nalakena kinami ma au do magi sara naata waina naleo aginami e one ara one au madeada midoakikorokoro e. Go p̃a ta piragi gami paki namaridogoana mau.

⁵Go e noa ki da, e naga, Nimu sei kakamu ega wo peani tana ri sikai, go ega wo pa punusi a p̃ogi matua, po noa ki nia, Tagu ri, p̃a tua au tea seakiana ni bred ega tolu;

⁶nalakena tagu ri sikai waina e surata, e po umai punusi au, go a da peani te navatuna mau waina aga toropusi a naraena;

⁷go nae ega wo pasa dara ekopu, po naga, P̃a ta mari navitinuana paki nau mau: namata e pei tea kokoroana sua, go piakiki aginau maga eu sikoti au nawewele doko; a mari sa duleana po dua do?

⁸A noa ki mu, E pe ta duleana mau po dua e nalakena e pei tana ri, ma e pe wo duleana po dua e tea maga waina e masauna nalakena natatagoana aneana.

⁹Go kinau a noa ki mu, Kuga tatago, go ega wo pei tea vituakiana paki mu; kuga laaga, go kuga wo pap̃ai; kuga p̃okawoka, go ega wo manimu pei tea wolagatiana.

¹⁰Nalakena sara naata waina eu datago eu dua ra eu dape; go tea waina e laaga e pap̃ai; go tea waina e p̃okawoka ega wo maneana pei tea wolagatiana.

¹¹Go nimu sikai sei kakamu waina e pei piakiki tamana, natuna ega wo datagovi a ki bred sikai, go ega wo dua e vatu sikai? Kite ki naika sikai, go ega wo dua e oli naika sikai m̃aata sikai?

¹²Kite e pe wo datago atolu sikai, e pe wo dua e mataloa sikai kite?

¹³Go nimu, waina ku sa, ku pe atae naga kuga tua natumu maga navituaana wia maga, Tamamu ni nakoroatelagi e pe wo pitua e pe warua liu sa paki Naatana Tapu paki tea maga waina eu datagovi a asa.

¹⁴Go e do mari dimon pusa sikai e dave pano. Go e pakilina, ragi waina dimon wanogoe e dave sua pano, tea vei pusa e pasa; go taua maga ni naatam̃oli maga eu maga.

¹⁵Ma te seara kakada eu naga, E mari dimon maga eu dave pano pae Beelsebub, nawota ki dimon maga.

¹⁶Go tea p̃ota seara eu maridogo e, po datagovi a ki navaivaiana sikai waina ega vae nakoroatelagi umai.

¹⁷Ma nae e atae namidodoana adeada maga, po noa ki da, e naga, Sara namarakiana waina eu pei tea tap̃otaeana dum̃ada dip̃a ra eu pei tea mariana eu pei maso maladi; go nasum̃a waina e pei tea tap̃otaeana dip̃a nasum̃a e dowo.

¹⁸Go Satan e pe vei tea tap̃otaeana dum̃ana dip̃a e, namarakiana aneana e pe wo du dapale sava? Nalakena ku noa naga kinau a mari dimon maga eu dave pano pae Beelsebub.

¹⁹Go kinau a pe mari dimon maga eu pe tave pano pae Beelsebub natumu naanoai maga eu pe mari ra eu pe tave pano pae sei? Nalakena tea wanogoe nara euga wo pei tea vasap̃otae mu.

²⁰Ma kinau a pe mari dimon maga eu pe tave pano pae nakini ni Sup̃e, namarakiana ki Sup̃e e pe umai sua paki mu.

²¹Ragi waina tea kasua waina e dape puti nalikau e pavaigoro namasopa ni nasum̃a aneana, naloriki aneana maga eu doko natam̃ateana doko:

²²ma ragi waina tea waina e kasua liu sa e umai paki nia, po mari matua ki nia, e dape lua nalikau aneana maga mamau puti waina e pavatu asa, po duripitua ki tea tapepavakotoana aneana maga.

²³Tea waina e da sikoti au mau e mari dip̃a au; go tea waina e da daua ki sikoti au mau e mari e pei taperavera.

²⁴Ragi waina naatana loa e dave m̃elu dua ki naatam̃oli pano, e surata duaduru malo garagara maga, po laaga namaromaroana; go nalakena e da pap̃ai a mau, e naga, Aga wo liliu paki nasum̃a aginau, waina a dave asa umai.

²⁵Go ragi waina e umai, e pap̃ai a e pei tea sasaraana go tea rekeikiana.

²⁶Ragi wanogoe e pano, po piragi lua naatana p̃ota larua umai waina eu sa liu sa; go eu sili paki asa po doko asa doko: go tea edaku maga ki naatam̃oli wanogoe eu pei tea mariana eu sa liu tea vea aneana maga.

²⁷Go e pakilina, ragi waina e noa tea maga wanogoe, nagoroi sikai ni taua ni naatam̃oli maga e sike nadaleona, po noa ki nia, e naga, Nap̃ele waina e pilake ko, go susu maga waina ku susu ara eu maropa.

²⁸Ma nae e naga, Ioro, ma tea maga waina eu dogo navasaana ki Sup̃e, po pavaigoro e, eu maropa liu ra.

²⁹Go ragi waina taua maga ni naatam̃oli maga eu do saisai punusi a, e pae asa noa, naga Tagona waia eu pei tagona sa: eu laaga navaivaiana sikai; go te navaivaiana sikai ega wo da pei tea vituakiana paki da mau, ma navaivaiana ni Yonah ega sikina.

³⁰Nalakena dakiusi waina Yonah e magi naka ni Ninevah pei navaivaiana, dapala nogoe naatam̃oli Natuna ma ega wo magi tagona waia pei navaivaiana.

³¹Nawota nagoroi ni sauth ega wo duleana navasap̃otaeana sikoti naatam̃oli maga ni tagona waia, go ega wo dip̃akotovi ra: nalakena e pae namatap̃ago ni maramana umai naga ega rogo namanumatuaana ki Solomon; go kuga leo, tea waina e p̃arua liu Solomon e doko nea.

³²Naatam̃oli maga ni Nineveh euga wo duleana navasap̃otaeana sikoti tagona waia, go euga wo dip̃akotovi ra: nalakena eu midoakidoa ragi waina eu dogo narogorogoana ki Yonah; go kuga leo, tea waina e p̃arua liu Yonah e doko nea.

³³Ragi waina te naata e dokoni nasulu sikai, e da lawo ki nia em̃ago ni etano mau, kite nawoka ni lasa totowo waina e dap̃olosiwo doko mau, ma e lawo ki nia naliana, naga tea maga waina eu paki ekopu euga vunusi namarama.

³⁴Namatam̃a e pei nasulu ni nap̃atokom̃a: ragi waina namatam̃a e p̃ia, nap̃atokom̃a mamau ma e marama; ma ragi waina e sa, nap̃atokom̃a ma e maligo.

³⁵Nalakena tea wanogoe p̃a vunusi naga namarama waina e doko ako ega ta pei namaligo mau.

³⁶Nalakena tea wanogoe nap̃atokom̃a mamau e pe marama, go te tokora sikai kakana e pe ta maligo mau, e pe wo marama puti, dakiusi ragi waina nasulu e sorolaga po maramalagati ko.

³⁷Go ragi waina e do pasa, Farisi sikai e pavarani a naga ega kanikani sikoti a: go e paki ekopu, po kere one naga ega kanikani.

³⁸Go ragi waina Farisi wanogoe e punusi a, e maga nalakena e da pea pavano mau pea ki nakaniana.

³⁹Go Nawota e noa ki nia, e naga, Ragi waia nimu Farisi maga ku mari nataku ni lasa munu go plete e dautau; ma nap̃alaumu e pura ki natapepavakotoana go nasigisigileoana.

⁴⁰Tea manumatavusa maga, tea waina e mari natakumu e da mari nap̃alaumu kite?

⁴¹Ma kuga vitua ki tea ni nap̃alaumu maga euga vei nadodomiana; go kuga leo, naleo maga mamau puti eu manimu dautau.

⁴²Ma ai ki mu Farisi maga! Nalakena ku pitua ki kekerualima ni mint go reu go sara nakau lawoana, po pakalau navasap̃otaeana go nadodomi‐Sup̃e‐ana: ma tea maga waia e one mu one naga kuga mari ra, go tea maga waina naga kuga ta doropusi ra euga doko mau.

⁴³Ai ki mu Farisi maga! Nalakena ku dodomi malo tasake vea maga ni nasum̃a ni nasaisaiana maga, go navasadodomiana maga malo ni navakokotoana maga.

⁴⁴Ai ki mu! Nalakena ku dakiusi matigo maga, waina eu da doko lina mau, go naatam̃oli maga waina eu surata pae elagi ki da eu da atae a mau.

⁴⁵Go tea ni nawotaeana maga sikai kakada e pasa dara po noa ki nia, e naga, Tea Vasapiseiki, ku noa tea maga wanogoe ku pasa pinoa ki gami ma.

⁴⁶Go e naga, Ai ki mu tea ni nawotaeana maga! Nalakena ku duatua naatam̃oli maga natapetapeana maga waina eu pei tea tapetapeana kite sa, go nimu ku da kisidogo natapetapeana maga wanogoe ki nakinimu maga sikai kakada mau.

⁴⁷Ai ki mu! Nalakena ku davagi matigo maga ki profeta maga, go tamamu maga eu maripunue ra.

⁴⁸Nalakena tea wanogoe ku pei tea noasokisoki po suasua ki namariana ki tamamu maga: nalakena nara eu mari punue ra, go nimu ku davagi matigo adeada maga.

⁴⁹Nalakena tea wanogoe namanumatuaana ki Sup̃e e naga, Aga wo dip̃aki lua profeta maga go apostolo maga euga vano punusi ra; go nara seara kakada euga wo mari punue ra po kopalele ara;

⁵⁰naga nada ni profeta maga mamau puti, waina e pei tea takiana pae naatulakeana ni maramana pa pa, ega vei tea sikoana paki tagona waia;

⁵¹pae nada ni Abel pa pa paki nada ni Sakariah, waina e pei tea maripunueana namawota ni wede ni naviriana go ni nasum̃a tapu: ioro, a noa ki mu, naga ega wo pei tea sikoana paki tagona waia.

⁵²Ai ki mu tea ni nawotaeana maga! Nalakena ku dape lua tea viloki ni naataeana: nimu ku da sili mau, go tea maga waina eu naga euga sili ku dugoro ra asa.

⁵³Go ragi waina e dave sua nasum̃a wanogoe, tea midiri maga go Farisi maga eu pae asa diesoki p̃arua ki nia, po pusuusu ki tea laapa paki nia;

⁵⁴eu kusugoro e, naga euga valako dape te navatuna m̃elu dua ki nawokana.