Read Nguna Togoa Etafe North LUKA 12 Bible Online

LUKA 12 - Nguna Togoa Etafe North bible

LUKA 12

¹Ragi wanogoe, waina taua ni naatam̃oli maga tivilia maga kakada eu saisai dapala eu dum̃ada pasi ra, e pae asa noa ki tea vasapiseikiana aneana maga pea, e naga, Kuga matamatua ki leven ki Farisi maga, waina e pei nakalep̃oana.

²Ma te navatuna e da pei tea tap̃augoroana, waina ega wo da pei tea maripakasakiana mau: go tea surukiana, waina ega wo da pei tea ataeana mau.

³Nalakena tea wanogoe tea maga waina ku noa ra namaligo euga wo pei tea rogoana namarama; go tea waina ku pasa asa paki nadaliga em̃ago tukituki maga ega wo pei tea rogorogokiana nap̃au ni nasum̃a maga.

⁴Go a noa ki mu tagu ri maga, Kuga ta matauki tea maga waina eu mari punue nap̃atokomu, go edaku ki tea wanogoe eu da peani te navatuna p̃ota mau waina euga mari a.

⁵Ma aga noa ki sai mu tea waina kuga matauki nia: Kuga matauki tea waina ragi waina e mari punue sua e peani naveinawotaana naga ega nadi paki p̃okasi; ioro, a noa ki mu, a naga, Kuga matauki tea wanogoe.

⁶Eu da sori sparro lima raki farthig dua kite? Go sikai kakada e da pei tea maliokiana namata ni Sup̃e mau.

⁷Ma napati maga ni nalolu ni nap̃aumu eu pei tea veveana puti. Kuga ta mataku mau: ku p̃ia liu sparro laapa.

⁸Go a noa ki mu, naga Sara naata waina eu pe wo noasai au narae ni naatam̃oli maga, naatam̃oli Natuna ma ega wo noasai naata maga wanogoe narae ni agelo maga ki Sup̃e:

⁹ma tea waina e pasagoro au narae ni naatam̃oli maga, ega wo pei tea vasagoroana narae ni agelo maga ki Sup̃e.

¹⁰Go sara naata waina euga wo noa navasaana sikai dip̃a naatam̃oli Natuna, ega wo madeada pei tea midoakikorokoroana: ma tea waina e pasa sa ki dip̃a Naatana Tapu ega wo da maneana pei tea midoakikorokoroana mau.

¹¹Go ragi waina euga wo piragi mu paki narae ni nasaisaiana maga, go ni tea maraki maga, go ni nawota maga, kuga ta midoaki paratiki dapala waina kuga wo dum̃amu pasakorokoro mu, kite tea waina kuga wo pasakorokoro asa, kite tea waina kuga wo noa e:

¹²nalakena Naatana Tapu ega wo pasa piseiki mu aura wanogoe tea maga waina e one mu one naga kuga noa ra.

¹³Go naata sikai ni taua ni naatam̃oli maga e noa ki nia, e naga, Tea Vasapiseiki, p̃a noa ki taigu naga ega tap̃otae p̃aumaso ki tamagami dua au.

¹⁴Ma e noa ki nia, e naga, Kanao, sei e mari au a pei tea vasap̃otae kite tea tap̃otae dap̃au mu?

¹⁵Go e noa ki da, e naga, Kuga vunusi, po dum̃amu pavaigoro mu pa dua ki sara namatam̃aguraana: nalakena naloriki laapa waina naatam̃oli sikai e peani ra eu da pei namauriana aneana mau.

¹⁶Go e noa ki da naluluakia sikai, e naga, Natano ki naatam̃oli sogolapa sikai e dau p̃arua ki nawana:

¹⁷go e dum̃ana midoa ki nia nap̃alauna, po naga, Aga wo mari nasava, nalakena a dika tokora waina aga wo daua ki nawa ni nakau aginau maga asa?

¹⁸Go e naga, Aga wo mari tea waia: aga wo dakai nasum̃a ni korn aginau maga, po davagi oli ra euga warua liu ra; go tokora wanogoe aga wo dauaki puti korn aginau go naloriki wia aginau maga asa.

¹⁹Go aga wo noa ki naatagu, Naatagu, ku peani naloriki wia laapa, waina eu pei tea toropusiana raki natau laapa; p̃a maromaro, p̃a kanikani, p̃a munu, p̃a mari katakata.

²⁰Ma Sup̃e e noa ki nia, e naga, Tea manumatavusa, p̃ogi waia eu datagovi ko ki naatam̃a; go naleo maga waina ku po mari m̃ata ki da, euga wo pei tea ki sei?

²¹Tea waina e dum̃ana maneana dauaki naloriki maga, po da pei sogolapa paki Sup̃e mau, e dapala nogoe.

²²Go e noa ki tea vasapiseikiana aneana maga, e naga, Nalakena tea wanogoe a noa ki mu, a naga, Kuga ta magi namauriana animu midoaki paratiki mau, tea waina kuga wo gani a; go magi nap̃atokomu mau, tea waina kuga wo suni a.

²³Nalakena namauriana e p̃arua liu navinaga, go nap̃atokomu e p̃arua liu sugoro.

²⁴Kuga midoaki usiusi reven maga, naga eu da lalawo mau, go eu da kilikili mau; waina eu da peani em̃ago ni store mau kite nasum̃a ni korn mau; go Sup̃e e pagani ra: nimu ku da p̃ia liu p̃arua ki manu maga kite?

²⁵Go nimu sei kakamu e pe midoaki paratiki e pe mari atae sokari navarauana aneana kubit sikai?

²⁶Nalakena tea wanogoe ku pe mari sa mari tea waina e kiki sa, ekasana ku midoaki paratiki nalo ni tea p̃ota maga?

²⁷Kuga midoaki usiusi lili maga, dapala waina eu ulua: eu da p̃osiwosi mau, go eu da loasi mau; ma a noa ki mu, naga Solomon doko nasamasamaana mamau aneana, e da pei tea sugoroana dapala nara sikai mau.

²⁸Ma Sup̃e e pe sugoro nam̃enau ni vanua e pe dapala nogoe, waina e doko masoso, go matamai e pei tea nadikiana paki upu; e pe wo da sugoro mu e pe liu p̃arua ki nia kite, tea saralomau kiki maga?

²⁹Go nimu kuga ta laaga tea waina kuga wo gani a, go tea waina kuga wo munugi a, go kuga ta midoaki putuaki mau.

³⁰Nalakena nalauna maga ni maramana eu laaga tea maga mamau puti wanogoe: ma Tamamu e atae naga tea maga wanogoe eu p̃ia ki mu.

³¹Ma kuga laaga namarakiana aneana, go ega wo dua mu tea maga wanogoe euga wo sokari a.

³²Kuga ta mataku mau, navata kiki; nalakena Tamamu e masauna naga ega tua mu namarakiana.

³³Kuga sori tea maga waina ku peani ra, po pitua ki nadodomiana; kuga tum̃amu manimu mari nala ni m̃ane maga waina euga wo da duai mau, naloriki tauakiana sikai nakoroatelagi maga waina ega wo da nopu mau, tokora waina tea vanako e da paki m̃aladigi ki nia mau, go waina tuluki e da mari sa ki asa mau.

³⁴Nalakena tokora waina naloriki tauakiana animu e doko asa, tokora wanogoe nap̃op̃omu ma ega wo doko asa.

³⁵Namalomu ega vei tea tasokiana doko, go nasulu animu maga euga to soro;

³⁶go nimu kuga takiusi naatam̃oli maga waina eu do leogoro nawota adeada, ragi waina ega wo liliu pae navitawiriana; naga ragi waina ega wo umai po p̃okawoka, euga maneana p̃olagati m̃araverave.

³⁷Tea suasua maga wanogoe eu maro pa, waina nawota ega wo umai po pap̃ai ra eu do leleogoro: lomau a noa ki mu, naga ega wo dum̃ana dasoki a, po mari ra euga kere one naga euga kanikani, go ega wo umai po madeada suasua.

³⁸Go e pe umai navavaigoroana kerua, go e pe umai navavaigoroana ketolu, po pap̃ai ra eu pe tapala nogoe, tea suasua maga wanogoe eu pe maro pa.

³⁹Ma kuga atae tea waia, naga talakea ni nasum̃a e pe atae aura waina tea vanako e naga ega umai asa, e pe leleogoro, po da doropusi nasum̃a aneana naga ega vei tea kilidaraveana mau.

⁴⁰Nimu ma kuga marim̃ata sua: nalakena aura waina ku da midoaki nia mau naatam̃oli Natuna ega wo umai asa.

⁴¹Go Petero e naga, Nawota, ku noa ki gami naluluakia wanogoe, kite ku noa ki tea maga mamau puti asa?

⁴²Go Nawota e naga, Go sei e pei tasiga leoparatiki lomau go manumatua, waina nawota aneana ega wo lawo ki nia dap̃au tea ni nasum̃a aneana maga, naga ega tua ra navinaga adeada ragi kakana?

⁴³Tea suasua wanogoe e maro pa, waina nawota aneana ragi waina ega wo umai asa ega wo pap̃ai a e do mari dapala nogoe.

⁴⁴Lomau a noa ki mu, naga ega wo lawo ki nia dap̃au naleo aneana maga mamau puti.

⁴⁵Ma tea suasua wanogoe e pe noa nap̃op̃ona, Nawota aginau e mari daliali umai; go e pe vae asa p̃okati tea suasua naanoai maga go tea suasua nagoroi maga, po ganikani po munu, po matamaloku;

⁴⁶nawota ki tea suasua wanogoe e pe wo umai naaleatia sikai waina e da leogoro asa mau, go aura sikai waina e da atae a mau, go e pe wo parati p̃arua ki nia, po pasadawona ki matele veaniana aneana ega sikoti tea maga waina eu da pei lomau mau.

⁴⁷Go tea suasua wanogoe, waina e atae namasauana ki nawota aneana, po da marim̃ata mau, po da mari pae namasauana aneana mau, ega wo pei tea varatiana ki navaratiana laapa;

⁴⁸ma tea waina e da atae mau, po mari tea maga waina e p̃ia ki navaratiana, ega wo pei tea varatiana ki navaratiana pisa maau. Go sara naata waina tea warua e pei tea vituakiana paki da, euga wo pei tea tatagoviana ki tea warua: go naata waina eu pavatu asa ki tea warua, euga wo datagovi a ki tea warua liu sa.

⁴⁹A umai naga aga nadi ki nakapu vavaga paki maramana; go a masau nasava, e pe vei tea tokoniana sua?

⁵⁰Ma a peani nabapetisoana sikai naga aga vei tea bapetisoana asa; go a pei tea riesokiana warua pa pa pa ega wo pei tea mariana sua!

⁵¹Ku midoaki nia naga a umai naga aga vitua ki natam̃ateana maramana? A noa ki mu, a naga, Ee; ma ega wo pei natap̃otaeana;

⁵²nalakena tea lima ni nasum̃a sikai euga wo pei tea tap̃otaeana pae ragi waia pa pa, dolu dip̃a dua, go dua dip̃a dolu.

⁵³Euga wo pei tea tap̃otaeana tamatamada dum̃ada dip̃a ra; go tamap̃ilada dum̃ada dip̃a ra; go tamatuada dum̃ada dip̃a ra.

⁵⁴Go e moro noa ki taua maga ni naatam̃oli maga, e naga, Ragi waina ku punusi napopouru sikai e sake west, ku m̃araverave noa, naga Usa sikai e umai; go e pakilina dapala nogoe.

⁵⁵Go ragi waina nalagi ni sauth e sau, ku naga, Sui ega wo p̃arua; go e pakilina.

⁵⁶Nakalep̃o maga, ku midoaki p̃otae atae narae ni maramana go ni nakoroatelagi; ma ekasana ku da midoaki p̃otae atae ragi waia mau?

⁵⁷Go ekasana ku da dum̃amu midoaki p̃otae tea waina e leana mau?

⁵⁸Nalakena ragi waina ku sikoti tea vasadip̃a ko pano punusi tea maraki, p̃a mari kasua ragi waina koro surata napua naga p̃a vei tea toropusiana kiana; mase e pe rosagi ko pa punusi tea vasap̃otae, go tea vasap̃otae e pe vitua ki‐go paki tasiga, go tasiga e pe nadi ki‐go paki ekopu ni nasum̃a ni navavaiana.

⁵⁹A noa ki‐go, naga P̃a wo da dave tokora wanogoe umai mau, pa pa p̃a wo lagati pitua ki maite edaku.