Read Nguna Togoa Etafe North LUKA 13 Bible Online

LUKA 13 - Nguna Togoa Etafe North bible

LUKA 13

¹Go te seara eu mamau doko ragi wanogoe waina eu dogorogo paki nia ki nalo ni naka ni Calilea, waina Pilato e mari nadada e sari naviriana adeada maga.

²Go e pasa dara po noa ki da, e naga, Ku midoa ki nia naga naka ni Calilea wanogoe eu pei tea mari naleo sa p̃arua liu naka ni Calilea mamau puti, nalakena eu sua tea maga wanogoe kite?

³A noa ki mu, a naga, Ee: ma ku pe ta midoakidoa mau, ku pe wo mate sa puti e pe tapala nogoe.

⁴Kite tea rualima sikai tamate latolu waina, waina nasum̃a varau pakilagi ni Siloam e dowo ara, po mari punue ra, ku midoa ki nia naga nara eu pei tea mari naleo sa p̃arua liu naatam̃oli maga mamau puti waina eu doko Yerusalem doko kite?

⁵A noa ki mu, a naga, Ee: ma ku pe ta midoakidoa mau, ku pe wo mate sa puti e pe tapala nogoe.

⁶Go e noa naluluakia waia; Naatam̃oli sikai e peani napuliva sikai waina e pei tea lawoana roara ni vaine aneana; go e umai laaga nawana asa, po da pap̃ai seara mau.

⁷Go e noa ki tea waina e p̃osiwosi ki vaine maga, e naga. P̃a leo, natau dolu waia a do umai laaga nawa ni napuliva waia, po da pap̃ai seara mau: p̃a tae a ega rowo; ekasana e mari sa ki natano?

⁸Go e pasadara po noa ki nia, e naga, Nawota, ega ko moro doko natau waia, pa pa aga ko kili daliviri ki nia, po nadi ki natae asa:

⁹go e pe edaku mari nawana, e pe wia; ma e pe tika, p̃a wo dae a ega rowo.

¹⁰Go e do pasapiseiki ekopu ni nasum̃a ni nasaisaiana maga sikai kakada naaleatia ni sabbath.

¹¹Go kuga leo, nagoroi sikai waina e peani naatana ni namanainaiana sikai natau rualima sikai tamate latolu; go e kolokolo doko, po mari sa marasike e dika sa.

¹²Go ragi waina Yesu e punusi a, e soso e, po noa ki nia, e naga, Koroi, ku pei tea veresiana m̃elu dua ki namanainaiana anigo.

¹³Go e pusake nam̃elearuna maga asa: go e pei tea mariana e leana m̃araverave, go e samasamani Sup̃e.

¹⁴Go tea maraki ni nasum̃a ni nasaisaiana e maeto nalakena Yesu e mari pauri sabbath go e pasa dara po noa ki taua ni naatam̃oli maga, e naga, Naaleatia latesa eu doko waina e p̃ia naga naatam̃oli maga euga wosiwosi ara: nalakena tea wanogoe kuga umai naaleatia maga wanogoe po pei tea maripauriana, ko kuga ta umai po pei tea maripauriana naaleatia ni sabbath mau.

¹⁵Ma Nawota e pasa dara e, po naga, Nakalep̃o maga, sara naata kakamu eu da sikasikai peresi ass kite oks adeada m̃elu dua ki kelu sabbath, po piragi a pano naga ega munu kite?

¹⁶Go nagoroi waia, waina e pei Abraham natuna sikai, waina Satan e soli a, kuga leo, natau rualima sikai tamate latolu, e da p̃ia naga nae ega vei tea veresiana m̃elu dua ki natali waia naaleatia ni sabbath kite?

¹⁷Go ragi waina e noa tea maga wanogoe, tea maga mamau puti waina eu kokona ki nia eu maliere: go taua mamau ni naatam̃oli maga eu laelaea puti nalakena tea ni nasamasamaana maga mamau puti waina eu pei tea mariana pae asa.

¹⁸Nalakena tea wanogoe e naga, Namarakiana ki Sup̃e e dakiusi nasava? Go aga noa naga e dakiusi nasava?

¹⁹E dakiusi napati ni sinapi sikai, waina naatam̃oli sikai e dape a, po nadi ki nia roara aneana; go e ulua, po pei nakau sikai; go manu maga ni nakoroatelagi eu doko arana maga.

²⁰Go e moro naga, Aga noa naga namarakiana ki Sup̃e e dakiusi nasava?

²¹E dakiusi leven, waina nagoroi sikai e dape a po suru ki nia totowo ni flaur dolu, pa pa tea mamau e pei tea levenakiana.

²²Go e surata duaduru natokoana warua maga go natokoana kiki maga, e do pasapiseiki, po do surata paki Yerusalem pano.

²³Go naata sikai e noa ki nia, e naga, Nawota, tea maga waina eu pei tea mautipauriana eu pisa maau kite?

²⁴Go e noa ki da, e naga, Kuga mari matua kasua naga kuga sili pae namata kiki: nalakena tea laapa, a noa ki mu asa, euga wo laaga naga euga sili, go euga wo mari sa sili.

²⁵Ragi waina talakea ni nasum̃a e duleana, po kokoro namata, go ku pae asa lawodu katama, po p̃okawoka namata, po naga, Nawota, p̃a maginami p̃olagati; go ega wo pasa dara po noa ki mu, A da atae mu mau, ku pae esava umai?

²⁶Ragi wanogoe kuga wo pae asa naga, Au ganikani po munu naraem̃a, go ku pasapiseiki napua welewelea maga ni natokoana aginami;

²⁷go ega wo naga, A noa ki mu, A da atae tokora waina ku pae asa umai mau; kuga m̃elu dua ki nau pano, tea maga mamau puti waina ku pei tea mari namarinaleotageleana.

²⁸Tokora wanogoe kuga wo dagi po kati napatimu asa, ragi waina kuga wo punusi Abraham, go Isaak, go Yakob, go profeta maga mamau puti, doko namarakiana ki Sup̃e, go nimu tea nadikiana paki etaku.

²⁹Go euga wo pae ist go west, go euga wo pae north go sauth umai, po kere one namarakiana ki Sup̃e.

³⁰Go kuga leo, tea edaku seara eu doko waina euga wo pea, go tea vea seara eu doko waina euga wo edaku.

³¹Aura wanogoe Farisi seara eu rumai, po noa ki nia, eu naga, P̃a m̃elu pano, po paki tokora p̃ota sikai: nalakena Herod e masauna naga ega mari punue ko.

³²Go e noa ki da, e naga, Kuga vano po noa ki foks wanogoe, P̃a leo, a do mari dimon maga eu dave pano po do mari namaripauriana maga masoso go matamai, go naaleatia ketolu a pei tea marisuaana asa.

³³Ma e one au one naga aga surata pano masoso go matamai go naaleatia waina e dausi a: nalakena e mari sap̃o pei tea mariana naga profeta sikai ega vei tea maripunueana ega vuoli ki Yerusalem.

³⁴Yerusalem, Yerusalem O, waina e mari punue profeta maga, po nadi ki vatu tea maga waina eu pei tea tautauana umai punusi a! A paki visa masauna naga aga viragi saisai ki natum̃a maga, dakiusi waina toa sikai E piragi saisai ki natuna maga etano ki nalivaruna maga, go ku karai!

³⁵Kuga leo, nasum̃a animu e manimu pei tea toropusiana e maladi: go a noa ki mu, naga Kuga wo da punusi au mau, pa pa kuga wo naga, Tea waina e umai pae nagisa ni Yehovah e pei tea vasap̃iakiana.