Read Nguna Togoa Etafe North LUKA 14 Bible Online

LUKA 14 - Nguna Togoa Etafe North bible

LUKA 14

¹Go e pakilina, ragi waina e paki ekopu ni nasum̃a ki tea maraki maga sikai kakada ni Farisi maga sabbath sikai naga ega kani navinaga, naga eu do leo parati ki nia.

²Go kuga leo, naatam̃oli sikai e doko naraena waina e doputopu.

³Go Yesu e pasa dara po noa ki tea ni nawotaeana maga go Farisi maga, e naga, E pae nawotaeana naga tuga mari pauri sabbath, kite e dika?

⁴Ma eu punuta. Go e puati a, po mari pauri a, po dip̃aki lua e.

⁵Go e noa ki da, e naga, Nimu sei kakamu waina ass kite oks aneana ega wo dowo paki m̃oru noai sikai, go waina ega wo da puati a sake m̃araverave naaleatia ni sabbath mau?

⁶Go eu mari sa moro pasa dara nalo ni tea maga wanogoe.

⁷Go e noa naluluakia sikai paki tea vitautauana maga, ragi waina e punusi dapala waina eu matadoa malo kere one vea maga; e noa ki da,

⁸Ragi waina ku pei tea vitautauana pae te naata paki navitawiriana sikai, p̃a ta kere one malo kere one vea mau; mase tea waina e pei tea dodomadaganiana warua liu ko e pe vei tea vitautauana pae asa,

⁹go tea waina e pitautau mu ma nae e pe umai po noa ki‐go; P̃a tua naatam̃oli waia tokora; go ragi wanogoe p̃a wo pae asa dape tokora edaku mau po maliere.

¹⁰Ma ragi waina ku pei tea vitautauana, p̃a vano po kere one tokora edaku mau, naga ragi waina tea waina e pitautau ako ega umai, ega noa ki‐go, Tagu ri, p̃a vaki elagi: ragi wanogoe p̃a wo peani nasamasamaana narae ni tea maga mamau puti waina eu kere one ganikani sikoti ko.

¹¹Nalakena sara naata waina eu dum̃ada dape ra pakilagi euga wo pei tea tapeana pakitano; go tea waina e dum̃ana dape a pakitano ega wo pei tea tapeana pakilagi.

¹²Go e moro noa ki tea waina e pitautau sa, e naga, Ragi waina ku mari nakaniana sikai ni aleati kite ni ragi melu, p̃a ta soso tam̃a ri maga mau, go namatarau anigo maga mau, go tea ni m̃aladigi ki‐go maga waina eu pei sogolapa mau; mase nara eu pe moro pitautau ako, go navituadip̃aana sikai e pe manigo pei tea mariana.

¹³Ma ragi waina ku mari nakaniana sikai, p̃a vitautau tea tika maga, tea vei gole maga, tea vei pito maga, tea kesa maga: go p̃a wo maro pa; nalakena eu da peani tea waina euga vitua dip̃a ko asa mau:

¹⁴nalakena ega wo pei tea vituadip̃aana paki‐go ragi ni namoroduleanaana ni tea leana maga.

¹⁵Go ragi waina sikai ni tea maga waina eu kere one ganikani sikoti a e dogo tea maga wanogoe, e noa ki nia, e naga, Tea waina ega wo gani navinaga namarakiana ki Sup̃e e maro pa.

¹⁶Ma e noa ki nia, e naga, Naatam̃oli sikai e mari nakaniana warua sikai; go e pitautau tea laapa:

¹⁷go e dip̃aki lua tea suasua aneana ragi ni nakaniana naga ega noa ki tea maga waina eu pei tea vitautauana, ega naga, Kuga umai; nalakena sara naleo eu po pei tea marim̃atakiana sua.

¹⁸Go eu mamau puti pae asa pasa paarua, nap̃op̃oda sikai maau asa. Tea vea e noa ki nia, e naga, A po pakotovi vanua sikai, go e one au one naga aga tave pano punusi a: a pavarani ko p̃a rogo navasapaaruaana aginau.

¹⁹Go tea p̃ota sikai e naga, A po pakotovi oks rualima sikai, go a surata pano naga aga maridogo ra: a pavarani ko p̃a rogo navasapaaruaana aginau.

²⁰Go tea p̃ota sikai e naga, A po dawiri nagoroi sikai, go nalakena tea wanogoe a mari sa paloti.

²¹Go tea suasua e umai po dogorogo paki nawota aneana ki tea maga wanogoe. Ragi wanogoe talakea ni nasum̃a e maeto po noa ki tea suasua aneana, e naga, P̃a tave pano m̃araverave paki napua welewelea maga go napua kiki maga ni natokoana, po piragi tea tika maga go tea vei gole maga go tea kesa maga go tea vei pito maga euga umai paki ekopu.

²²Go tea suasua e naga, Nawota, tea waina ku pitip̃aki asa e pei tea mariana sua, go tokora seara e ko doko.

²³Go nawota e noa ki tea suasua, e naga, P̃a tave pano paki napua maga ni etaku go nakoro ulua maga, po mari kasua ki da naga euga umai paki ekopu, naga nasum̃a aginau ega vura.

²⁴Nalakena a noa ki mu, naga naatam̃oli maga waina eu pei tea vitautauana sikai kakada ega wo da katidogo nakaniana aginau mau.

²⁵Go taua warua maga ni naatam̃oli maga eu surata sikoti a pano: go e dum̃ana doa e, po noa ki da, e naga,

²⁶Te naata e pe umai punusi au po da pilosi tamana, go p̃ilana, go anagoroi, go natuna maga, go taina maga, go gorena maga mau, ioro, go namauriana aneana mau, e pe mari sa pei tea vasapiseikiana aginau.

²⁷Naata waina e da dapetape tea valadagoto aneana, po da edakugoro au umai mau, e mari sa pei tea vasapiseikiana aginau.

²⁸Nalakena nimu sei kakamu, waina e masauna naga ega tavagi nasum̃a varau pakilagi sikai, e da pea do natano po peve naulu kakana, e peani tea waina e pataka ni namarisuaana kakana kite?

²⁹Mase e pe nadi ki laketano sikai, po mari sa mari sua, tea maga mamau puti waina eu leo punusi a eu pe vae asa mari saudoa ki nia,

³⁰po naga, Naatam̃oli waia e atulake natavagiana, po mari sa mari sua.

³¹Kite nawota sei, ragi waina e pano naga ega sua nawota p̃ota sikai navakalo, ega wo da pea do natano po pusum̃aki, e mari atae ki tivilia sikai naga ega sua tea waina e umai dip̃a e po maraki tivilia dua kite?

³²Kite ragi waina tea p̃ota e ko madu uvea, e dip̃aki lua tea tautauana seara, po datago tea ni natam̃ateana maga.

³³Go dapala nogoe nimu sara naata kakamu waina eu da doropusi tea maga mamau puti waina eu peani ra, eu mari sa pei tea vasapiseikiana aginau.

³⁴Nalakena tea wanogoe natasimena e p̃ia: ma natasimena e pe m̃edam̃eda, e pe wo pei tea mariana ega gagadi dapale sava?

³⁵E da p̃ia ki natano mau go e da p̃ia ki taua ni natae mau: eu nadi ki nia paki katama. Tea waina e pilake nadaliga maga naga ega rogo, ega rogo.