Read Nguna Togoa Etafe North LUKA 15 Bible Online

LUKA 15 - Nguna Togoa Etafe North bible

LUKA 15

¹Go tea tape nasautoga maga go tea mari naleo sa maga eu rumai puti paki m̃aladigi ki nia naga euga rogo e.

²Go Farisi maga go tea midiri maga eu dauruuru, po naga, Naatam̃oli waia e piragi tea mari naleo sa maga, po ganikani sikoti ra.

³Go e noa ki da naluluakia waia, e naga,

⁴Nimu naatam̃oli sei kakamu, waina e peani shiip p̃onotia sikai, go waina e dape puoli ki sikai kakada, e da doropusi tea rualima loveti tamate loveti eu madoko maso p̃alo, po pano raki tea waina e puoli, pa pa e pap̃ai a?

⁵Go ragi waina e pap̃ai a, e lesi a e one pauna maga one, po laelaea.

⁶Go ragi waina e umai paki nasum̃a, e soso saisai ki tana ri maga go tea ni m̃aladigi ki nia maga, po noa ki da, e naga, Kuga laelaea sikoti au, nalakena a po pap̃ai shiip aginau waina e puoli.

⁷A noa ki mu, naga dapala nogoe nalaelaeaana ega wo p̃arua nakoroatelagi nalo ni tea mari naleo sa sikai waina e midoakidoa, ma ega wo kiki nalo ni tea leana rualima loveti tamate loveti, waina eu dika tea waina euga midoaki doa asa.

⁸Kite nagoroi sei waina e peani m̃ane ni silver rualima sikai, e pe tape puoli ki sikai, e pe ta dokoni nasulu sikai, po sasara nasum̃a, po laaga paratiki pa pa e pap̃ai a?

⁹Go ragi waina e pap̃ai a, e soso saisai ki tana ri maga go tea ni m̃aladigi ki nia maga, po naga, Kuga laelaea sikoti au, nalakena a po pap̃ai m̃ane waina a dape puoli ki nia.

¹⁰Dapala nogoe, a noa ki mu asa, nalaelaeaana e doko narae ni agelo maga ki Sup̃e nalo ni tea mari naleo sa sikai waina e midoa ki doa.

¹¹Go e naga, Naatam̃oli sikai e peani natuna naanoai dua:

¹²go nara tea takariki kakada e noa ki tamana, e naga, Mama, p̃a tua au namagovai ni naloriki maga waina e maginau dowo. Go e madeada dap̃otae tea ni namauriana aneana maga.

¹³Go edaku ki naaleatia seara eu da laapa mau natuna takariki e saisai ki naleo maga mamau puti, po surata pano paki navanua ni uvea; go tokora wanogoe e sori p̃aragoto naloriki aneana maga, e do mari daratara.

¹⁴Go ragi waina e sori puti sua ra, ragi ni navitoloana warua sikai e pakilina navanua wanogoe; go nae e pae asa dika ki sara naleo.

¹⁵Go e pano po puluti naatatoko maga sikai kakada ni navanua wanogoe; go e dip̃aki lua e paki vanua aneana maga naga ega leo paratiki wago maga.

¹⁶Go e masauna naga ega vuka ki nawa ni karob waina wago maga eu gani a: go te naata e da dua e mau.

¹⁷Ma ragi waina nap̃op̃ona e liliu, e naga, Tea suasua vasadapuiana maga ki tamagu eu pisa waina eu peani navinaga waina e patakada go te seara e du pele, go kinau a mate nea ki navitoloana?

¹⁸Aga wo duleana po pano punusi tamagu, go aga wo noa ki nia, Mama, a mari naleo sa paki nakoroatelagi, go namatam̃a:

¹⁹a da moro p̃ia mau naga aga vei tea sosoana ki natum̃a: p̃a mari au aga takiusi tea suasua vasadapuiana anigo maga.

²⁰Go e duleana, po umai punusi tamana. Ma ragi waina e ko madu uvea, tamana e punusi a, go e maritadodomi a, go e sava, po doti nanoana, po dum̃ili a.

²¹Go natuna e noa ki nia, e naga, Mama, a mari naleo sa paki nakoroatelagi, go namatam̃a: a da moro p̃ia mau naga aga vei tea sosoana ki natum̃a.

²²Ma tamana e noa ki tea suasua aneana maga, e naga, Kuga m̃araverave dape lua sugoro waina e sikina p̃ia liu umai, po sugoro e asa; go kuga sara ki rig sikai nakinina, po sawa ki nam̃elevasiana maga nam̃elena maga:

²³go kuga viragi kau natuna waina e m̃anopunopu umai, po mari punue a, go tuga kanikani, po mari katakata:

²⁴nalakena natugu waia e mate, po moro mauri; e puoli, po pei tea vap̃aiana.

²⁵Go eu pae asa mari katakata. Go natuna takalapa e doko vanua: go ragi waina e umai po paki m̃aladigi ki nasum̃a, e dogo nalegaana go nasaleana.

²⁶Go e soso tea suasua maga sikai kakada, po pusuusu ki tea maga wanogoe eu alagoro pei nasava?

²⁷Go e noa ki nia, e naga, Taim̃a e po umai; go tamam̃a e po mari punue kau natuna waina e m̃anopunopu, nalakena e po moro piragi a e p̃ia doko.

²⁸Ma e maeto, po karai paki ekopu: go tamana e dave umai, po pavarani a.

²⁹Ma e pasa dara po noa ki tamana, e naga, P̃a leo, natau laapa waia a do manigo suasua, go a da dapiri natip̃akiana anigo sikai te naaleatia mau; go ku da dua au naninani natuna sikai te naaleatia mau, naga aga mari katakata sikoti tagu ri maga:

³⁰ma ragi waina natum̃a waia e umai, waina e gani dinomi tea ni namauriana anigo sikoti nagoroi masausara maga, ku maneana mari punue kau natuna waina e m̃anopunopu.

³¹Go e noa ki nia, e naga, Natugu, nigo ku sikoti au doko sara naaleatia, go naleo maga mamau puti aginau eu pei anigo.

³²Ma e p̃ia naga tuga mari katakata po laelaea: nalakena taim̃a waia e mate, po moro mauri; go e puoli, po pei tea vap̃aiana.