Read Nguna Togoa Etafe North LUKA 16 Bible Online

LUKA 16 - Nguna Togoa Etafe North bible

LUKA 16

¹Go e moro noa ki tea vasapiseikiana maga, e naga, Naatam̃oli sogolapa sikai e doko, waina e peani tasiga leo parati ki sikai; go nae e pei tea vasadip̃aana paki nia naga e do sori p̃aragoto naloriki aneana maga.

²Go e soso e, po noa ki nia, e naga, Nasava waia waina a dogo e nalo kakam̃a? P̃a vitua ki napuku ni naveitasiga‐leo‐paratiki‐ana anigo; nalakena ku mari sa pei tasiga leoparatiki doko.

³Go tasiga leoparatiki wanogoe e noa nap̃alauna, e naga, Aga wo mari nasava, nalakena nawota aginau e dape lua naveitasiga‐leoparatiki‐ana kiagu? A dika nakasuaana naga aga kilikili; a maliere datago.

⁴A po midoaki tea waina aga wo mari a, naga, ragi waina aga wo pei tea mariana aga m̃elu dua ki naveitasiga‐leo‐paratiki‐ana pano, euga viragi au paki ekopu ni nasum̃a adeada maga.

⁵Go e soso puti tea maga waina naleo ki nawota aneana e one ara one, po noa ki tea vea, e naga, Tea ki nawota aginau waina e one ako one e pisa?

⁶Go e naga, Totowo ni naroro p̃onotia sikai. Go e noa ki nia, e naga, P̃a tape tusi midiriana anigo, po do natano m̃araverave po midiri rualima lima.

⁷E moro noa ki tea p̃ota sikai, e naga, Go tea waina e one ako one e pisa? Go e naga, Totowo ni whiit p̃onotia sikai. E noa ki nia, e naga, P̃a tape tusi midiriana anigo, po midiri rualima latolu.

⁸Go nawota aneana e pasa samani tasiga leo‐paratiki tagele wanogoe, nalakena e mari manumatua: nalakena maramana waia natuna maga eu magi tagona adeada manumatua liu namarama natuna maga.

⁹Go kinau a noa ki mu, a naga, Kuga manimu mari tamu ri maga m̃elu mammon ni namarinaleotageleana; naga, ragi waina ega wo puoli, euga viragi mu paki ekopu ni tap̃aup̃au maga waina eu du mau du.

¹⁰Naata waina e pei lomau nalo ni tea kiki sa e moro pei lomau nalo ni tea warua: go naata waina e dagele nalo ni tea kiki sa e moro dagele nalo ni tea warua.

¹¹Nalakena tea wanogoe ku pe ta pei lomau sua nalo ni mammon tagele mau, sei ega wo pavatu mu ki tea lomau?

¹²Go ku pe ta pei lomau sua nalo ni tea ki naata p̃ota mau, sei ega wo dua mu tea animu?

¹³Tea suasua sikai e mari sa magi nawota dua suasua: nalakena ega wo pilosi sikai, po dodomi kerua; kite ega wo puluti sikai, po midoaki p̃alo ki kerua. Ku mari sa magi Sup̃e go mammon suasua.

¹⁴Go Farisi maga, waina eu pei tea dodomi m̃ane, eu dogo tea maga mamau puti wanogoe; go eu pasa piragisu paki nia.

¹⁵Go e noa ki da, e naga, Nimu ku pei tea waina ku dum̃amu pasa leana ki mu namata ni naatam̃oli maga; ma Sup̃e e atae nap̃op̃omu: nalakena tea waina e pakilagi m̃aleoputo ni naatam̃oli maga e pei tea mamaragokiana namata ni Sup̃e.

¹⁶Nawotaeana go profeta maga eu doko pa pa paki Yoane: pae ragi wanogoe pa pa narogorogoana wia ni namarakiana ki Sup̃e e pei tea rogorogokiana, go sara naatam̃oli eu mari kasua naga euga sili asa.

¹⁷Ma e kasua kiki ki nakoroatelagi go maramana naga eroga vuoli, ma e kasua p̃arua ki namatap̃ago ni letter sikai ni nawotaeana naga ega rowo.

¹⁸Sara naata waina eu dip̃aki lua nagoroi adeada, po dawiri tea p̃ota eu mari pele: go tea waina e dawiri tea waina e pei tea tip̃akiluaana m̃elu dua ki anawota e mari pele.

¹⁹Ma naatam̃oli sogolapa sikai e doko, go e pei tea sugoroana ki tea miala kesakesa go linen wia, po do gani navinaga wia sara naaleatia po do mari katakata:

²⁰go tea tatago sikai nagisana Lasaro e pei tea toropusiana e one pisari namata‐pua ni nasum̃a aneana, waina e pei namanuka mau,

²¹go waina e masauna naga ega vuka ki matele maga ni navinaga waina eu dowo pae wede ni nakaniana ki naatam̃oli sogolapa wanogoe; go koria maga eu rumai po menae namanuka aneana maga.

²²Go e pakilina, naga tea tatago wanogoe e mate, go naga e pei tea tapeana pae agelo maga paki narum̃a ni Abraham pano: go tea sogolapa wanogoe ma e mate, po pei tea ovakiana.

²³Go e sike namatana Hades, e pitinu p̃arua, go e punusi Abraham uvea, go Lasaro e doko narum̃ana.

²⁴Go e pioso po naga, Mama Abraham, p̃a dodomi au, po dip̃aki lua Lasaro umai, naga ega pupugi namatap̃ago ni nakinina noai, po mari namenagu ega maladi; nalakena a pitinu p̃arua mena ni nakapu waia.

²⁵Ma Abraham e naga, Koto, p̃a midoa ki nia naga ragi waina ku mauri doko ku dape sua tea wia anigo maga, go dapala nogoe Lasaro e dape sua tea sa maga: ma ragi waia nae e pei tea vakavakaleana nea, go nigo ku pitinu p̃arua.

²⁶Go tea waia e sokari tea maga wanogoe, malo ni natiroana warua sikai e pei tea lawosokiana namawota kakagida, naga tea maga waina eu masauna naga euga vae nea paloti punusi mu euga mari sa paloti, go naga te seara euga ta duagoto pae wanana umai punusi gami mau.

²⁷Go e naga, Nalakena tea wanogoe a pavarani ko, mama, naga p̃a tip̃aki lua e ega vaki nasum̃a ki tamagu;

²⁸nalakena a peani taigu lima; naga ega noasokisoki kasua paki da, naga nara euga ta umai paki malo ni navitinuana waia mau.

²⁹Ma Abraham e naga, Eu peani Moses go profeta maga; euga rogo parati ki da.

³⁰Go e naga, Ee, Mama Abraham: ma te naata sikai e pe m̃elu dua ki tea mate maga po pa punusi ra, eu pe wo midoaki doa.

³¹Go e noa ki nia, e naga, Eu pe ta dogo paratiki Moses go profeta maga mau, go te naata sikai e pe tuleana m̃elu dua ki tea mate maga, eu pe wo da saralomau mau.