Read Nguna Togoa Etafe North LUKA 17 Bible Online

LUKA 17 - Nguna Togoa Etafe North bible

LUKA 17

¹Go e noa ki tea vasapiseikiana aneana maga, e naga, E pei tea mari‐sap̃o‐ana naga tea tapilagonaana maga euga ta umai mau: ma ai ki naata waina eu rumai pae asa!

²Vatumaa sikai e pe vei tea sarakiana nanoana, go nae e pe vei tea nadikiana paki natasi, e pe wia ki nia, liu waina naga e pe mari tea kirikiri maga waia sikai kakada ega tapilagona.

³Kuga tum̃amu leoparatiki mu: taim̃a e pe mari naleo sa, p̃a vasa kasua ki nia; go e pe midoaki doa, p̃a maneana midoakikorokoro e.

⁴Go e pe mari naleo sa dip̃a ko paka larua naaleatia sikai, go e pe vaka larua maradoa umai punusi ko, po naga, A midoaki doa; p̃a maneana midoakikorokoro e.

⁵Go apostolo maga eu noa ki Nawota, eu naga, P̃a sokari nasaralomauana aginami.

⁶Go Nawota e naga, Ku pe veani nasaralomauana e pe takiusi napati ni sinapi sikai, ku pe noa ki naita waia, P̃a vei tea vaku‐dakati‐ana, go p̃a vei tea lawoana natasi; go e pe rogo paratiki mu asa.

⁷Ma nimu sei kakamu, waina e peani tea suasua sikai waina e sisi natano kite e leo‐parati ki shiip, waina ega wo noa ki nia, ragi waina e po pae vanua umai, P̃a umai m̃araverave po kere one ganikani;

⁸go waina ega wo da noa ki nia, P̃a mari m̃ataki tea waina aga kani a, go p̃a tum̃am̃a dasoki ko, po maginau suasua, pa pa aga kanikani po munu sua; go nigo p̃a wo edaku ganikani po munu?

⁹E pasa dodom̃ata ki tea suasua wanogoe nalakena e mari tea maga waina e pei tea tip̃akiana ara kite?

¹⁰Dapala nogoe nimu ma, ragi waina kuga wo mari sua tea maga mamau puti waina ku pei tea tip̃akiana ara, kuga naga, Au pei tea suasua m̃oli; au po mari tea waina e one gami one naga auga mari a.

¹¹Go e pakilina, ragi waina eu surata paki Yerusalem pano, naga nae e surata duaduru m̃aleoputo ni Samaria go Calilea.

¹²Go ragi waina e sili natokoana kiki sikai, naatam̃oli rualima sikai waina eu pei lepero eu sua e, waina eu lawodu uvea:

¹³go eu sike nadaleoda, po naga, Yesu, Nawota, p̃a dodomi gami.

¹⁴Go ragi waina e punusi ra, e noa ki da, e naga, Kuga vano po dum̃amu pisei ki tea viri maga mu. Go e pakilina, ragi waina eu do pano, eu pei tea mariana eu dautau.

¹⁵Go sikai kakada, ragi waina e punusi naga e pei tea maripauriana, e liliu umai, po samasamani Sup̃e ki nadaleo kasua;

¹⁶go e dowo dap̃olosiwo pisari nam̃elena maga, po pasadodom̃ata ki nia: go nae e pei naatam̃oli ni Samaria sikai.

¹⁷Go Yesu e pasa dara po naga, Tea rualima sikai eu da pei tea mariana eu dautau kite?

¹⁸Ma tea loveti wai? Seara eu da pei tea vap̃aiana waina eu liliu umai naga euga tua Sup̃e nasamasamaana, ma tea ni nalauna p̃ota waia sikina kite?

¹⁹Go e noa ki nia, e naga, P̃a tuleana, go p̃a vano: nasaralomauana anigo e po mari pauri ko.

²⁰Go Farisi maga eu pusuusu paki nia ki ragi waina namarakiana ki Sup̃e ega wo umai asa, go e pasadara ra po naga, Namarakiana ki Sup̃e e da pilake naleoparatikiana umai mau.

²¹Go euga wo da naga, Kuga leo, tokora waia! Kite, Tokora wanana! Nalakena Kuga leo, namarakiana ki Sup̃e e doko nap̃alaumu.

²²Go e noa ki tea vasapiseikiana maga, e naga, Naaleatia maga euga wo umai, waina kuga wo masauna naga kuga vunusi naaleatia maga ki naatam̃oli Natuna sikai kakada, go kuga wo da punusi a mau.

²³Go euga wo noa ki mu, Kuga leo, tokora wanana! Kuga leo, tokora waia! Kuga ta pano mau, go kuga ta dausi ra mau:

²⁴nalakena dakiusi waina navila, ragi waina e pila m̃elu tokora sikai etano ni nakoroatelagi, e maramalaga paki tokora kerua etano ni nakoroatelagi; naatam̃oli Natuna ega wo dapala nogoe naaleatia aneana.

²⁵Ma e one asa one naga ega vea sua narogokitesaana laapa po pei tea tip̃adoaana pae tagona waia.

²⁶Go dakiusi waina e pakilina naaleatia maga ki Noah, ega wo dapala nogoe naaleatia maga ki naatam̃oli Natuna.

²⁷Eu ganikani, eu munu, eu pitawiri, eu pei tea vituakiana eu laki, pa pa paki naaleatia waina Noah e paki ekopu ni areka, go natave e umai, po mari punue puti ra.

²⁸Dapala nogoe dakiusi waina e pakilina naaleatia maga ki Lot; eu ganikani, eu munu, eu pakokoto, eu sorisori, eu lalawo, eu davagi nasum̃a maga;

²⁹ma naaleatia waina Lot e m̃elu dua ki Sodom pano nakapu vavaga go brimstone ero p̃owo pae nakoroatelagi, po mari punue puti ra:

³⁰ega wo dapala tea sikai maau wanogoe naaleatia waina naatam̃oli Natuna ega wo pei tea mari‐pakasa‐kiana asa.

³¹Naaleatia wanogoe, naata waina ega wo doko nap̃au ni nasum̃a, go naloriki aneana maga eu doko ekopu, ega ta siwo mau naga ega tapelua ra: go tea waina e doko vanua ega tapala nogoe ega ta liliu mau.

³²Kuga midoaki Lot anagoroi.

³³Naata waina e pe wo laaga naga ega talua namauriana aneana ega wo dape puoli ki nia: ma naata waina e pe wo dape puoli ki namauriana aneana ega wo mauti pauri a.

³⁴A noa ki mu, naga Nap̃ogiana wanogoe naanoai dua eroga wo one nawewele sikai; sikai ega wo pei tea viragiluaana, go kerua ega wo pei tea toropusiana ega wo madoko.

³⁵Nagoroi dua eroga wo saisai mani, sikai ega wo pei tea viragiluaana, go kerua ega wo pei tea toropusiana ega wo madoko.

³⁶Nanoai dua ero doko roara,sikai ega wo pei viragiluaana, go kerua ega wo pei tea toropusiana ega madoko.

³⁷Go eu pasa dara po noa ki nia, eu naga, Seve tokora, Nawota? Go e noa ki da, e naga, Tokora waina nap̃atoko ni tea mate e one asa tokora wanogoe ikila maga euga wo pei tea saisaikiana paki asa.