Read Nguna Togoa Etafe North LUKA 18 Bible Online

LUKA 18 - Nguna Togoa Etafe North bible

LUKA 18

¹Go e noa ki da naluluakia sikai nalo ni waina e one ara one naga euga to dapasavasa sara ragi, go naga nap̃op̃oda ega ta doro asa mau; e naga,

²Tea vasap̃otae sikai e doko natokoana sikai, waina e da matauki Sup̃e mau, po da dodomadagani naatam̃oli mau:

³go nagoroi malepu sikai e doko natokoana wanogoe; go e do umai punusi a, po naga, P̃a kokonagoro au m̃elu dua ki tea kokona ki nau.

⁴Go e da suasua mau ragi sikai: ma ragi edaku e dum̃ana noa nap̃alauna, e naga, A da matauki Sup̃e mau, go a da dodomadagani naatam̃oli mau;

⁵koni nalakena nagoroi malepu waia e mari navitinuana paki nau, aga wo kokonagoro e, e pe to umai pitip̃atip̃a po mari au a pe rogo kite sa.

⁶Go Nawota e naga, Kuga rogo tea waina tea vasap̃otae tagele e noe e.

⁷Go Sup̃e ega wo da kokonagoro tea matadoaana aneana maga, waina eu do pioso paki nia aleati go p̃ogi, go e pei maritasoki nalo kakada kite?

⁸A noa ki mu, naga ega wo kokonagoro ra m̃araverave. Ma ragi waina naatam̃oli Natuna ega wo umai, ega wo pap̃ai nasaralomauana maramana kite?

⁹Go e moro noa naluluakia waia paki naatam̃oli seara waina eu dum̃ada pavatu ara naga eu leana, po midoaki p̃alo ki tea p̃ota maga:

¹⁰Naatam̃oli dua ero sake paki nasum̃a tapu naga eroga tapasavasa; sikai e pei Farisi, go kerua e pei tea tape nasautoga.

¹¹Farisi e lawodu po dapasavasa nap̃alauna dapala waia, Sup̃e, a pasa dodom̃ata ki‐go, nalakena a da dakiusi naatam̃oli p̃ota maga mau, tea tapepavakoto maga, tea tagele maga, tea maripele maga, kite dapala tea tape nasautoga waia.

¹²A paka rua pali sara wiik; a do pitua ki kekerualima ni naleo maga mamau puti waina a dalua ra.

¹³Ma tea tape nasautoga e lawodu uvea, po da piviari mau naga ega sike namatana paki nakoroatelagi, ma e dum̃ana dapagi narum̃ana, po naga, Sup̃e, p̃a dodomi au tea mari naleo sa.

¹⁴A noa ki mu, naga Nae e siwo paki nasum̃a aneana e pei tea marileanakiana, ma tea vea waina e da pei tea mari leanakiana mau: nalakena sara naata waina eu dum̃ada dape ra pakilagi euga wo pei tea toroana pakitano; ma tea waina e dum̃ana doro e pakitano ega wo pei tea tapeana pakilagi.

¹⁵Go eu dape pipia adeada maga umai punusi a, naga ega kisidogo ra: ma ragi waina tea vasapiseikiana maga eu punusi a, eu pasa kasua ki da.

¹⁶Ma Yesu e soso ra umai punusi a, po naga, Kuga suasua ki piakirikiri kiki maga naga euga umai punusi au, go kuga ta dip̃agoro ra mau: nalakena namarakiana ki Sup̃e e pei tea ni tea tapalada.

¹⁷Lomau a noa ki mu, naga Naata waina e pe wo da dape namarakiana ki Sup̃e dapala piakiki kiki mau, e pe wo da sili paki asa mau.

¹⁸Go tea maraki sikai e pusuusu paki nia, e naga, Tea Vasapiseiki Wia, aga mari nasava naga aga veani namauriana waina e du mau du?

¹⁹Go Yesu e noa ki nia, e naga, Ekasana ku soso au ki tea wia? Te naata e da p̃ia mau, ma sikai e p̃ia, Sup̃e;

²⁰Ku atae natip̃akiana go natip̃agoroana maga, P̃a ta maripele mau, P̃a ta mari punue mau, P̃a ta panako mau, P̃a ta noasokisoki sorosoro mau, P̃a dodomadagani tamam̃a go p̃ilam̃a.

²¹Go e naga, Tea maga mamau puti wanogoe a do pavaigoro ra pae ragi ni naveipiakikiana aginau pa pa.

²²Go ragi waina Yesu e dogo e, e noa ki nia, e naga, Tea sikai ku ko dika asa: p̃a sori naleo maga mamau puti waina ku peani ra, po duri dua tea tika maga, go p̃a wo peani naloriki tauakiana nakoroatelagi: go p̃a umai, p̃a rausi au.

²³Ma ragi waina e dogo tea wanogoe e pei tea mariana, e susue p̃arua; nalakena e pei sogolapa warua.

²⁴Go Yesu e punusi a po naga, E kasua p̃arua pa ki tea maga waina eu peani nasogolapaana naga euga sili paki namarakiana ki Sup̃e!

²⁵Nalakena e kasua kiki ki kamel sikai naga ega sili darave malo masai ni tea tuturi sikai, ma e kasua p̃arua ki tea sogolapa sikai naga ega sili paki namarakiana ki Sup̃e.

²⁶Go tea maga waina eu dogo e eu naga, Go sei e mari atae pei tea mautipauriana?

²⁷Ma e naga, Naleo maga waina naatam̃oli maga eu mari sa mari ra Sup̃e e mari atae mari ra.

²⁸Go Petero e naga, P̃a leo, kinami au doropusi tea aginami maga eu madoko, po dausi ko.

²⁹Go e noa ki da, e naga, Lomau a noa ki mu, naga Te naata e da doko mau waina e doropusi nasum̃a aneana, kite anagoroi, kite taina maga, kite tamana go p̃ilana, kite natuna maga eu madoko, nalakena namarakiana ki Sup̃e,

³⁰waina ega wo da dape tagona laapa liu ra ragi waia, go namauriana waina e du mau du maramana waina ega wo umai.

³¹Go e piragi lua tea rualima sikai tamate dua, po noa ki da, e naga, Kuga leo, tu sake paki Yerusalem pano, go naleo maga mamau puti waina eu pei tea midiriana pae profeta maga euga wo pei tea marisuaana paki naatam̃oli Natuna.

³²Nalakena ega wo pei tea vituakiana paki tea ni nalauna p̃ota maga, go ega wo pei tea marisaudoakiana, po pei tea marisakiana, po pei tea taniuana:

³³go euga wo parati a po mari punue a: go ega wo moro duleana naaleatia ketolu.

³⁴Go eu da midoaki atae tea sikai ni tea maga wanogoe mau; go navasaana wanogoe e pei tea surukiana kiada, go eu da atae tea maga waina eu pei tea noaana mau.

³⁵Go e pakilina, ragi waina e paki m̃aladigi ki Yeriko, naatam̃oli kesa sikai e do natano pisari napua waina e do datago:

³⁶go ragi waina e dogo taua sikai ni naatam̃oli maga eu surata liu sa pano, e pusuusu ki nia, Tea waia e pei nasava?

³⁷Go eu noakisai a, naga Yesu ni Nasareth e do liu pano.

³⁸Go e pioso, po naga, Yesu, natu ni David, p̃a dodomi au.

³⁹Go tea maga waina eu pea eu pasa kasua ki nia, naga ega vunuta: ma nae e moro pioso p̃arua liu, Natu ni David, p̃a dodomi au.

⁴⁰Go Yesu e du dorogo, po dip̃aki nia naga ega vei tea viragiana umai punusi a: go ragi waina e umai paki m̃aladigi e pusuusu paki nia, e naga, Ku masauna naga aga manigo mari nasava?

⁴¹Go e naga, Nawota, naga aga moro leosai.

⁴²Go Yesu e noa ki nia, e naga, P̃a moro leosai: nasaralomauana anigo e po mari pauri ko.

⁴³Go e moro leosai m̃araverave, po dausi a, po do samasamani Sup̃e: go narei mamau, ragi waina eu punusi a eu dua Sup̃e navasasamasamaniana.