Read Nguna Togoa Etafe North LUKA 21 Bible Online

LUKA 21 - Nguna Togoa Etafe North bible

LUKA 21

¹Go e sike namatana maga, po punusi tea sogolapa maga waina eu do nadi ki navituaana adeada maga paki nalia ni m̃ane.

²Go e punusi nagoroi malepu sikai waina e pei tea tika e nadi ki maite dua paki asa.

³Go e naga, Lomau a noa ki mu, Nagoroi malepu waia waina e pei tea tika e nadi ki tea waina e p̃arua liu agi tea maga mamau puti:

⁴nalakena tea maga mamau puti waia tea adeada e p̃arua go eu nadi ki tea waina e du pele seara kakana paki navituaana maga: ma nae tea aneana e kiki go e nadi ki puti tea ni namauriana aneana waina e peani a.

⁵Go ragi waina te seara eu noa nalo ni nasum̃a tapu, naga e pei tea rekeikiana ki vatu wia maga go ki navituaana maga,

⁶e naga, Tea maga waia waina ku punusi ra, naaleatia maga euga wo umai, waina vatu sikai ega wo da pei tea toropusiana doko elagi ni vatu sikai nea mau, waina ega wo da pei tea rakaiana mau.

⁷Go eu pusuusu paki nia po naga, Tea Vasapiseiki, nalakena tea wanogoe tea maga wanogoe euga wo pakilina seve ragi? Go nasava ega wo pei navaivaiana ragi waina tea maga wanogoe euga wo pei m̃aladigi naga euga vakilina?

⁸Go e naga, Kuga vunusi naga kuga ta pei tea viragi‐sasap̃o‐kiana mau: nalakena tea laapa euga wo umai pae nagisagu, po naga, Kinau a pei nae; go, Ragi e pei m̃aladigi: kuga ta dausi ra pano mau.

⁹Go ragi waina kuga wo dogo navakalo maga go navariana maga, kuga ta mataku mau: nalakena tea maga wanogoe e one ara one naga euga vakilina pea; ma namatap̃agona edaku e ko da m̃araverave mau.

¹⁰Ragi wanogoe e noa ki da, e naga, Nalauna ega wo duleana po mari nalauna, go namarakiana ega wo duleana po mari namarakiana:

¹¹go naruru warua maga euga wo doko, go navitoloana maga go nasasanaana ni namateana maga tokora sikasikai; go tea mataukiana go navaivaiana warua maga euga wo doko waina euga wo pae nakoroatelagi umai.

¹²Ma ragi vea ki tea maga wanogoe, euga wo nadi ki nam̃elearuda maga paki mu, po kopalele mu, po pitua ki mu paki nasum̃a ni nasaisaiana maga go nasum̃a ni navavaiana maga, po piragi mu paki narae ni nawota maga go tea maramara maga nalakena nagisagu.

¹³Ega wo manimu pei nanoasokisokiana sikai.

¹⁴Nalakena tea wanogoe kuga lawo ki nia nap̃op̃omu naga kuga ta pea midoaki parati ki naga kuga vasakorokoro mau:

¹⁵nalakena kinau aga wo dua mu nawoka sikai go namanumatuaana, waina tea maga mamau puti waina eu kokona ki mu euga wo da mari atae lawo dugoro e kite pasa dugoro e mau.

¹⁶Ma kuga wo pei tea vituakiana pae tea matua animu maga, go pae taimu maga, go pae namatarau animu maga, go pae tamu ri maga; go euga wo mari seara kakamu euga vei tea maripunueana.

¹⁷Go kuga wo pei tea vilosiana pae tea maga mamau puti nalakena nagisagu.

¹⁸Go napati ni nalolu ni nap̃aumu sikai ega wo da puoli mau.

¹⁹Nasokiana animu kuga wo dalua namauriana animu maga asa.

²⁰Ma ragi waina kuga wo punusi Yerusalem e pei tea talivirigoroana ki taua maga ni naatam̃oli maga ni navakalo, ragi wanogoe kuga atae naga navei‐maso‐maladi‐ana aneana e pei m̃aladigi.

²¹Ragi wanogoe tea maga waina eu doko Yudea euga sava paki tava maga; go tea maga waina eu doko m̃aleoputo kakana euga m̃elu dua ki nia pano; go tea maga waina eu doko vanua maga euga ta sili paki asa mau.

²²Nalakena naaleatia maga wanogoe eu pei naaleatia maga ni nasikoana, naga naleo maga mamau puti waina eu pei tea midiriana euga vei tea vakavuroana.

²³Ai ki tea maga waina eu diena go ki tea maga waina eu pitua ki susu naaleatia maga wanogoe! Nalakena nariesokiana warua ega wo doko navanua, go namaetoana paki narei waia.

²⁴Go euga wo dowo ki nawoka ni lova, go euga wo pei tea viragilua‐pavakoto‐ana paki nalauna maga mamau puti: go Yerusalem ega wo pei tea vasiana pae tea ni nalauna p̃ota maga pa pa pa ragi maga ki tea ni nalauna p̃ota maga euga wo pei tea vakavuroana.

²⁵Go navaivaiana maga euga wo doko elo go atelagi go m̃asoe maga; go narogokitesaana ni nalauna maga ega wo doko maramana, namidoakiputuakiana nalakena nasaruruana ni natasi go ni napeao maga;

²⁶naatam̃oli maga euga wo matekimala nalakena namatakuana, go nalakena naleogoroana ni tea maga waina euga wo umai paki maramana: nalakena tea kasua maga ni nakoroatelagi maga euga wo pei tea varivariakiana.

²⁷Go ragi wanogoe euga wo punusi naatam̃oli Natuna ega wo do umai doko napopouru sikai ega wo pilake nakasuaana go nasamasamaana warua.

²⁸Ma ragi waina tea maga wanogoe euga wo atulake navakilinaana, kuga marasike, po sike nap̃aumu; nalakena nataulua‐mu‐ana e pei m̃aladigi.

²⁹Go e noa ki da naluluakia sikai: Kuga vunusi napuliva, go nakau maga mamau puti:

³⁰ragi waina eu po siria, ku punusi a po dum̃amu atae naga ragi ni navivitinuana e po pei m̃aladigi.

³¹Dapala nogoe nimu ma, ragi waina kuga wo punusi tea maga wanogoe eu do pakilina, kuga atae naga namarakiana ki Sup̃e e pei m̃aladigi.

³²Lomau a noa ki mu, naga Tagona waia euga wo da pano puoli mau, pa pa naleo maga mamau puti euga wo pakilina sua.

³³Nakoroatelagi go maramana eroga wo pano puoli: ma navasaana aginau maga euga wo da pano puoli mau.

³⁴Ma kuga tum̃amu leo paratiki mu, naga nap̃op̃omu euga ta madaga ki natuatualiuana, go ki namatamalokuana, go ki namidoakiparatikiana maga ni tea ni namauriana waia, go naga naaleatia wanogoe ega ta pa paratiki mu m̃araverave dapala vaivai sikai mau:

³⁵nalakena ega wo umai dapala nogoe paki tea maga mamau puti waina eu doko narae ni maramana mamau.

³⁶Ma kuga to leleogoro sara ragi, po do dapasavasa pavara, naga kuga mari matua naga kuga sava dua ki tea maga mamau puti wanogoe waina euga wo pakilina, go naga kuga lawodu narae ni naatam̃oli Natuna.

³⁷Go sara naaleatia e do pasapiseiki roara ni nasum̃a tapu: go sara nap̃ogiana e dave pano, po m̃enaki tava waina e pei tea sosoana ki tava ni Oliva.

³⁸Go narei mamau eu rumai punusi a roara ni nasum̃a tapu malip̃ogi sa, naga euga rogo e.