Read Nguna Togoa Etafe North LUKA 22 Bible Online

LUKA 22 - Nguna Togoa Etafe North bible

LUKA 22

¹Go nasaisaiana ni bred waina leven e dika asa e pei m̃aladigi, waina e pei tea sosoana ki Navakalauana.

²Go tea viri warua maga go tea midiri maga eu laaga dapala waina euga mari punue a nalakena eu matauki narei.

³Go Satan e sili Yuda waina e pei tea sosoana ki Iskariote, e pei sikai ni tea rualima sikai tamate dua.

⁴Go e pano, po pusum̃aki sikoti tea viri warua maga go nawota maga ni tea vavai maga, dapala waina ega vitua ki nia paki da.

⁵Go eu laelaea, po saisai ki navasaana naga euga tua e m̃ane.

⁶Go e suasua, po laaga ragi wia naga ega vitua ki nia paki da asa, taua ni naatam̃oli maga euga vuoli.

⁷Go naaleatia ni bred waina leven e dika asa e umai sua, waina e one asa one naga navakalauana ega vei tea maripunueana asa.

⁸Go e dip̃aki lua Petero go Yoane, po naga, Koroga vano po manigida marim̃ataki navakalauana, naga tuga kanikani.

⁹Go ero noa ki nia, ero naga, Ku masauna naga aroga marim̃ataki esava?

¹⁰Go e noa ki da, e naga, Koroga leo, ragi waina koroga wo sili sua natokoana, naatam̃oli sikai waina e dapetape noai ni naruku sikai ni noai ega wo sua mu: koroga rausi a paki ekopu ni nasum̃a waina ega wo sili asa.

¹¹Go koroga noa ki talakea ni nasum̃a, naga Tea Vasapiseiki e noa ki‐go, e naga, Em̃ago ni nam̃enakiana wai, waina aga kani navakalauana asa, kinami ma tea vasapiseikiana aginau maga auga mamau?

¹²Go nae ega wo piseiki mu em̃ago warua ni elagi sikai waina sara naleo eu doko asa: tokora wanogoe koroga marim̃ataki asa.

¹³Go ero pano, po pap̃ai dapala waina e noa ki da asa: go ero marim̃ataki navakalauana.

¹⁴Go ragi waina e pei aura kakana, e kere one, nara ma apostolo maga eu mamau.

¹⁵Go e noa ki da, A po masau ki namasauana naga aga kani sikoti mu navakalauana waia ega vea ki aga sua navitinumateana: nalakena a noa ki mu,

¹⁶naga Aga wo da moro gani a mau pa pa ega wo pei tea vakavuroana namarakiana ki Sup̃e.

¹⁷Go eu duae e dape lasa munu sikai, go ragi waina e pasadodom̃ataki sua, e naga, Kuga tape tea waia, po dum̃amu p̃otae dua mu asa:

¹⁸nalakena a noa ki mu, naga Aga wo da edaku ki ragi waia munu nawa ni vaine seara kakana mau, pa pa namarakiana ki Sup̃e ega wo umai.

¹⁹Go e dape bred sikai, go ragi waina e pasadodom̃ataki sua, e dova p̃orae a, po dua ra, po naga, Tea waia e pei nap̃atokogu waina e manimu pei tea vituakiana: kuga mari tea waia naga kuga midoaki nau asa.

²⁰Go dapala nogoe lasa munu edaku ki nakaniana, po naga, Lasa munu waia e pei navasasokiana vau ni nadagu, waina e manimu pei tea takiana.

²¹Ma kuga leo, nam̃elearu ni tea waina e pitua ki nau e sikoti au doko wede.

²²Nalakena naatam̃oli Natuna e pano lomau dapala waina e pei tea tawonakiana asa: ma ai ki naatam̃oli waina e pei tea vituakiana pae asa!

²³Go eu pae asa dum̃ada pusuusu paki da ki sei kakada e pei tea waina e naga ega mari tea wanogoe.

²⁴Go navululuana ma e pakilina m̃aleoputo kakada, ki sei kakada e alagoro pei tea warua liu.

²⁵Go e noa ki da, e naga, Nawota ni nalauna p̃ota maga eu maramara dap̃au ra; go tea maga waina eu peani naveinawotaana dap̃au ra eu pei tea sosoana ki Tea Marim̃ataki maga.

²⁶Ma nimu kuga ta dapala nogoe mau: ma tea waina e p̃arua m̃aleoputo kakamu, ega vei tea mariana ega tapala tea takariki; go tea waina e maraki, ega tapala tea waina e suasua.

²⁷Nalakena sei e p̃arua, tea waina e kere one ganikani, kite tea waina e suasua? E da pei tea waina e kere one ganikani kite?

²⁸Ma kinau a doko m̃aleoputo kakamu a dakiusi tea waina e suasua. Ma nimu ku pei tea waina ku sikoti au doko namaridogo‐au‐ana maga;

²⁹go kinau a manimu dawona ki namarakiana sikai, dakiusi waina Tamagu e maginau dawona ki nia,

³⁰naga kuga kanikani po munu tea ni wede aginau namarakiana aginau; go kuga wo dasake malo tasake maga po do pasap̃otae naworawora ni Israel rualima sikai tamate dua.

³¹Simon, Simon, p̃a leo, Satan e datago mu, naga ega nuanua ki mu dapala whiit:

³²ma kinau a manigo pavara naga nasaralomauana anigo ega ta makoto mau: go nigo, ragi waina p̃a wo moro maradoa, p̃a mari taim̃a maga euga kasua.

³³Go e noa ki nia, Nawota, a marim̃ata sua naga aga sikoti ko paki nasum̃a ni navavaiana go paki namateana pano.

³⁴Go e naga, A noa ki‐go, Petero, toa ega ko da dare masoso mau, ma p̃a wo paka tolu pasagoro naga ku atae au.

³⁵Go e noa ki da, e naga, Ragi waina a dip̃aki lua mu, go ku p̃alo ki nala ni m̃ane, go nala ni nakaniana, go nam̃elevasiana maga, ku dika ki te navatuna kite? Go eu naga, Au da dika ki te navatuna mau.

³⁶Go e noa ki da, e naga, Ma ragi waia, tea waina e peani nala ni m̃ane sikai, ega tape a, go ega tape nala ni nakaniana sikai: go tea waina e da peani mau, ega sori sugoro aneana po pakotovi lova sikai.

³⁷Nalakena a noa ki mu, naga tea waia waina e pei tea midiriana e one asa one naga ega vei tea marisuaana au, Go e pei tea veveana sikoti tea tapiri maga: nalakena tea waina e pei tea midiriana nalo kakagu e peani namarisuaana.

³⁸Go eu naga, Nawota, p̃a leo, lova dua nea. Go e noa ki da, e naga, E pei te lapa.

³⁹Go e dave umai, po paki tava ni Oliva pano, pae natomariana aneana; go tea vasapiseikiana aneana maga ma eu dausi a.

⁴⁰Go ragi waina e pakilina tokora wanogoe, e noa ki da, e naga, Kuga tapasavasa naga kuga ta paki namaridogoana mau.

⁴¹Go e pa dua ki da namalopa dapala waina eu nadi ki vatu; go e ditip̃atua po dapasavasa, po naga,

⁴²Mama, ku pe suasua, p̃a tape lua lasa munu waia kiagu: ma tea waina ega vei tea mariana ega ta pei namasauana aginau mau, ma ega vei tea anigo.

⁴³Go agelo sikai, waina e pae nakoroatelagi umai, e pakilina ki nia, po mari a e kasua.

⁴⁴Go e dogo kite sa p̃arua liu, po dapasavasa kasukasua: go toro kakana e po dakiusi natuturu warua maga ni nada waina eu do dowo paki natano.

⁴⁵Go ragi waina e duleana pa dua ki natapasavasaana, e umai punusi tea vasapiseikiana maga, po pap̃ai ra eu maturu nalakena nasusueana, go e noa ki da, Ekasana ku maturu?

⁴⁶Kuga tuleana po dapasavasa, naga kuga ta paki namaridogoana mau.

⁴⁷Go ragi waina e ko do pasa, kuga leo, taua sikai ni naatam̃oli maga, go tea waina e pei tea sosoana ki Yuda, tea sikai ni tea rualima sikai tamate dua, e pea ki da; go e umai paki m̃aladigi ki Yesu naga ega tum̃ili a.

⁴⁸Ma Yesu e noa ki nia, e naga, Yuda, ku pitua ki naatam̃oli Natuna ki natum̃iliana sikai kite?

⁴⁹Go ragi waina tea maga waina eu dalivirigoro e eu punusi tea waina ega vakilina, eu naga, Nawota, auga atugi ki lova kite?

⁵⁰Go sikai kakada e atugi tea suasua ki tea viri warua liu, po dae lua nadaligana ni matua.

⁵¹Ma Yesu e pasa dara po naga, Kuga ko du. Go e kisidogo nadaligana, po mari pauri a.

⁵²Go Yesu e noa ki tea viri warua maga, go ki nawota maga ni tea vavai maga ni nasum̃a tapu, go ki tea matua maga, waina eu rumai dip̃a e, e naga, Ku po dave umai dapala ku dip̃a tea tape pavakoto sikai, ku pua lova maga go naap̃e maga kite?

⁵³Ragi waina a sikoti mu doko sara naaleatia roara ni nasum̃a tapu, ku da sai ki nam̃elearumu dip̃a au mau: ma ragi waia e pei aura animu, go nakasuaana ni namaligo.

⁵⁴Go eu puasoki a, po piragi lua e, po piragi a paki ekopu ni nasum̃a ki tea viri warua liu. Ma Petero e dausi uvea.

⁵⁵Go ragi waina eu sui nakapu m̃aleoputo ni namasopa ni nasum̃a, po mamau do natano, Petero e do natano m̃aleoputo kakada.

⁵⁶Go nagoroi atara sikai e punusi a e do natano namarama ni nakapu, go e leosoki a, po naga, Tea waia ma e sikoti a doko.

⁵⁷Ma e pasagoro, po naga, Koroi, a da atae a mau.

⁵⁸Go edaku ki ragi kiki tea p̃ota sikai e punusi a, po naga, Nigo ma ku pei tea sikai kakada. Ma Petero e naga, Kanao, a da pei tea sikai kakada mau.

⁵⁹Go edaku ki namalopa e alagoro pei tea ni aura sikai, tea p̃ota sikai e pasasokisoki kasua, po naga, Lomau tea waia ma e sikoti a doko, nalakena e pei tea ni Calilea.

⁶⁰Ma Petero e naga, Kanao, a da atae tea waina ku noa e mau. Go m̃araverave, ragi waina e ko do pasa, toa e dare.

⁶¹Go Nawota e dum̃ana doa e, po leopunusi Petero. Go Petero e midoaki navasaana ki Nawota, naga e noa ki nia, e naga, Ragi waina toa ega ko da dare masoso mau, p̃a wo paka tolu pasagoro au.

⁶²Go e paki katama po dagi p̃arua.

⁶³Go naatam̃oli maga waina eu puati Yesu eu mari saudoa ki nia, po parati a.

⁶⁴Go eu p̃augoro namatana, po pusuusu paki nia, po naga, P̃a vasapua, tea waina e p̃okati ko e pei sei?

⁶⁵Go eu pasa dip̃a e tea p̃ota laapa, po do pasa sa ki nia.

⁶⁶Go ragi waina e pei aleati, nasaisaiana ni tea matua maga ni narei eu pei tea viragisaisaikiana, tea viri warua maga go tea midiri maga; go eu piragi lua e paki nasaisaiana ni navasap̃otaeana adeada,

⁶⁷po naga, Nigo ku pe vei Kristo, p̃a noa ki gami asa. Ma e noa ki da, A pe noa ki mu asa, ku pe ta saralomau mau:

⁶⁸go a pe vusuusu paki mu, ku pe ta pasa dara mau.

⁶⁹Ma pae ragi waia pa pa naatam̃oli Natuna ega wo dasake doko pisari nam̃elearu ni matua ni nakasuaana ki Sup̃e.

⁷⁰Go eu mamau puti naga, Go nigo ku pei Sup̃e Natuna kite?

⁷¹Go e noa paki da, e naga, Nimu ku noa e, nalakena kinau a pei nae. Go eu naga, Tuga moro kasa ki nanoasokisokiana? Nalakena tu po dum̃agida dogo pae nawokana.