Read Nguna Togoa Etafe North LUKA 23 Bible Online

LUKA 23 - Nguna Togoa Etafe North bible

LUKA 23

¹Go taua mamau kakada eu duleana, po piragi a pano punusi Pilato.

²Go eu pae asa pasadip̃a e, po naga, Au pap̃ai tea waia e do puadoa sa ki nalauna anigida, po dip̃agoro naga auga ta dua Kaisar nasautoga mau, po noa naga nae e pei Kristo, nawota sikai.

³Go Pilato e pusuusu paki nia, po naga, Nigo ku pei Nawota ki naka ni Yudea kite? Go e pasa dara e po naga, Nigo ku noa e.

⁴Go Pilato e noa ki tea viri warua maga, go ki taua ni naatam̃oli maga e naga, A da pap̃ai te namariana sa naatam̃oli waia mau.

⁵Ma eu pasa kasukasua, po naga, E pasa paria ki narei, e pasapiseiki usuraki Yudea mamau, go e pae Calilea pa pa pa paki tokora waia.

⁶Ma ragi waina Pilato e dogoe e pusuusu, E pei naatam̃oli ni Calilea kite?

⁷Go ragi waina e atae naga e pei tea ni namarakiana ki Herod, e dip̃aki lua e pano punusi Herod, waina nae ma e doko Yerusalem naaleatia maga wanogoe.

⁸Go ragi waina Herod e punusi Yesu, e laelaea p̃arua: nalakena ragi varau e masauna naga ega vunusi a, nalakena e dogo e; go e leogoro naga ega vunusi te navaivaiana sikai ega vei tea mariana pae asa.

⁹Go e pusuusu paki nia ki navasaana laapa; ma nae e da pasa dara e te navatuna mau.

¹⁰Go tea viri warua maga go tea midiri maga eu lawodu po pasadip̃a kasua ki nia.

¹¹Go Herod nara ma naatam̃oli ni navakalo aneana maga eu midoakip̃alo ki nia, po mari saudoa ki nia, go eu sawa ki sugoro tare sikai asa po dip̃aki lua e liliu pa punusi Pilato.

¹²Go Herod go Pilato ero dum̃ada po pei tada ri naaleatia wanogoe: nalakena sala vea ero dum̃ada kokona ki da.

¹³Go Pilato e soso saisai ki tea viri warua maga go tea maraki maga go narei,

¹⁴po noa ki da, e naga, Ku piragi naatam̃oli waia umai punusi au, dapala e pei tea waina e puadoa sa ki narei: go kuga leo, kinau a puausi a narae mu, po da pap̃ai te namariana sa naatam̃oli waia mau, tea maga waina ku pasadip̃a e ara:

¹⁵go Herod e da pap̃ai a mau: nalakena e dip̃aki lua e liliu umai punusi gida; go kuga leo, e da mari te navatuna waina e p̃ia ki namateana mau.

¹⁶Nalakena tea wanogoe aga varati a po peresi a.

¹⁷(E one asa one naga ega madeada peresi tea sikai nasaisaiana wanogoe.)

¹⁸Ma taua mamau eu saisai pioso puti, eu naga, P̃a tape lua tea waia, po maginami peresi Barabba:

¹⁹tea sikai waina e pei tea nadikiana paki ekopu ni nasum̃a ni navavaiana, nalakena natuleanaana sikai waina e pakilina natokoana, go nalakena namaripunueana.

²⁰Go Pilato e moro pasa ki da, e masauna naga ega veresi Yesu; ma eu pioso,

²¹eu naga, P̃a turi a, p̃a turi a nakau valadagoto.

²²Go e noa ki da sala ketolu, e naga, Ekasana, nae e mari tea sa nasava? A da pap̃ai te navatuna asa mau waina e pei nalakena ega mate asa: nalakena tea wanogoe aga varati a po peresi a.

²³Ma eu one asa one ki nadaleo kasua maga, eu do datago naga ega vei tea turiana nakau valadagoto. Go nadaleoda maga eu marimatua.

²⁴Go Pilato e pasap̃otae naga tea waina eu datago asa ega vei tea mariana.

²⁵Go e peresi tea waina e pei tea nadikiana paki ekopu ni nasum̃a ni navavaiana nalakena natuleanaana go namaripunueana, waina eu datago asa; ma e pitua ki Yesu paki namasauana adeada.

²⁶Go ragi waina eu piragi lua e, eu pua soki tea sikai, Simon ni Kurene, waina e pae navanua umai, go eu doropusi nakau valadagoto asa, naga ega tapetape a edakugoro Yesu.

²⁷Go taua warua sikai ni narei eu dausi a, nara ma nagoroi maga waina eu lalagaarova po dagisi a.

²⁸Ma Yesu e dum̃ana doa e punusi ra po naga, Yerusalem natuna nagoroi maga, kuga ta dagisi au mau, ma kuga tum̃amu dagisi mu, go natumu maga.

²⁹Nalakena kuga leo, naaleatia maga euga wo umai, waina euga wo noa ara, naga Tea tim̃o maga eu maro pa, go nap̃ele maga waina eu da pisola mau, go nasusu maga waina eu da pitua ki nasusuana mau.

³⁰Ragi wanogoe euga wo pae asa noa ki tava warua maga, Kuga rowo gami; go ki tava kiki maga, Kuga toni gami.

³¹Nalakena eu pe mari tea maga waia nakau mata, nasava ega wo pei tea mariana tea kokolo?

³²Go tea p̃ota dua, tea mari naleo sa, ero pei tea viragiluaana sikoti a naga eroga vei tea maripunueana.

³³Go ragi waina eu rumai paki tokora waina e pei tea sosoana ki Nagarai, eu duri a tokora wanogoe nakau valadagoto, nara ma tea mari naleo sa dua wanogoe eu mamau, sikai e du taleva ni matua go kerua e du taleva ni mawiri.

³⁴Go Yesu e naga, Mama, p̃a madeada midoakikoro e; nalakena eu da atae tea waina eu mari a mau. Go eu dum̃ada madeada p̃otae sugoro aneana maga sarasara ra, po nadi ki gole maga.

³⁵Go narei eu lawodu leopunusi. Go tea maraki maga eu pasa piragisu paki nia, po naga, E mauti pauri tea p̃ota maga; tea waia e pe vei Kristo ki Sup̃e, tea matadoaana aneana, ega tum̃ana mauti pauri a.

³⁶Go naatam̃oli ni navakalo maga ma eu mari saudoa ki nia, eu rumai punusi a, po sai ki waine kokona paki nia, po naga,

³⁷Nigo ku pe vei Nawota ki naka ni Yudea, p̃a tum̃am̃a mauti pauri ko.

³⁸Go namidiriana sikai e doko elagi ki nia, TEA WAIA E PEI NAWOTA KI NAKA NI YUDEA.

³⁹Go tea mari naleo sa maga waina ero pei tea sarakiana sikai kakada e pasa sa ki nia, po naga, Nigo ku da pei Kristo kite? P̃a tum̃am̃a mauti pauri ko, go p̃a mauti pauri gami.

⁴⁰Ma kerua e pasa dara, po pasa kasua ki nia, po naga, Nigo ku da matau ki Sup̃e, nalakena ku doko natip̃akotoviana sikai maau kite?

⁴¹Go e leana nalo kakagida lomau; nalakena toro dape liliua ki tea waina e p̃ia ki namariana anigida maga: ma tea waia e da mari te navatuna sa mau.

⁴²Go e naga, Yesu, p̃a midoaki nau ragi waina p̃a wo umai namarakiana anigo.

⁴³Go e noa ki nia, e naga, Lomau a noa ki‐go, Masoso p̃a wo sikoti au doko Paradeiso.

⁴⁴Go e alagoro pei aura kelatesa, go namaligo e pakilina pa usuraki maramana mamau pa pa paki aura keloveti namarama ni elo e makoto:

⁴⁵go nakulukulu taugoro p̃otae ni nasum̃a tapu e pei tea p̃oraeana m̃aleoputo kakana.

⁴⁶Go ragi waina Yesu e pioso sua ki nadaleo kasua, e naga, Mama, a pitua ki naatagu paki nam̃elearum̃a maga: go ragi waina e noa sua tea wanogoe, e maro dua ki namerona.

⁴⁷Go ragi waina senturio e punusi tea waina e pei tea mariana, e samasamani Sup̃e, po naga, Lomau tea waia e pei naatam̃oli leana.

⁴⁸Go taua maga mamau puti ni naatam̃oli maga waina eu saisai umai paki naleopunusiana wanogoe, ragi waina eu leopunusi sua tea maga waina eu pei tea mariana, eu do duki narum̃ada liliu.

⁴⁹Go tea maga mamau puti waina eu atae a, go nagoroi maga waina eu dausi a pae Calilea umai, eu lawo du uvea, eu do leo punusi tea maga wanogoe.

⁵⁰Go kuga leo, naatam̃oli sikai nagisana Yosef, waina e pei tea vusum̃aki sikai,

⁵¹naatam̃oli wia go e leana (nae e da mamau suasua ki namidoakip̃otaeana go namariana adeada mau), tea ni Arimathea, natokoana sikai ki naka ni Yudea, waina e do leogoro namarakiana ki Sup̃e:

⁵²nae e pa punusi Pilato, po datago nap̃atoko ni Yesu.

⁵³Go e dape a siwo, po lulugoro e ki nakulukulu ni linen sikai, po doropusi a matigo sikai waina e pei tea taeana vatu, waina te naata e ko da one asa mau.

⁵⁴Go e pei naaleatia ni Namarim̃atakiana, go sabbath e pei m̃aladigi.

⁵⁵Go nagoroi maga, waina eu sikoti a pae Calilea umai, eu dausi puluti ra, po leo punusi matigo, go dapala waina nap̃atokona e pei tea toropusiana one.

⁵⁶Go eu liliu, po marim̃ataki tea ni nap̃o wia maga go naroro lolo maga. Go eu maromaro sabbath, pae natip̃akiana kakana.