Read Nguna Togoa Etafe North LUKA 24 Bible Online

LUKA 24 - Nguna Togoa Etafe North bible

LUKA 24

¹Ma naaleatia vea ni wiik, ragi ni namakotokotoana kiki kakana, eu rumai paki matigo, eu dape tea ni nap̃o wia maga wanogoe umai waina eu marim̃ataki sua e.

²Go eu pap̃ai vatu e pei tea maluluakiana m̃elu dua ki matigo pano.

³Go eu paki ekopu, po da pap̃ai nap̃atoko ni Nawota Yesu mau.

⁴Go e pakilina, ragi waina eu dodoputuaki asa, kuga leo, naatam̃oli dua ero lawodu pisari ra, ero suni sugoro waina e pilavila:

⁵go ragi waina eu mataku, po kolo ki naraeda paki natano, ero noa ki da, Ekasana ku laaga tea mauri m̃aleoputo ni tea mate maga?

⁶E da doko nea mau, ma e po duleana: kuga midoaki dapala waina e pasa ki mu ragi waina e ko doko Calilea doko,

⁷po noa naga e one naatam̃oli Natuna one naga ega vei tea vituakiana paki nam̃elearu ni naatam̃oli sigisigileo maga, po pei tea turiana nakau valadagoto, po moro duleana naaleatia ketolu.

⁸Go eu midoaki navasaana aneana maga,

⁹po liliu pae matigo umai, po dogorogo ki tea maga mamau puti wanogoe paki tea rualima sikai tamate sikai, go paki tea p̃ota maga mamau puti.

¹⁰Go eu pei Maria ni Macdala, go Yoanna, go Maria Yakobo p̃ilana: nara ma nagoroi p̃ota maga waina eu sikoti ra eu noa ki apostolo maga tea maga wanogoe.

¹¹Go navasaana maga wanogoe eu dapala navasaana p̃alo namatada, go eu da saralomau ara mau.

¹²Ma Petero e duleana, po sava paki matigo pano; go e kolo po leo paki ekopu, po punusi nakulukulu ni linen maga eu masikida one; go e paki nasum̃a aneana pano, e do maga tea waina e po pakilina.

¹³Go kuga leo, tea rua kakada ero surata naaleatia sikai maau wanogoe paki natokoana kiki sikai nagisana Emmaus, waina e pei maile larua go namagovai sikai uvea ki Yerusalem.

¹⁴Go ero dum̃ada pusum̃aki paki da nalo ni tea maga mamau puti wanogoe waina eu pakilina.

¹⁵Go e pakilina, ragi waina ero do pusum̃aki po pusuusu dum̃ada paki da, naga Yesu nae e umai paki m̃aladigi, po surata sikoti ra.

¹⁶Ma namatada eu pei tea marigoroana naga eroga ta leo atae a mau.

¹⁷Go e noa ki da, e naga, Navasaana maga waia, waina koro dum̃amu noa ki mu ara po surata, eu pei nasava? Go ero lawodu dorogo, namatada susue.

¹⁸Go sikai kakada, nagisana Kleopa, e pasa dara po noa ki nia, e naga, Nigo ku sikim̃a m̃enaki Yerusalem po da atae tea maga waina eu po pakilina asa naaleatia maga waia kite?

¹⁹Go e noa ki da, e naga, Tea maga nasava? Go ero noa ki nia, ero naga, Tea maga nalo ni Yesu ni Nasareth, waina e pei profeta sikai, e kasua ki nawosiana go ki navasaana narae ni Sup̃e go ni narei mamau:

²⁰go dapala waina tea viri warua maga go tea maraki anigida maga eu pitua ki nia naga ega vei tea tip̃akotoviana paki namateana, po duri a nakau valadagoto.

²¹Ma kinami au leogoro naga nae e pei tea waina ega taulua Israel. Ioro tea maga mamau puti wanogoe, go e po pei naaleatia ketolu edaku ki ragi waina tea maga wanogoe eu pakilina sua asa.

²²Go nagoroi seara kakagami eu mari gami au saram̃akoto, eu paki matigo malip̃ogi sa;

²³go ragi waina eu da pap̃ai nap̃atokona mau, eu rumai po noa naga eu punusi navunusiana sikai ni agelo maga, waina eu noa naga e mauri.

²⁴Go seara ni tea maga waina eu sikoti gami eu paki matigo, po pap̃ai a e dapala waina nagoroi maga eu noa e: ma nae eu da punusi a mau.

²⁵Go e noa ki da, e naga, Ko tea manumatavusa maga, go tea mari daliali nap̃op̃omu naga kuga saralomau tea maga mamau puti waina profeta maga eu noa ra!

²⁶E da one Kristo one naga ega sua navitinuana maga wanogoe, po paki nasamasamaana aneana pano kite?

²⁷Go e atulake pae Moses, go pae profeta maga mamau puti, po pasadoapisei ki da m̃elu navasaana midiriana maga mamau puti naleo maga nalo kakana.

²⁸Go eu paki m̃aladigi ki natokoana kiki, waina ero surata paki asa pano: go e mari dapala ega surata liu sa pano.

²⁹Go ero pasadie a, po naga, P̃a toko sikoti gami doko: nalakena e m̃aladigi pei ragi m̃elu, go naleatia tega nopu. Go e paki ekopu naga ega toko sikoti ra doko.

³⁰Go e pakilina, ragi waina e kere one sikoti ra naga euga kanikani, e dape bred po pasa p̃ia ki nia, po dova p̃orae, po dua ra.

³¹Go namatada eu pei tea wolagatiana, go ero leo atae a; go e puoli m̃elu dua ki navunusiana adeada pano.

³²Go ero dum̃ada noa ki da, ero naga, Nap̃op̃ogida e da do soro nap̃alaugida, ragi waina e do pasa ki gida napua, ragi waina e do manigida p̃olagati navasaana midiriana maga kite.

³³Go ero duleana aura sikai maau wanogoe, po liliu umai paki Yerusalem, po pap̃ai tea rualima sikai tamate sikai eu saisai, nara ma tea maga waina eu sikoti ra doko,

³⁴eu naga, Nawota e po duleana lomau, go e po pakilina ki Simon.

³⁵Go nara ero dogorogo ki tea maga waina eu pakilina napua, go dapala waina e pei tea ataeana paki da, natova‐p̃orae‐bred‐ana.

³⁶Go ragi waina ero do noa tea maga wanogoe, nae e lawodu m̃aleoputo kakada, po noa ki da, Kuga veani natam̃ateana.

³⁷Ma eu p̃ilake po mataku, po midoaki nia naga eu leo punusi naatana sikai.

³⁸Go e noa ki da, Ekasana ku m̃anaunau? Go nadodopusuusuana maga eu pakilina nap̃op̃omu nalakena nasava?

³⁹Kuga vunusi nam̃elearugu maga go nam̃elegu maga, naga e pei kinau: kuga tovidogo au, po punusi; nalakena naatana sikai e da peani nap̃okasi go navatu maga mau, dakiusi waina ku leo punusi au a peani ra.

⁴⁰Go ragi waina e noa sua tea wanogoe, e piseiki da nam̃elearuna maga go nam̃elena maga.

⁴¹Go ragi waina eu ko da saralomau mau nalakena nalaelaeaana, po do maga, e noa ki da, e naga, Ku peani te navatuna kaniana nea kite?

⁴²Go eu dua e matele sikai ni naika veniana sikai.

⁴³Go e dape a, po ganikani naraeda.

⁴⁴Go e noa ki da, e naga, Tea maga waia eu pei navasaana aginau maga waina a noa ki mu ara, ragi waina a ko sikoti mu doko, naga tea maga mamau puti waina eu pei tea midiriana nawotaeana ki Moses, go profeta maga, go Salamo maga, nalo kakagu, e one ara one naga euga lolomana.

⁴⁵Ragi wanogoe e polagati nap̃op̃oda naga euga midoaki atae navasaana midiriana maga;

⁴⁶go e noa ki da, e naga, E dapala waia pei tea midiriana, naga Kristo ega sua navitinuana ni namateana, po moro duleana m̃elu dua ki tea mate maga naaleatia ketolu;

⁴⁷go naga namidoakidoaana go namidoakikorokoroana ni namarinaleosaana maga eroga vei tea rogorogokiana pae nagisana paki nalauna maga mamau puti, po atulake pae Yerusalem pa pa pa.

⁴⁸Nimu ku pei tea noasokisoki ni tea maga wanogoe.

⁴⁹Go kuga leo, kinau a dip̃aki lua paloti nasaiana ki Tamagu ega toko mu doko: ma nimu kuga toko natokoana pa pa kuga wo pei tea sugoroana ki nakasuaana waina e pae elagi umai.

⁵⁰Go e piragi lua ra pano pa pa eu doko kivea ki Bethania: go e sike nam̃elearuna maga po pasa p̃ia ki da.

⁵¹Go ragi waina e do pasa p̃ia ki da, e pa dua ki da pano, po pei tea tapeana sake paki nakoroatelagi pano.

⁵²Go nara eu lotu ki nia, po liliu umai paki Yerusalem pilake nalaelaeaana warua:

⁵³go eu doko roara ni nasum̃a tapu sara ragi, eu do pasa p̃ia ki Sup̃e.