Read Nguna Togoa Etafe North LUKA 3 Bible Online

LUKA 3 - Nguna Togoa Etafe North bible

LUKA 3

¹Go natau rualima sikai tamate lima ni namarakiana ki Tiberio Kaisar, ragi waina Pontio Pilato e pei tea maramara ni Yudea, go Herod e pei tetrarke ni Calilea, go taina Filipo e pei tetrarke ni navanua ni Iturea go ni Trakonitis, go Lusania e pei tetrarke ni Abeline,

²go Annas go Kaiafas ero pei tea viri warua liu, navasaana ki Sup̃e e umai paki Yoane natu ni Sakaria masop̃alo.

³Go e umai paki navanua mamau waina e doko dalivirigoro Yordan, e do dogorogo ki nabapetisoana ni namidoakidoaana paki namidoakikorokoroana ni namarinaleosaana maga;

⁴dapala waina e pei tea midiriana tusi ni navasaana maga ki profeta Isaiah, Nadaleo ni tea waina e pioso masop̃alo, Kuga mari m̃ataki napua ki Yehovah, Kuga mari napua doniana aneana maga euga leana.

⁵Sara nap̃aloa euga wo pei tea vakavuroana, Go sara tava warua go sara tava kiki euga wo pei tea tapeana pakitano; Go tea tagele maga euga wo leana, Go napua ragoragoa maga euga wo matemate;

⁶Go sara nap̃okasi euga wo punusi namautipauriana ki Sup̃e.

⁷Nalakena tea wanogoe e noa ki taua maga ni naatam̃oli maga waina eu dave pano naga euga vei tea bapetisoana pae asa, e naga, M̃aata sa natuda maga, sei e noa ki sai mu maga kuga sava dua ki namaetoana waina ega wo umai?

⁸Nalakena tea wanogoe kuga tau ki nawa maga waina eu p̃ia ki namidoakidoaana, go kuga ta pae asa noa nap̃alaumu, naga Abraham e pei tamagami: nalakena a noa ki mu, naga Sup̃e e mari atae magi Abraham mari natuna maga euga vakilina m̃elu vatu maga waia eu one.

⁹Go ragi waia tagoto ma e pei tea toropusiana e one nalake ni nakau maga one: nalakena tea wanogoe sara nakau waina eu da dau ki nawa wia mau eu pei tea taeana eu dowo, po pei tea nadikiana paki nakapu.

¹⁰Go taua maga ni naatam̃oli maga eu pusuusu paki nia, eu naga, Nalakena tea wanogoe auga mari nasava?

¹¹Go e pasa dara po noa ki da, e naga, Tea waina e peani sugoro dua, ega tua tea waina e dika; go tea waina e peani navinaga, ega mari ega tapala nogoe.

¹²Go tea tape nasautoga seara ma eu rumai naga euga vei tea bapetisoana, go eu noa ki nia, eu naga, Tea Vasapiseiki, auga mari nasava?

¹³Go e noa ki da, e naga, Tea waina e manimu pei tea tawonakiana kuga ta dape p̃arua liu sa mau.

¹⁴Go tea ni navakalo seara ma eu pusuusu paki nia, eu naga, Go kinami auga mari nasava? Go e noa ki da, e naga, Kuga ta mari sa ki te naata mau, go kuga ta dapepavakoto te navatuna mau, go kuga maro namoriana animu.

¹⁵Go ragi waina narei eu do leogoro, go naatam̃oli maga mamau puti eu do midoaki usiusi nap̃op̃oda nalo ni Yoane, mase nae e pei Kristo;

¹⁶Yoane e pasa dara, po noa ki puti ra, e naga, Lomau kinau a bapetiso mu ki noai; ma tea waina e kasua liu au e umai, waina natali ni nam̃elevasiana aneana maga a da p̃ia mau naga aga veresi a: nae ega wo bapetiso mu ki Naatana Tapu go ki nakapu:

¹⁷tea silaki aneana e do nam̃elearuna, naga ega mari malo wokalesue aneana ega tautau puti, go naga ega saisai ki whiit paki ekopu ni nasum̃a ni whiit aneana; ma ega wo dap̃ara ki nap̃olagana ki nakapu waina e pe ta pei tea maripunueana mau.

¹⁸Go e do pasa paratiki narei ki navasaana p̃ota laapa po do dogorogo ki narogorogoana wia paki da;

¹⁹ma Herod tetrarke, ragi waina e pei tea vasakasuakiana pae Yoane nalo ni Herodia nagoroi ki taina, go nalo ni tea sa maga mamau puti waina Herod e mari ra,

²⁰e moro sokari ra ki tea waia dap̃augoro puti ra, e kokoro Yoane ekopu ni nasum̃a ni navavaigoroana.

²¹Go e pakilina, ragi waina narei mamau eu pei tea bapetisoana sua, go Yesu ma e pei tea bapetisoana sua, go ragi waina e do dapasavasa,

²²nakoroatelagi e pamawota, go Naatana Tapu e siwo e suruoli nap̃atoko ni tokopea sikai, e umai lawo asa, go nadaleo sikai e dave nakoroatelagi umai, e naga, Nigo ku pei Natugu tea dodomiana aginau; a midoaki m̃ata ki‐go.

²³Go Yesu, ragi waina e atulake navasapiseikiana, e alagoro pei tea ni natau rualima dolu, e pei natu (eu midoa ki nia) ni Yosef, waina e pei natu ni Heli, waina e pei natu ni Matthat,

²⁴waina e pei natu ni Levi, waina e pei natu ni Nahum, waina pei natu ni Yannai, waina e pei natu ni Yosef,

²⁵waina e pei natu ni Mattathias, waina e pei natu ni Amos, waina e pei natu ni Nahum, waina e pei natu ni Esli, waina e pei natu ni Naccai,

²⁶waina e pei natu ni Maath, waina e pei natu ni Mattathias, waina e pei natu ni Semein, waina e pei natu ni Yosek,

²⁷waina e pei natu ni Yoda, waina e pei natu ni Yoanan, waina e pei natu ni Rhesa, waina e pei natu ni Serubbabel, waina e pei natu ni Shealtiel, waina e pei natu ni Neri, waina e pei natu ni Melki, waina e pei natu ni Addi,

²⁸waina e pei natu ni Kosam, waina e pei natu ni Elmadam, waina e pei natu ni Er,

²⁹waina e pei natu ni Yesus, waina e pei natu ni Elieser, waina e pei natu ni Yorim, waina e pei natu ni Matthat, waina e pei natu ni Levi, waina e pei natu ni Simeon,

³⁰waina e pei natu ni Yudas, waina e pei natu ni Yosef, waina e pei natu ni Yonam waina e pei natu ni Eliakim,

³¹waina e pei natu ni Melea, waina e pei natu ni Menna, waina e pei natu ni Mattatha, waina e pei natu ni Nathan, waina e pei natu ni David,

³²waina e pei natu ni Yesse, waina e pei natu ni Obed, waina e pei natu ni Boas, waina e pei natu ni Salmon, waina e pei natu ni Nahshon,

³³waina e pei natu ni Amminadab, waina e pei natu ni Arni, waina e pei natu ni Hesron waina e pei natu ni Yonam, waina e pei natu ni Yudah,

³⁴waina e pei natu ni Yakob, waina e pei natu ni Isaak, waina e pei natu ni Abraham, waina e pei natu ni Terah,

³⁵waina e pei natu ni Nahor, waina e pei natu ni Seruc, waina e pei natu ni Reu, waina e pei natu ni Pelec, waina e pei natu ni Eber, waina e pei natu ni Shelah, waina e pei natu ni Kainan,

³⁶waina e pei natu ni Arfaksad, waina e pei natu ni Shem, waina e pei natu ni Noah, waina e pei natu ni Lamek,

³⁷waina e pei natu ni Methuselah, waina e pei natu ni Enok, waina e pei natu ni Yared, waina e pei natu ni Mahalaleel, waina e pei natu ni Kainan,

³⁸waina e pei natu ni Enos, waina e pei natu ni Seth, waina e pei natu ni Adam, waina e pei natu ni Sup̃e.