Read Nguna Togoa Etafe North LUKA 4 Bible Online

LUKA 4 - Nguna Togoa Etafe North bible

LUKA 4

¹Go Yesu, waina e pura ki Naatana Tapu, e liliu pae Yordan po pei tea viragiana pae Naatana masop̃alo naaleatia rualima pati,

²e do pei tea maridogoana pae diabolo. Go e da gani te navatuna naaleatia maga wanogoe mau: go ragi waina eu nopu, e pitolo.

³Go diabolo e noa ki nia, e naga, Ku pe vei Sup̃e Natuna, p̃a tip̃aki vatu waia naga ega vei bred sikai.

⁴Go Yesu e pasa dara paki nia, e naga, E pei tea midiriana, naga Naatam̃oli ega wo da mauri pae bred sikina mau.

⁵Go e piragi a sake, po pisei ki nia namarakiana maga mamau puti ni maramana namata makali sikai ni ragi.

⁶Go diabolo e noa ki nia, e naga, Aga wo dua ko naveinawotaana mamau puti waia, go nasamasamaana kakada: nalakena e pei tea vituakiana paki nau; go a dua tea waina a masauna naga aga tua e asa.

⁷Nalakena tea wanogoe nigo ku pe lotu naraegu, tea mamau puti eu pe wo pei tea anigo.

⁸Go Yesu e pasa dara po noa ki nia, e naga, E pei tea midiriana, naga P̃a lotu ki Yehovah Sup̃e anigo, go p̃a maneana suasua ega sikina.

⁹Go e piragi a paki Yerusalem po lawo ki nia e lawodu tea varau pakilagi ni nasum̃a tapu, po noa ki nia, e naga, Ku pe vei Sup̃e Natuna, p̃a tum̃am̃a nadi ki‐go pae nea pakitano:

¹⁰nalakena e pei tea midiriana, naga Ega wo dip̃aki agelo aneana maga nalo kakam̃a, naga euga vavaigoro ko:

¹¹Go, Euga wo dapetape ko doko nam̃elearuda maga, Naga p̃a ta dapilagona te vatu sikai mau.

¹²Go Yesu e pasa dara po noa ki nia, e naga, E pei tea noaana, naga P̃a ta maridogo Yehovah Sup̃e anigo mau.

¹³Go ragi waina diabolo e mari sua sara namaridogoana, e m̃elu dua ki nia pano pa pa paki te ragi.

¹⁴Go Yesu e liliu pilake nakasuaana ni Naatana paki Calilea: go narogorogoana sikai nalo kakana e sokapule usuraki navanua mamau wanogoe daliviri.

¹⁵Go e do pasa piseiki ekopu ni nasum̃a ni nasaisaiana adeada maga, e pei tea samasamaniana pae tea maga mamau puti.

¹⁶Go e umai paki Nasareth, waina e pei tea vakaleana asa: go e paki ekopu ni nasum̃a ni nasaisiana naaleatia ni sabbath, pae natomariana aneana, po duleana naga ega veveve.

¹⁷Go tusi ki profeta Isaiah e pei tea vituakiana paki nia. Go e pukepiri tusi wanogoe, po pap̃ai tokora waina e pei tea midiriana asa, e naga,

¹⁸Naata ni Yehovah e doko au, Nalakena e puvurai ki nau naga aga rogorogo ki narogorogoana wia paki tea tika maga: E po dip̃aki lua au umai naga aga rogorogo ki naveresiana paki tea viragiluapavakotoana maga, Go ki namoroleosaiana paki tea kesa maga, Naga aga tip̃aki lua tea mari p̃oroworosiana maga euga vei tea veresiana pano,

¹⁹Naga aga rogorogo ki natau ni nasaup̃iaana ki Yehovah.

²⁰Go e lulu ki tusi po dua tasiga asa liliu, po dasake: go namata ni tea maga mamau puti waina eu doko ekopu ni nasum̃a ni nasaisaiana eu leo soki a.

²¹Go e pae asa noa ki da, e naga, Masoso navasaana midiriana wanogoe e po lolomana nadaligamu.

²²Go tea maga mamau puti eu maneana noa sokisoki, po maga navasaana ni nasaup̃iaana maga waina eu dave pae nawokana pano: go eu naga, Tea waia e da pei Yosef natuna kite?

²³Go e noa ki da, e naga, Kuga wo alagoro noa ki nau naluluakia waia, Naatam̃oli ni medisine, p̃a tum̃am̃a mari pauri ko: tea maga waina au po dogo ra eu pei tea mariana Kapernaum, p̃a moro mari ra tokora waia navanua anigo.

²⁴Go e naga, Lomau a noa ki mu, naga Te profeta sikai e da pei tea viragiana navanua aneana mau.

²⁵Ma a noa ki mu tea waina e pei lomau, naga Nagoroi malepu laapa eu doko Israel naaleatia maga ki Eliyah, ragi waina nakoroatelagi e p̃ono doko natau dolu go atelagi latesa, dapala navitoloana warua sikai e pakilina usuraki navanua mamau;

²⁶go Eliyah e da pei tea tip̃akiluaana pa punusi sikai kakada mau, ma e pei tea tip̃akiluaana paki Sarepta sikai maau, ni navanua ni Sidon, punusi nagoroi sikai waina e pei malepu.

²⁷Go lepero laapa eu doko Israel ragi ki profeta Elisha; go sikai kakada e da pei tea mariana e dautau mau, ma Naaman tea ni Siria e sikina pei tea mariana e dautau.

²⁸Go tea maga mamau puti waina eu doko ekopu ni nasum̃a ni nasaisaiana, ragi waina eu dogo tea maga wanogoe, eu pura ki namaritausuana;

²⁹go eu duleana, po nadi ki nia paki etaku ni natokoana, po piragi a paki narae ni tava waina natokoana adeada e pei tea tavagiana asa, naga euga nadi ki nia siwo pae napatira sikai pakitano.

³⁰Ma nae e pa duaduru m̃aleoputo kakada po surata pano.

³¹Go e siwo umai paki Kapernaum, natokoana sikai ni Calilea. Go e do pasapisei ki da naaleatia ni sabbath:

³²go eu saram̃akoto navasapiseikiana aneana; nalakena navasaana aneana e pilake naveinawotaana.

³³Go naatam̃oli sikai e doko ekopu ni nasum̃a ni nasaisaiana, waina e peani naata ni dimon loa sikai; go e pioso ki nadaleo kasua sikai.

³⁴E naga, Ako! Kinami auga kasa kigo, Yesu ni Nasareth? Ku umai naga p̃a mari punue gami kite? A atae ko, ku pei Tea Tapu ki Sup̃e.

³⁵Go Yesu e pasa kasua ki nia, po naga, P̃a vunuta, po dave umai m̃elu dua ki nia pano. Go dimon wanogoe e nadi ki nia paki natano m̃aleoputo, po dave umai m̃elu dua ki nia pano, po da mari sa ki nia mau.

³⁶Go namagaana warua e pakilina ki tea maga mamau puti, go eu saisai pasa dum̃ada paki da, po naga, Navasaana waia e pei nasava? Nalakena ki naveinawotaana go ki nakasuaana e dip̃aki naatana loa maga go eu dave umai pano.

³⁷Go narogorogoana sikai nalo kakana e sokapule paki sara tokora ni navanua wanogoe daliviri.

³⁸Go e duleana m̃elu dua ki nasum̃a ni nasaisaiana, po paki ekopu ni nasum̃a ki Simon. Go Simon anagoroi p̃ilana e pei tea vuatiana ki namasakiana warua sikai; go eu maneana pavarani a.

³⁹Go e lawodu kolovagoro e, po pasa kasua ki namasakiana wanogoe; go e marua ki nia; go e duleana m̃araverave, po madeada suasua ki navinaga.

⁴⁰Go ragi waina elo e do musu, tea maga mamau puti waina eu peani tea manainai seara ki nasasanaana visarasara maga eu piragi ra umai punusi a; go e pusake nam̃elearuna maga ara mamau puti, po mari pauri ra.

⁴¹Go dimon maga ma eu dave umai m̃elu dua ki tea laapa, eu pioso, po naga, Nigo ku pei Sup̃e Natuna. Go e pasa kasua ki da, po da suasua ki da naga euga vasa mau, nalakena eu atae naga nae e pei Kristo.

⁴²Go ragi waina e pei aleati, e dave umai po paki maso maladi sikai: go taua maga ni naatam̃oli eu laaga asa, po umai punusi a, po naga euga mauti a, naga ega ta m̃elu dua ki da pano mau.

⁴³Ma e noa ki da, e naga, E one au one naga aga rogorogo ki narogorogoana wia ni namarakiana ki Sup̃e paki natokoana p̃ota maga: nalakena a pei tea tip̃akiluana umai raki tea wanogoe.

⁴⁴Go e do dogorogo ekopu ni nasum̃a ni nasaisaiana maga ni Calilea.