Read Nguna Togoa Etafe North LUKA 7 Bible Online

LUKA 7 - Nguna Togoa Etafe North bible

LUKA 7

¹Ragi waina e mari sua navasaana aneana maga nadaliga maga ni narei, e paki Kapernaum pano.

²Go tea suasua ki senturio sikai, waina e pei anatea ri, e sasana po m̃aladigi mate.

³Go ragi waina e dogo nalo ni Yesu, e dip̃akilua tea matua seara ni naka ni Yudea eu pa punusi a, po pavarani a naga ega umai po mari pauri tea suasua aneana.

⁴Go nara, ragi waina eu rumai punusi Yesu, eu pavarani parati ki nia, eu naga, Nae e p̃ia naga p̃a maneana mari tea wanogoe:

⁵nalakena e dodomi nalauna anigida, go nae e maginami davagi nasum̃a ni nasaisaiana aginami.

⁶Go Yesu e sikoti ra pano. Go ragi waina e da uvea ki nasum̃a mau, senturio wanogoe e dip̃aki lua tana ri seara eu rumai punusi a, po noa ki nia, eu naga, Nawota, p̃a ta dum̃am̃a mari ko ki navitinuana mau: nalakena a da p̃ia mau naga p̃a umai paki ekopu ni nasum̃a aginau:

⁷nalakena tea wanogoe a da dum̃agu midoa ki nau naga a p̃ia naga aga valoti punusi ko mau: ma p̃a noa navasaana sikai, go natureai aginau ega wo pei tea maripauriana.

⁸Nalakena kinau ma a pei naatam̃oli sikai waina a pei tea lawokiana etano ki naveinawotaana, go a peani naatam̃oli ni navakalo seara etano ki nau: go a noa ki sikai, a naga, P̃a vano, go e pano; go a noa ki tea p̃ota sikai, a naga, P̃a umai, go e umai; go a noa ki tea suasua aginau, a naga, P̃a mari tea waia, go e mari a.

⁹Go ragi waina Yesu e dogo tea maga wanogoe, e maga asa, po dum̃ana doa e po noa ki taua ni naatam̃oli maga waina eu dausi a, e naga, A noa ki mu, naga A ko da pap̃ai nasaralomauana warua dapalana Israel mau.

¹⁰Go tea tip̃akiluaana maga eu liliu paki nasum̃a, po pap̃ai tea suasua wanogoe e po p̃ia.

¹¹Go e pakilina ragi edaku kiki ki nia, naga e paki natokoana sikai waina e pei tea sosoana ki Nain; go tea vasapiseikiana aneana maga eu sikoti a pano, go taua warua sikai ni naatam̃oli maga eu mamau.

¹²Go ragi waina e umai paki m̃aladigi ki namata‐pua ni natokoana wanogoe, kuga leo, tea mate sikai e pei tea tapetapeana paki etaku, natu naanoai sikedau ni p̃ilana, go nae e pei malepu: go naatam̃oli laapa ni natokoana wanogoe eu sikoti a pano.

¹³Go ragi waina Nawota e punusi a, e maritadodomi a, go e noa ki nia, E naga, P̃a ta dagi mau.

¹⁴Go e umai paki m̃aladigi po kisidogo tea waina eu dapetape asa: go tea maga waina eu dapetape a eu lawodu dorogo. Go e naga, Natureai a noa ki‐go, P̃a tuleana.

¹⁵Go tea waina e mate e doko leana, po pae asa pasa. Go e dua p̃ilana asa.

¹⁶Go namatakuana e puati tea maga mamau puti: go eu samasamani Sup̃e, po naga, Profeta warua sikai e po pakilina m̃aleoputo kakagida: go Sup̃e e po umai punusi narei aneana.

¹⁷Go narogorogoana wanogoe nalo kakana e sokapule usuraki Yudea mamau, go navanua mamau daliviri.

¹⁸Go tea vasapiseikiana maga ki Yoane eu dogorogo paki nia ki nalo ni tea maga mamau puti wanogoe.

¹⁹Go Yoane e soso tea vasapiseikiana aneana maga e dua kakada umai punusi a, po dip̃aki lua ra pa punusi Nawota, po naga, Nigo ku pei tea waina ega wo umai, kite auga leogoro tea p̃ota sikai?

²⁰Go ragi waina naatam̃oli dua wanogoe ero umai punusi a, ero naga, Yoane tea Bapetiso e po dip̃aki lua gami umai punusi ko, e naga, Nigo ku pei tea waina ega wo umai, kite auga leogoro tea p̃ota sikai?

²¹Aura wanogoe e mari pauri tea laapa m̃elu dua ki nasasanaana maga go ki tea ni navaratiana maga go ki naatana sa maga; go e dodomi tea kesa laapa ki naleosaiana.

²²Go e pasa dara po noa ki da, e naga, Koroga vano, po dogorogo paki Yoane ki tea maga waina ku po punusi ra po dogo ra; tea kesa maga eu moro leosai, tea vei pito maga eu surata, tea vei lepero maga eu pei tea mariana eu dautau, go tea p̃aro maga eu dorogo, tea mate maga eu pei tea sikeana eu duleana, tea tika maga narogorogoana wia e pei tea rogorogokiana paki da.

²³Go naata waina e pe wo da dapilagona nalo kakagu mau, e maro pa.

²⁴Go ragi waina tea tautauana maga ki Yoane ero pano sua, e pae asa noa ki taua maga ni naatam̃oli maga nalo ni Yoane, e naga, Ku dave paki masop̃alo pano naga kuga leopunusi nasava? Napati nau sikai waina e pei tea tuleakiana ki nalagi kite?

²⁵Ma ku dave pano naga kuga vunusi nasava? Naatam̃oli sikai waina e suni sugoro m̃om̃oa maga kite? Kuga leo, tea maga waina eu suni sugoro ni nasamasamaana, po gani navinaga wia liu, eu doko nasum̃a maga ki nawota maga.

²⁶Ma ku dave pano naga kuga vunusi nasava? Profeta sikai kite? Ioro, a noa ki mu asa, go tea waina e p̃arua liu profeta sikai.

²⁷Nae e pei tea waina e pei tea midiriana nalo kakana, P̃a leo, kinau a dip̃aki lua tea tautauana aginau e pea ki naraem̃a, Waina ega wo mari m̃ata ki napua anigo ega vea ki‐go.

²⁸A noa ki mu, naga Tea maga waina eu pei tea visolakiana ki nagoroi maga, sikai kakada e da p̃arua liu Yoane mau: ma tea waina e kiki namarakiana ki Sup̃e e p̃arua liu sa.

²⁹Go narei mamau ragi waina eu dogo, nara ma tea tape nasautoga maga, eu pasa leana ki Sup̃e, eu pei tea bapetisoana ki nabapetisoana ki Yoane.

³⁰Ma Farisi maga go tea ni nawotaeana maga eu dip̃adoa namidoakip̃otaeana ki Sup̃e nalo kakada, eu da pei tea bapetisoana pae asa mau.

³¹Nalakena tea wanogoe aga wo noa naga naatam̃oli maga ni tagona waia eu dakiusi nasava?

³²Go eu dakiusi sei? Eu dakiusi piakirikiri maga waina eu do natano malo ni navakokotoana, po dum̃ada pioso paki da; waina eu naga, Au manimu sui lokore, go ku da sale mau; au lalagaarova, go ku da dagi mau.

³³Nalakena Yoane tea Bapetiso e umai e da gani bred mau go e da munu waine mau; go ku naga, E peani dimon sikai.

³⁴Naatam̃oli Natuna e umai e do ganikani po munu; go ku naga, Kuga leo, naatam̃oli tuatua liu, po munu waine, tea tape nasautoga maga go tea mari naleo sa maga tada ri.

³⁵Go namanumatuaana e pei tea marileanakiana pae natuna maga mamau puti.

³⁶Go Farisi maga sikai kakada e pavarani a naga ega kanikani sikoti a. Go e paki ekopu ni nasum̃a ki Farisi wanogoe, po kere one ganikani.

³⁷Go kuga leo, nagoroi sikai waina e doko natokoana wanogoe, tea mari naleo sa sikai; go ragi waina e atae naga e kere one ganikani ekopu ni nasum̃a ki Farisi wanogoe, e dape noai ni naroro sikai ni naroro lolo umai,

³⁸go e lawodu natakuna pisari nam̃elena maga, po dagi, po pae asa pue nam̃elena maga ki naririmatana maga, go e kasi ra ki nalolu ni nap̃auna, go e dum̃idum̃ili nam̃elena maga, po puvurai ki da ki naroro lolo wanogoe.

³⁹Go ragi waina Farisi waina e sosoe, e punusi a, e dum̃ana pasa nap̃alauna, po naga, Naatam̃oli waia, e pe vei profeta sikai, e pe atae sua nagoroi waia waina e kisidogo e naga e pei sei go e dapale: nalakena e pei tea mari naleo sa.

⁴⁰Go Yesu e pasa dara po noa ki nia, e naga. Simon, a peani te navatuna waina aga noa ki‐go asa. Go e naga, Tea Vasapiseiki, p̃a noa e.

⁴¹Tea vitua ki tea seakiana sikai e doko waina naleo aneana maga eu one naatam̃oli dua: denario p̃onotia lima eu one sikai, go rualima lima eu one kerua.

⁴²Go ragi waina ero dika tea waina eroga lagati dua e asa, e madeada sokota ki da midoakikorokoro e. Nalakena tea wanogoe seve tea kakada ega wo dodomi p̃arua ki nia?

⁴³Simon e pasa dara po naga, A midoaki nia naga, tea waina e maneana midoakikorokoro p̃arua. Go e noa ki nia, e naga, Ku po pasap̃otae gara.

⁴⁴Go e dum̃ana doa e paki nagoroi wanogoe, po noa ki Simon, e naga, Ku punusi nagoroi waia? A umai paki ekopu ni nasum̃a anigo, ku da dua au noai agi nam̃elegu maga mau: ma nae e po pue nam̃elegu maga ki naririmatana maga, po kasi ra ki naloluna.

⁴⁵Ku da dua au natum̃iliana sikai mau: ma nae pae ragi waina a umai paki ekopu e do dum̃idum̃ili nam̃elegu maga, e da makoto ki nia mau.

⁴⁶Ku da puvurai ki nap̃augu ki naroro mau: ma nae e po puvurai ki nam̃elegu maga ki naroro lolo.

⁴⁷Nalakena tea wanogoe a noa ki‐go, naga Namarinaleosaana aneana maga waina eu laapa eu pei tea midoakikorokoroana; nalakena e dodomi p̃arua: ma naata waina tea kiki e maneana pei tea midoakikorokoroana, e dodomi kiki.

⁴⁸Go e noa ki nia, e naga, Namarinaleosaana anigo maga eu pei tea midoakikorokoroana.

⁴⁹Go tea maga waina eu kere one ganikani sikoti a eu pae asa noa nap̃alauda, eu naga, Naata waia e pei sei waina e midoakikorokoro namarinaleosaana maga?

⁵⁰Go e noa ki nagoroi wanogoe, e naga, Nasaralomauana anigo e po mauti pauri ko; p̃a vaki natam̃ateana pano.