Read Nguna Togoa Etafe North LUKA 8 Bible Online

LUKA 8 - Nguna Togoa Etafe North bible

LUKA 8

¹Go e pakilina ragi edaku kiki ki nia, naga e surata duaduru natokoana warua maga go natokoana kiki maga, e do dogorogo po do dogorogo ki narogorogoana wia ni namarakiana ki Sup̃e, go tea rualima sikai tamate dua eu sikoti a,

²go nagoroi seara waina eu pei tea maripauriana sua m̃elu dua ki naatana sa maga go nasasanaana maga eu mamau, Maria waina e pei tea sosoana ki Macdalene, waina dimon larua eu dave m̃elu dua ki nia pano,

³go Yoanna nagoroi ki Kusa tasiga ki Herod, go Susanna, go tea p̃ota laapa, waina eu madeada suasua ki naloriki adeada maga.

⁴Go tea vasapiseikiana aneana maga eu pusuusu paki nia, eu naga, ni sara natokoana eu rumai punusi a, e pasa pae naluluakia sikai:

⁵Tea sapuraki e dave pano naga ega sapuraki napati ni nawa ni nakau aneana: go ragi waina e do sapuraki, te seara e dowo pisari napua; go e pei tea vasiana, go manu ni nakoroatelagi eu dadinomi a.

⁶Go tea p̃ota seara e dowo paki vatu laketoko; go e ulua po kokolo, nalakena e dika namelumeluana.

⁷Go tea p̃ota seara e dowo m̃aleoputo ni tea makalikali maga; go tea makalikali maga eu ulua sari a, po mari a e dodo.

⁸Go tea p̃ota seara e dowo sili natano wia, po ulua, po mari nawana paka p̃onotia sikai. E noa tea maga wanogoe, po pioso, e naga, Tea waina e pilake nadaliga maga naga ega rogo, ega rogo.

⁹Go tea vasapiseikiana aneana maga eu pusuusu paki nia, eu naga, Naluluakia wanogoe e pei nasava?

¹⁰Go e naga, E pei tea vituakiana paki mu naga kuga atae p̃aia maga ni namarakiana ki Sup̃e: ma e pei tea vituakiana paki tea p̃ota maga pae naluluakia maga; naga tea waina eu leosai euga ta leosai mau, go naga tea waina eu dogo euga ta midoaki atae mau.

¹¹Ma naluluakia wanogoe e pei tea waia: Napati ni nawa ni nakau e pei navasaana ki Sup̃e.

¹²Go tea visari napua eu pei tea maga waina eu dogo; go diabolo e edaku umai, po dapelua navasaana m̃elu dua ki nap̃op̃oda, naga euga ta saralomau po da pei tea mautipauriana mau.

¹³Go tea one vatu laketoko eu pei tea maga waina, ragi waina eu dogo, eu dape navasaana po laelaea; go nara eu dika nakoada, waina eu saralomau ragi kiki, go ragi ni namaridogoana eu m̃elu pano.

¹⁴Go tea waina e dowo m̃aleoputo ni tea makalikali maga, nara eu pei tea maga waina eu dogo, go eu pano po dodo ki namidoakiparatikiana maga go ki nasogolapaana maga go ki namaroana maga ni namauriana waia, po da dau ki nawada matua seara mau.

¹⁵Go tea ni natano wia, nara eu pei tea maga waina eu dogo navasaana ki p̃op̃o lomau go wia, go eu dape soki a, po dau ki nawada pilake nasokiana.

¹⁶Go te naata sikai, ragi waina e dokoni nasulu sikai, e da dap̃augoro e ki lasa sikai mau, go e da lawo ki nia etano ni nawewele sikai mau; ma e lawo ki nia naliana, naga tea maga waina eu paki ekopu euga vunusi namarama.

¹⁷Nalakena te navatuna sikai e da pei tea surukiana mau, waina ega wo da pei tea mariana ega toko lina mau; go te navatuna sikai e da sili mau, waina ega wo da pei tea ataeana mau po umai paki lina.

¹⁸Nalakena tea wanogoe kuga leo paratiki dapala waina kuga rogo: nalakena naata waina e peani, ega wo pei tea vituakiana paki nia; go naata waina e da peani mau, tea waina e midoaki nia naga e peani a ega wo pei tea tapeluaana kiana.

¹⁹Go p̃ilana go taina maga eu rumai punusi a, go eu mari sa duasai ki nia nalakena taua ni naatam̃oli maga.

²⁰Go e pei tea rogorogokiana paki nia, P̃ilam̃a go taim̃a maga eu lawodu katama, eu masauna naga euga vunusi ko.

²¹Ma e pasa dara po noa ki da, e naga, P̃ilagu go taigu maga eu pei tea maga waia waina eu dogo navasaana ki Sup̃e, po mari a.

²²Go e pakilina naaleatia maga wanogoe sikai kakada, naga nae e pagi rarua sikai, go tea vasapiseikiana aneana maga eu mamau; go e noa ki da, e naga, Tuga tuagoto paki taleva kerua ni namarourou: go eu sai ki rarua pano.

²³Ma ragi waina eu do porau e maturu: go nalagi atu sikai e siwo umai paki namarourou; go teu do m̃oru, po naga teuga mate.

²⁴Go eu rumai punusi a, po pulevule a, po naga, Nawota, nawota, tauga mate. Go e darapa, po pasa kasua ki nalagi go ki napeao maga ni noai: go eu matadorogo, go e dam̃ate.

²⁵Go e noa ki da, e naga, Nasaralomauana animu wai? Go eu mataku po maga, po dum̃ada noa paki da, eu naga, Naata waia e pei sei, waina e dip̃a ki nalagi maga go noai, go eu dogo parati ki nia?

²⁶Go eu porau paki navanua ki naka ni Cerasa, waina e doko kivea ki Calilea.

²⁷Go ragi waina e umai paki euta sua, naatam̃oli sikai ni natokoana wanogoe e sua e, waina e peani dimon maga; go ragi varau e da suni te sugoro seara mau, go e da doko ekopu ni te nasum̃a mau, ma e doko ekopu ni matigo maga.

²⁸Go ragi waina e punusi Yesu, e pioso, po dowo pakitano naraena, po noa ki nadaleo kasua sikai, e naga, Aga kasa ki‐go Yesu, Natu ni Sup̃e Vakilagi Mau? A pavarani ko, p̃a ta mari au aga vitinu mau.

²⁹Nalakena e dip̃aki naatana loa wanogoe naga ega tave umai m̃elu dua ki naatam̃oli wanogoe pano. Nalakena e pua soki a ragi laapa: go e pei tea vavaigoroana, go tea soliana ki namori ni vatu maga go ki tea moti nam̃elena maga; go e mari kotovi natali maga, po pei tea tigoana pae dimon wanogoe paki maso maladi maga.

³⁰Go Yesu e pusuusu paki nia, e naga, Nagisam̃a sei? Go e naga, Leceon; nalakena dimon laapa eu paki nap̃alauna.

³¹Go eu pavarani a naga ega ta dip̃aki da naga euga vaki nam̃orua pano mau.

³²Go navata sikai ni wago laapa eu doko tokora wanogoe eu do ganikani tava: go eu pavarani a naga ega suasua ki da naga euga vaki nap̃alauda pano. Go e suasua ki da.

³³Go dimon maga eu dave m̃elu dua ki naatam̃oli wanogoe umai, po paki nap̃alau ni wago maga pano: go navata eu sava siwo napatira paki namarourou, po suapunu.

³⁴Go ragi waina tea maga waina eu do pagani ra eu punusi tea waina e pakilina, eu sava pano, po dogorogo ki nia natokoana go navanua.

³⁵Go eu dave pano naga euga vunusi tea waina e pakilina; go eu rumai punusi Yesu, po pap̃ai naatam̃oli, waina dimon maga eu dave m̃elu dua ki nia pano, e do natano pisari nam̃ele ni Yesu, e pei tea sugoroana po midodoa p̃ia: go eu mataku.

³⁶Go tea maga waina eu punusi a eu dogorogo paki da ki dapala waina tea waina e pei dimon e pei tea maripauriana.

³⁷Go naatam̃oli maga mamau puti ni navanua ki naka ni Cerasa daliviri eu pavarani a naga ega m̃elu dua ki da pano; nalakena eu pei tea vuatiana ki namatakuana warua: go nae e pagi rarua sikai, po liliu umai.

³⁸Ma naatam̃oli waina dimon maga eu dave m̃elu dua ki nia pano e pavarani a naga ega sikoti a doko: ma e dip̃aki lua e, po naga, P̃a liliu paki nasum̃a anigo,

³⁹po dogorogo ki tea warua maga waina Sup̃e e po manigo mari ra. Go e pano, po dogorogo usuraki natokoana wanogoe mamau ki tea warua maga waina Yesu e maneana mari ra.

⁴⁰Go ragi waina Yesu e liliu umai, taua ni naatam̃oli maga eu piragi parati ki nia; nalakena eu mamau puti do leogoro asa.

⁴¹Go kuga leo, naatam̃oli sikai e umai, nagisana Yairo, go e pei tea maraki sikai ni nasum̃a ni nasaisaiana: go e dowo pakitano pisari nam̃ele ni Yesu, po pavarani a naga ega umai paki ekopu ni nasum̃a aneana;

⁴²nalakena e peani natuna nagoroi sikedau, e alagoro pei tea ni natau rualima sikai tamate dua, go nae e m̃aladigi mate. Ma ragi waina e do pano taua maga ni naatam̃oli maga eu sogosogoni a.

⁴³Go nagoroi sikai waina e dape nada varau natau rualima sikai tamate dua, waina e sori puti naleo ni namauriana aneana raki naatam̃oli maga ni medisine, po mari sa pei tea maripauriana pae te naata, e umai paki natakuna,

⁴⁴po kisidogo narepu ni sugoro aneana: go nada varau aneana e makoto m̃araverave.

⁴⁵Go Yesu e naga, Sei waina e kisidogo au? Go ragi waina tea maga mamau puti eu pasagoro, Petero, go tea maga waina eu sikoti a doko, eu naga, Nawota, taua maga ni naatam̃oli maga eu sogosogoni ko po diesoki ko.

⁴⁶Ma Yesu e naga, Te naata sikai e kisidogo au: nalakena kinau a atae naga nakasuaana e dave m̃elu dua ki nau pano.

⁴⁷Go ragi waina nagoroi wanogoe e punusi naga e da doko loku mau, e duruuru umai, po dowo pakitano naraena, po dogorogo narae ni narei mamau ki tea waina e pei nalakena e kisidogo e, go ki dapala waina e pei tea maripauriana m̃araverave.

⁴⁸Go e noa ki nia, e naga, Lei, nasaralomauana anigo e po maripauri ko; p̃a vaki natam̃ateana pano.

⁴⁹Ragi waina e ko do pasa, naata sikai e pae nasum̃a ki tea maraki wanogoe umai, e naga, Natum̃a nagoroi e mate; p̃a ta mari navitinuana paki Tea Vasapiseiki mau.

⁵⁰Ma Yesu e dogo e, po pasa dara e, e naga, P̃a ta mataku mau: p̃a saralomau sikai maau, go ega wo pei tea maripauriana.

⁵¹Go ragi waina e umai paki nasum̃a e da suasua ki te naata mau naga ega sikoti a paki ekopu, ma e suasua ki Petero, go Yoane, go Yakobo, go koroi kiki tamana go p̃ilana eu sikida.

⁵²Go tea maga mamau puti eu do dagi, po do lalagaarova asa: ma e naga, Kuga ta dagi mau; nalakena e da mate mau, ma e maturu.

⁵³Go eu muru ki nia, eu atae naga e mate.

⁵⁴Ma nae e puati nam̃elearuna, po pioso, po naga, Koroi kiki, p̃a tuleana.

⁵⁵Go naatana e liliu, go e duleana m̃araverave: go e pitip̃aki naga euga tua e ega kanikani.

⁵⁶Go tamana go p̃ilana ero saram̃akoto: ma e pasa parati ki da naga eroga ta noa ki te naata mau tea waina e pei tea mariana.