Read Nguna Togoa Etafe North DEUTERONOMY 10 Bible Online

DEUTERONOMY 10 - Nguna Togoa Etafe North bible

DEUTERONOMY 10

¹Ragi wanogoe Yehovah e noa ki nau, e naga, P̃a manigo dae tea welewelea dua ni vatu dakiusi tea vea, go p̃a sake umai punusi au tava, go p̃a manigo mari areka sikai ni nakau.

²Go aga wo midiri doko tea welewelea dua wanogoe navasaana maga waina eu doko tea welewelea dua vea waina ku mari p̃oraworae ra, go p̃a toropusi ra eroga toko nawoka ni areka.

³Go dapala nogoe a mari areka sikai ni nakau akasia, go a dae tea welewelea dua ni vatu dakiusi tea vea, go a dape vatu welewelea dua wanogoe ero doko nam̃elearugu po sake paki tava pano.

⁴Go e midiri doko vatu welewelea dua dapala namidiriana vea, navasaana rualima sikai waina Yehovah e noa ki mu ara tava m̃elu m̃aleoputo ni nakapu vavaga naaleatia ni nasaisaiana: go Yehovah e dua au ara.

⁵Go a dum̃agu doa au po siwo pae tava umai, po doropusi vatu welewelea dua wanogoe ero doko areka waina a po mari a; go ero doko asa doko, dapala waina Yehovah e dip̃aki nau asa.

⁶(Go Israel natuna maga eu surata nasurataana adeada pae Beeroth Bene‐yaakan paki Moserah: tokora wanogoe Aaron e mate asa, go e pei tea ovakiana asa; go natuna Eleaser e pei tea viri du oli a.

⁷Go pae tokora wanogoe eu moro surata paki Cudcodah; go pae Cudcodah paki Yotbathah, navanua ni nap̃ap̃a maga ni noai.

⁸Ragi wanogoe Yehovah e mari masale ki naworawora ni Levi, naga euga tapetape areka ni navasasokiana ki Yehovah, naga euga lawodu narae ni Yehovah po maneana suasua, go naga euga vasa m̃ata ki pae nagisana, pa pa paki naaleatia waia.

⁹Nalakena tea wanogoe Levi e da peani te matele sikai kite tea veanipiolikiana sikoti taina maga mau; Yehovah e pei tea veanipiolikiana aneana, dapala waina Yehovah Sup̃e anigo e noa ki nia asa.)

¹⁰Go a doko tava doko dapala sala vea, naaleatia rualima pati go nap̃ogiana rualima pati: go Yehovah e moro daki dorogo paki nau; go Yehovah ega ta mari puoli ki mu mau.

¹¹Go Yehovah e noa ki nau, e naga, P̃a tuleana, p̃a surata nasurataana anigo pea ki narei; go euga wo sili po peani navanua waina a pivisa paki tamada maga naga aga tua ra asa.

¹²Go ragi waia, Israel O, nasava Yehovah Sup̃e anigo e masauna pae ako, ma naga p̃a matau ki Yehovah Sup̃e anigo, po surata napua aneana maga mamau puti, po dodomi a, po magi Yehovah Sup̃e anigo suasua ki nap̃op̃om̃a mamau go ki naatam̃a mamau,

¹³Po dogo parati ki natip̃akiana maga ki Yehovah, go natawonakiana aneana maga, waina a dip̃aki‐go ara naaleatia waia naga ega wia ki‐go?

¹⁴P̃a leo, nakoroatelagi, go nakoroatelagi ni nakoroatelagi maga, go maramana, pilake sara naleo waina eu doko ara doko, eu pei agi Yehovah Sup̃e anigo.

¹⁵Ma Yehovah e midoaki m̃ata ki tamam̃a maga, po dodomi ra, go e matadoa naworaworada edaku ki da, io nimu, m̃elu dua ki nalauna maga mamau puti, dapala waina e doko naaleatia waia.

¹⁶Nalakena tea wanogoe kuga tovadavivi nawili vea ni nap̃op̃omu, go kuga ta moro pei tea noa kasua mau.

¹⁷Nalakena Yehovah Sup̃e animu, nae e pei Sup̃e ki sup̃e maga, go Nawota ki nawota maga, Sup̃e warua, tea kasua maau, go tea mataukiana, waina e da pei tea viragi narae mau, go e da dape namoriana ni ruku mau.

¹⁸E do magi namatapesu go nagoroi malepu mari navasap̃otaeana, e do dodomi nam̃enaki po do dua e navinaga go tea suniana.

¹⁹Nalakena tea wanogoe kuga dodomi nam̃enaki: nalakena nimu ku pea pei nam̃enaki maga doko navanua ni Ityipt.

²⁰P̃a matau ki Yehovah Sup̃e anigo; p̃a maneana suasua; go p̃a vuluti a, po pivisa pae nagisana.

²¹Nae e pei nasamasamaana anigo, go nae e pei Sup̃e anigo, waina e manigo mari naleo warua go mataukiana maga waia, waina namatam̃a ero punusi sua ra.

²²Tamam̃a maga eu siwo paki Ityipt pano, eu pei naatam̃oli rualima larua; go ragi waia Yehovah Sup̃e anigo e po mari ko ku laapa dapala m̃asoe maga ni nakoroatelagi.