Read Nguna Togoa Etafe North DEUTERONOMY 11 Bible Online

DEUTERONOMY 11 - Nguna Togoa Etafe North bible

DEUTERONOMY 11

¹Nalakena tea wanogoe p̃a dodomi Yehovah Sup̃e anigo, po pavaigoro nanoaana aneana, go natawonakiana aneana maga, go navasap̃otaeana aneana maga, go natip̃akiana aneana maga sara ragi.

²Go p̃a atae, naaleatia waia: nalakena a da pasa paki natumu maga waina eu da atae a mau, go waina eu da punusi navaratipiseikiana ki Yehovah Sup̃e animu mau, nawaruaana aneana, nam̃elearuna kasua, go naruna saikiana.

³Go navaivaiana aneana maga, go nawosiana aneana maga, waina e mari ra m̃aleoputo ni Ityipt paki Faraoh nawota ni Ityipt, go paki navanua aneana mamau;

⁴Go tea waina e mari a paki naatam̃oli maga ni navakalo ni Ityipt, go paki horse adeada maga, go kariot adeada maga; go takana waina e mari noai ni Natasi Miala e dap̃augoro ra ragi waina eu kopasi mu, go takana waina Yehovah e mari puoli ki da pa pa paki naaleatia waia;

⁵Go tea waina e mari a paki mu masop̃alo, pa pa ku umai paki tokora waia;

⁶Go tea waina e mari a paki Dathan go Abiram, natu ni Eliab, natu ni Reuben; takana waina natano e maaga po dinomi ra, nara ma tea ni nasum̃a adeada maga, go tap̃aup̃au adeada maga, go sara nalo mauri waina eu dausi ra, doko m̃aleoputo ni Israel mamau:

⁷Ma nimu namatamu maga eu po leo punusi nawosiana warua mamau ki Yehovah waina e mari a.

⁸Nalakena tea wanogoe kuga rogo parati ki natip̃akiana mamau waina a dip̃aki‐go asa naaleatia waia, naga kuga kasua po sili pano, po peani navanua, tokora waina kuga wo duagoto asa pano po peani a;

⁹Go naga naaleatia animu maga euga laapa navanua waina Yehovah e pivisa asa paki tamamu maga naga ega tua ra go ega tua naworaworada maga asa, navanua waina e do sara ki milk go ki honi.

¹⁰Nalakena navanua waina p̃a wo sili paki asa pano po peani a, e da dapala navanua ni Ityipt mau, tokora waina ku m̃elu pae asa umai, tokora waina ku sapura ki napati anigo asa po dae nasalep̃ap̃a ki natuam̃a, dapala e pei roara ni nataputea kaniana:

¹¹Ma navanua waina kuga wo duagoto asa pano po peani a, e pei navanua ni tava maga go ni nap̃aloa maga, waina e do munu noai ni usa ni nakoroatelagi:

¹²Navanua waina Yehovah Sup̃e anigo e do midoaki parati ki nia; namata ni Yehovah Sup̃e anigo ero doko asa sara ragi, pae naatulakeana ni natau pa pa paki nanopuana kakana.

¹³Go ega wo pakilina, waina ku pe m̃arekareka dogo parati ki natip̃akiana aginau maga waina a dip̃aki mu ara naaleatia waia, po dodomi Yehovah Sup̃e animu, po maneana suasua ki nap̃op̃omu mamau go ki naatamu mamau,

¹⁴Naga aga wo pitua ki usa ni navanua animu ragi kakana, usa vea go usa edaku, naga p̃a wo pila daua ki korn anigo, go waine anigo, go naroro anigo.

¹⁵Go aga wo pitua ki nam̃enau doko vanua anigo maga raki katel anigo, go p̃a wo ganikani po puka.

¹⁶Kuga tum̃amu pavaigoro mu, mase nap̃op̃omu e pe vei tea vilasurueana, go ku pe tawasi, po magi sup̃e p̃ota maga suasua, po lotu ki da;

¹⁷Go namaetoana ki Yehovah e pe vavaga dip̃a mu, go e pe wogoro nakoroatelagi naga usa ega ta powo mau, go naga navanua ega ta pitua ki nawana mau; go mase ku pe mate puoli m̃araverave pa dua ki navanua wia waina Yehovah e dua mu asa.

¹⁸Nalakena tea wanogoe kuga vaisoki navasaana aginau maga waia doko nap̃op̃omu go doko naatamu; go kuga solisoki ra doko nam̃elearumu euga vei navaivaiana sikai, go euga vei tea tokorae maga namawota ni namatamu maga.

¹⁹Go kuga vasa pisei ki natumu maga ara, doko do pasa nalo kakada ragi waina p̃a wo dasake doko nasum̃a anigo, go ragi waina p̃a wo surata napua, go ragi waina p̃a wo one natano, go ragi waina p̃a wo duleana.

²⁰Go p̃a midiri ra nakautu maga ni nasum̃a anigo, go namata‐pua anigo maga:

²¹Naga naaleatia anigo maga euga risu po laapa, go naaleatia maga ki natumu maga, doko navanua waina Yehovah e pivisa asa paki tamamu maga naga ega tua ra asa, dapala naaleatia maga ni nakoroatelagi maga elagi ni maramana.

²²Go waina ku pe rogo parati ki m̃ata ki natip̃akiana mamau waia waina a dip̃aki mu asa, po mari a; naga kuga dodomi Yehovah Sup̃e animu, po surata napua aneana maga mamau puti, po puluti a;

²³Ragi wanogoe Yehovah ega wo kopasi lua nalauna maga mamau puti wanogoe pa dua ki naraemu, go kuga wo peani pioli ki nalauna maga waina eu p̃arua go eu kasua liu mu.

²⁴Sara tokora waina nam̃ele ni natuamu ega vasi a, ega vei animu. Pae masop̃alo, go Lebanon, pae noaisara, noaisara Eufrates, pa pa paki natasi paki elo musu, ega vei kokoi animu.

²⁵Te naata sikai ega wo da mariatae lawodu naraemu mau: Yehovah Sup̃e animu ega wo doropusi namatauki‐mu‐ana go namatakilakila‐ki‐mu‐ana usuraki navanua mamau waina kuga wo pasi a, dapala waina e po noa ki mu asa.

²⁶Kuga leo, naaleatia waia a doropusi navasap̃iakiana sikai go navasasakiana sikai naraemu;

²⁷Navasap̃iakiana waina ku pe rogo parati ki natip̃akiana maga ki Yehovah Sup̃e animu, waina kinau a dip̃aki mu ara naaleatia waia:

²⁸Go navasasakiana waina ku pe ta dogo parati ki natip̃akiana maga ki Yehovah Sup̃e animu mau, go ku pe tawasi pa dua ki napua waina kinau a dip̃aki mu asa naaleatia waia, po surata dausi sup̃e p̃ota maga, waina ku da pea atae ra mau.

²⁹Go ega wo pakilina, ragi waina Yehovah Sup̃e anigo ega wo piragi ko paki navanua waina p̃a vaki asa pano po peani a, naga p̃a wo doropusi navasap̃iakiana ega toko tava Cerisim, go navasasakiana ega toko tava Ebal.

³⁰Nara ero da doko taleva kerua ni Yordan, etaku ni napua ni elo musu, navanua ki naworawora ni Kanaan waina eu doko Arabah, kivea ki Cilcal, pisari oak maga ni Moreh, kite?

³¹Go kuga wo duagoto Yordan po sili pano, po peani navanua waina Yehovah Sup̃e animu e dua mu asa, go kuga wo peani a, po doko asa doko.

³²Go kuga vavaigoro po mari natawonakiana maga mamau puti, go navasap̃otaeana maga waina a doropusi ra eu doko naraemu naaleatia waia.