Read Nguna Togoa Etafe North DEUTERONOMY 12 Bible Online

DEUTERONOMY 12 - Nguna Togoa Etafe North bible

DEUTERONOMY 12

¹Tea maga waia eu pei natawonakiana maga go navasap̃otaeana maga, waina kuga vavaigoro po mari ra navanua waina Yehovah Sup̃e ki tamam̃a maga e po dua ko asa naga p̃a veani a naaleatia maga mamau puti waina ku mauri doko maramana.

²Kuga mari sasa ki puti tokora maga ki nalauna maga waina kuga veani ra tokora maga waina eu magi sup̃e adeada maga suasua asa, doko tava vakilagi maga, go doko tava sula maga, go doko nalake ni sara nakau malakesa:

³Go kuga rakai wede ni naviriana adeada maga, po p̃okap̃oraworae tea lawodu adeada maga, po dap̃ara ki Asherah adeada maga; go kuga takotokotovi nasup̃e taeana maga ni sup̃e adeada maga; go kuga mari puoli ki nagisada pa dua ki tokora wanogoe:

⁴Kuga wo da mari dapala nogoe paki Yehovah Sup̃e animu mau.

⁵Ma paki tokora waina Yehovah Sup̃e animu ega matadoa e m̃elu dua ki nalauna animu maga mamau puti naga nagisana ega toko asa, pa pa paki natokoana aneana, kuga laaga asa, go tokora wanogoe kuga vaki asa:

⁶Go paki tokora wanogoe kuga viragi navituaana tap̃arakiana animu maga umai, go naviriana animu maga, go kekerualima animu maga, go navituaana sikosikoviana ni nam̃elearumu, go nasaiana animu maga, go navituaana suasuakiana animu maga, go takavea ni navata ni katel animu maga, go ni navata ni shiip animu maga:

⁷Go tokora wanogoe kuga kanikani asa narae ni Yehovah Sup̃e animu, go kuga laelaea sara naleo waina kuga toropusi nam̃elearumu asa, nimu ma tea ni nasum̃a animu maga waina Yehovah Sup̃e anigo e pasa p̃ia ki‐go asa.

⁸Kuga ta mari dakiusi waina nigida tu do mari a tokora waia naaleatia waia mau, waina sara naata e do mari tea waina e leana namatana.

⁹Nalakena ku ko da umai paki namaromaroana go naveanipiolikiana waina Yehovah Sup̃e anigo e dua ko asa.

¹⁰Ma ragi waina kuga wo duagoto Yordan pano, po doko navanua waina Yehovah Sup̃e animu e mari mu naga kuga veani pioli ki nia, go ragi waina ega tua mu namaromaroana pa dua ki tea kokona ki mu maga daliviri, dapala waina kuga wo doko natokop̃iaana;

¹¹Ragi wanogoe ega wo pakilina naga tokora waina Yehovah Sup̃e animu ega matadoa e naga nagisana ega toko asa, tokora wanogoe kuga viragi sara naleo umai waina aga tip̃aki mu ara; navituaana tap̃arakiana animu maga, go naviriana animu maga, go kekerualima animu maga, go navituaana sikosikoviana ni nam̃elearumu, go nasaiana wia animu maga mamau puti waina ku sai ra paki Yehovah:

¹²Go kuga laelaea narae ni Yehovah Sup̃e animu, nimu ma natumu naanoai maga, go natumu nagoroi maga, go tea suasua naanoai animu maga, go tea suasua nagoroi animu maga, go tea ni naworawora ni Levi waina e doko roara ni namata‐pua animu maga, nalakena nae e da peani te matele sikai, kite te naveanipiolikiana sikai sikoti mu mau.

¹³P̃a tum̃am̃a pavaigoro ko naga p̃a ta pitua ki navituaana tap̃arakiana anigo maga sara tokora waina namatam̃a ega leo punusi a:

¹⁴Ma doko tokora waina Yehovah ega matadoa e ki naworaworam̃a maga sikai kakada, tokora wanogoe p̃a vitua ki navituaana tap̃arakiana anigo maga asa, go tokora wanogoe p̃a mari puti tea waina a dip̃aki‐go asa.

¹⁵Go p̃a wo maripunue po gani nap̃okasi roara ni namata‐pua anigo maga, pataka ni namasauana anigo, dapala navasap̃iakiana ki Yehovah Sup̃e anigo waina e dua ko asa: tea waina e da dautau go tea waina e dautau euga kanikani asa, dapala waina eu gani kasel kite hart.

¹⁶Ma p̃a ta gani nada mau; p̃a taki nia natano dapala noai.

¹⁷P̃a ta gani kekerualima ni korn anigo mau, roara ni namata‐pua anigo maga, kite ki waine anigo, kite ki naroro anigo, kite takavea ni navata ni katel anigo go navata ni shiip anigo, go ki te nasaiana anigo maga waina ku sai ra, go ki navituaana suasuakiana anigo maga, go ki navituaana sikosikoviana ni nam̃elearum̃a:

¹⁸Ma p̃a kani ra narae ni Yehovah Sup̃e anigo tokora waina Yehovah Sup̃e anigo ega matadoa e, nimu ma natum̃a naanoai, go natum̃a nagoroi, go tea suasua naanoai anigo, go tea suasua nagoroi anigo, go tea ni naworawora ni Levi waina e doko roara ni namata‐pua anigo maga: go p̃a wo laelaea narae ni Yehovah Sup̃e anigo ki sara naleo waina p̃a wo doropusi nam̃elearum̃a asa.

¹⁹P̃a tum̃am̃a pavaigoro ko naga p̃a ta doropusi tea ni naworawora ni Levi mau naaleatia maga waina ku mauri doko navanua anigo.

²⁰Ragi waina Yehovah Sup̃e anigo eag wo mari kokoi anigo ega wo p̃arua, dapala waina e sai a paki‐go, go p̃a wo naga, Aga kani nap̃okasi, nalakena ku masau naga p̃a kani nap̃okasi; p̃a wo gani nap̃okasi pataka ni namasauana anigo.

²¹Go tokora waina Yehovah Sup̃e anigo ega matadoa e naga nagisana ega toko asa e pe toko uvea ki‐go, ragi wanogoe p̃a wo maripunue ki navata ni katel anigo go ki navata ni shiip anigo, waina Yehovah e po dua ko ara, dapala waina e dip̃aki‐go asa, go p̃a wo ganikani asa roara ni namata‐pua anigo maga, pataka ni namasauana anigo.

²²Dapala waina kasel go hart ero pei tea kaniana, dapala nogoe p̃a kanikani asa: tea waina eu da dautau go tea waina eu dautau euga kanikani asa ega vataka sikai.

²³Ma p̃a vei lomau naga p̃a ta gani nada mau: nalakena nada e pei namauriana; go p̃a ta gani namauriana mau pilake nap̃okasi.

²⁴P̃a ta gani a mau; p̃a taki nia natano dapala noai.

²⁵P̃a ta gani a mau; naga ega wia ki‐go, go ki natum̃a maga edaku ki‐go, ragi waina p̃a wo mari tea waina e leana namata ni Yehovah.

²⁶Ma tea tapu anigo maga waina ku peani ra, go nasaiana anigo maga, p̃a tape ra po pano paki tokora waina Yehovah ega matadoa e:

²⁷Go p̃a vitua ki navituaana tap̃arakiana maga, nap̃okasi go nada, wede ni naviriana ki Yehovah Sup̃e anigo: go nada ni naviriana anigo maga ega wo pei tea takiana wede ni naviriana ki Yehovah Sup̃e anigo, go p̃a wo gani nap̃okasi.

²⁸P̃a midoaki parati ki po dogo navasaana maga mamau puti waia waina a dip̃aki‐go ara, naga ega wia ki‐go, go ki natum̃a maga edaku ki‐go pa pa po du mau du, ragi waina p̃a wo mari tea waina e p̃ia go e leana namata ni Yehovah Sup̃e anigo.

²⁹Ragi waina Yehovah Sup̃e anigo ega taelua nalauna maga pa dua ki naraem̃a, tokora waina p̃a wo paki asa pano po peani ra, go p̃a wo peani ra po doko navanua adeada doko:

³⁰P̃a tum̃am̃a pavaigoro ko naga p̃a ta pei tea viragisasap̃okiana mau dakiusi ra, edaku ki naga eu pei tea maripuolikiana pa dua ki naraem̃a; go naga p̃a ta pusuusu mau nalo ni sup̃e adeada maga, po naga, Nalauna maga waia eu do mari nasava po magi sup̃e adeada maga suasua? Go kinau ma aga wo mari dapala nogoe.

³¹P̃a ta mari ega tapala nogoe paki Yehovah Sup̃e anigo mau: nalakena sara namamaragokiana paki Yehovah waina e pilosi ra, nara eu po mari ra paki sup̃e adeada maga; go eu do dap̃ara ki natuda naanoai maga go natuda nagoroi maga ki nakapu paki sup̃e adeada maga.

³²Tea waina a dip̃aki‐go asa, tea wanogoe p̃a vavaigoro po mari a; p̃a ta sokari a mau, go p̃a ta dape lua seara kakana mau.