Read Nguna Togoa Etafe North DEUTERONOMY 13 Bible Online

DEUTERONOMY 13 - Nguna Togoa Etafe North bible

DEUTERONOMY 13

¹Waina profeta sikai e pe tuleana m̃aleoputo kakam̃a, kite tea p̃erea ki nap̃erea maga, go e pe tua ko navaivaiana sikai kite tea ni namagaana sikai,

²Go navaivaiana wanogoe kite tea ni namagaana wanogoe e pe vakilina, waina e pasa asa paki‐go, po naga, Tuga rausi sup̃e p̃ota maga, waina ku da atae ra mau, go tuga madeada suasua;

³P̃a ta dogo parati ki navasaana ki profeta wanogoe mau, kite ki tea p̃erea ki nap̃erea maga wanogoe: nalakena Yehovah Sup̃e animu e do maridogo mu naga ega atae naga ku dodomi Yehovah Sup̃e animu ki nap̃op̃omu mamau go ki naatamu mamau, kite e pe tika.

⁴Kuga surata dausi Yehovah Sup̃e animu po matau ki nia, po pavaigoro natip̃akiana aneana maga, po dogo parati ki nadaleona, go kuga maneana suasua po puluti a.

⁵Go profeta wanogoe, kite tea p̃erea ki nap̃erea maga wanogoe, ega wo pei tea maripunueana; nalakena e pasa p̃auluulu dip̃a Yehovah Sup̃e animu, waina e piragi lua mu m̃elu dua ki navanua ni Ityipt umai, po daulua ko m̃elu dua ki nasum̃a ni naviti, naga ega vualua ko m̃elu dua ki napua waina Yehovah Sup̃e anigo e dip̃aki‐go asa naga p̃a wo surata asa. Go dapala nogoe p̃a wo mari puoli ki tea sa pa dua ki m̃aleoputo kakam̃a.

⁶Waina taim̃a, natu ni p̃ilam̃a, e pe surue ko pei p̃aia, kite natum̃a naanoai, kite natum̃a nagoroi, kite nagoroi ki narum̃am̃a, kite tam̃a waina e doko dapala naatam̃a, po naga, Tuga vano po magi sup̃e p̃ota maga suasua, waina nigo ku da atae ra mau, nigo go tamam̃a maga;

⁷Sup̃e maga seara ki narei maga waina eu dalivirigoro mu, doko m̃aladigi ki‐go, kite uvea ki‐go, pae namatap̃ago sikai ni maramana pa pa paki namatap̃agona kerua;

⁸P̃a ta suasua asa mau, go p̃a ta daki dorogo paki nia mau; go namatam̃a ega ta maritadodomi a, go p̃a ta mari malemale a mau, go p̃a ta dasuru ki nia mau:

⁹Ma p̃a maripunue a; nam̃elearum̃a ega vei tea vea doko asa po atugi a ega mate, go nam̃elearu ni narei maga mamau puti euga wo edaku.

¹⁰Go p̃a nadi a ki vatu maga, naga ega mate; nalakena e maridogo pualua ko pa dua ki Yehovah Sup̃e anigo, waina e piragi lua ko m̃elu dua ki navanua ni Ityipt umai, m̃elu dua ki nasum̃a ni naviti.

¹¹Go Israel mamau euga wo dogo po mataku, po da moro mari te nasigisigileoana sikai dapala nogoe mau m̃aleoputo kakam̃a.

¹²Waina ku pe rogo narogorogoana sikai natokoana anigo maga sikai kakada, waina Yehovah Sup̃e anigo e dua ko asa naga p̃a toko asa, e pe naga,

¹³Naatam̃oli sa seara eu dave pano m̃elu m̃aleoputo kakam̃a, go eu pualua naatatoko maga ni natokoana adeada maga, po naga, Tuga vano po magi sup̃e p̃ota maga suasua, waina ku da atae ra mau;

¹⁴Ragi wanogoe p̃a vusuusu, po laaga parati ki, po pusuusu parati ki; go p̃a leo, waina naleo wanogoe e pe vei lomau naga namamaragokiana dapala nogoe e pei tea mariana m̃aleoputo kakam̃a;

¹⁵P̃a atugi naatatoko maga ni natokoana wanogoe ki nawoka ni lova, po marisasa ki nia, go sara naleo waina e doko asa, go katel kakana, ki nawoka ni lova.

¹⁶Go p̃a vila daua ki tea vutiluapavakotoana mamau puti m̃aleoputo ni napua kakana, go p̃a tap̃ara ki natokoana ki nakapu, go navutiluapavakotoana kakana mamau puti, paki Yehovah Sup̃e anigo: go ega wo pei nap̃akou pa pa po du mau du; ega wo da moro pei tea tavagiana mau.

¹⁷Go naleo vasasakiana wanogoe ega ta doko nam̃elearum̃a mau: naga Yehovah ega marua ki namaetoana warua aneana, po dodomi ko, po maritadodomi ko, po mari ko p̃a wo laapa, dapala waina e pivisa paki tamam̃a maga asa;

¹⁸Ragi waina p̃a wo dogo parati ki nadaleo ni Yehovah Sup̃e anigo, po pavaigoro natip̃akiana aneana maga mamau puti waina a dip̃aki‐go asa naaleatia waia, po mari tea waina e leana namata ni Yehovah Sup̃e anigo.