Read Nguna Togoa Etafe North DEUTERONOMY 14 Bible Online

DEUTERONOMY 14 - Nguna Togoa Etafe North bible

DEUTERONOMY 14

¹Nimu ku pei natu maga ni Yehovah Sup̃e animu: kuga ta dum̃amu dovae mu mau, go kuga ta mari te nam̃asuaana namawota ni namatamu maga nalo ni tea mate.

²Nalakena ku pei narei tapu ki Yehovah Sup̃e anigo, go Yehovah e matadoa ko m̃elu dua ki narei maga mamau puti waina eu doko narae ni maramana, naga p̃a vei tea aneana, narei tautau sikai.

³P̃a ta gani te naleo mamaragokiana mau.

⁴Tea maga waia eu pei nalo tuavati maga waina kuga kani ra:

⁵oks, go shiip, go naninani, Go hart, go kasel, go robak, go naninani mila, go paekark, go antelop, go shamoi.

⁶Go sara nalo tuavati waina nam̃eleda e sawara po pamawota, go waina eu do daruru po do sam̃adoa, nalo tuavati maga wanogoe kuga kani ra.

⁷Ma tea maga waia ki tea waina eu do daruru po do sam̃adoa, go ki tea waina nam̃eleda e sawara po pamawota, kuga ta gani ra mau: kamel, go hea, go koni, nalakena nara eu do daruru po do sam̃adoa, ma nam̃eleda e da pamawota mau, go eu pei tea loa paki‐go.

⁸Go wago e pei tea loa paki‐go, nalakena nam̃eleda e pamawota, ma e da daruru po da sam̃adoa mau: kuga ta gani nap̃okasida mau, go kuga ta kisidogo nap̃atoko mate kakada mau.

⁹Tea maga waia ki sara naleo waina eu doko noai maga, kuga kani ra: tea maga waina eu peani nasisida go namunada, kuga kani ra:

¹⁰Go tea maga waina eu dika ki nasisida go ki namunada, kuga ta gani ra mau; eu pei tea loa paki‐go.

¹¹Sara manu tautau, kuga kani ra.

¹²Ma tea maga waia kuga ta gani ra mau: ikila, go kia ikila, go ospre;

¹³Go klid, go falkon, go kaite visarasara;

¹⁴Go reven visarasara; Go ostris, go maala ni p̃ogi,

¹⁵go manu ni natasi, go maala visarasara;

¹⁶Go tipaga kiki, go tipaga warua, go tipaga waina e peani nam̃au varau doko nap̃auna.

¹⁷Go pelekan, go voltur, go kormorant;

¹⁸Go ova, go heron visarasara, go hupu, go m̃orupua.

¹⁹Go sara nalo kakaravi waina eu peani nalivaruda, eu pei tea loa paki‐go: euga ta pei tea kaniana mau.

²⁰Sara nalo mauri tautau maga waina eu peani nalivaruda, kuga kani ra.

²¹Kuga ta gani te naleo waina e dum̃ana mate mau: nalakena ku pei narei tapu sikai ki Yehovah Sup̃e anigo; p̃a vitua ki nia dua nam̃enaki asa waina e doko roara ni namata‐pua anigo maga, naga ega kani a: kite ku pe sori a dua tea ni nalauna p̃ota asa: P̃a ta peni naninani natuna sikai milk ni p̃ilana mau.

²²P̃a vitua ki kekerualima ni navinaga anigo, tea waina vanua e pitua ki nia sara natau.

²³Go p̃a kanikani narae ni Yehovah Sup̃e anigo, tokora waina ega matadoa e naga nagisana ega toko asa, kekerualima ni korn anigo, go ni waine anigo, go ni naroro anigo, go ni takavea ni navata ni katel anigo go ni navata ni shiip anigo; naga p̃a ataedogo po matau ki Yehovah Sup̃e anigo sara ragi.

²⁴Go waina napua e pe varau paki‐go dapala waina ku marisa do dape a nalakena tokora wanogoe e pei uvea ki‐go waina Yehovah Sup̃e anigo ega matadoa e naga nagisana ega toko asa, ragi waina Yehovah Sup̃e anigo ega wo pasa p̃ia ki‐go:

²⁵Ragi wanogoe p̃a surupioli ki nia ki m̃ane, go p̃a solisoki m̃ane wanogoe nam̃elearum̃a, po pano paki tokora waina Yehovah Sup̃e anigo ega matadoa e:

²⁶Go p̃a vakotovi ki m̃ane wanogoe tea waina nap̃op̃om̃a e midoaki m̃ata ki nia, oks kite shiip, kite waine, kite namunuana kasua, kite tea waina e pei namasauana anigo: go tokora wanogoe p̃a kanikani narae ni Yehovah Sup̃e anigo, go p̃a wo laelaea, nigo go tea ni nasum̃a anigo:

²⁷Go p̃a ta malio ki tea ni naworawora ni Levi waina e doko roara ni namata‐pua anigo maga; nalakena nae e da peani te matele sikai go te naveanipiolikiana sikai sikoti ko mau.

²⁸Go ragi waina namatap̃ago ni sara natau ketolu ega nopu, p̃a tape kekerualima mamau puti ni navinaga anigo doko natau sikai maau wanogoe umai po pila daua ki nia roara ni namata‐pua anigo maga:

²⁹Go tea ni naworawora ni Levi nalakena nae e da peani te matele sikai go te naveanipiolikiana sikai sikoti ko mau, go nam̃enaki, go namatapesu, go nagoroi malepu, waina eu doko roara ni namata‐pua anigo maga, euga wo umai go euga wo ganikani po puka; naga Yehovah Sup̃e anigo ega vasa p̃ia ki‐go ki sara nawosiana ni nam̃elearum̃a waina ku mari a.