Read Nguna Togoa Etafe North DEUTERONOMY 15 Bible Online

DEUTERONOMY 15 - Nguna Togoa Etafe North bible

DEUTERONOMY 15

¹Ragi waina namatap̃ago ni sara natau kelarua ega nopu, p̃a mari naveresiana sikai.

²Go napua waina ega vei tea mariana asa e dapala nea: sara tea vitua ki tea seakiana ega wo peresi tea waina e sea ki nia paki tea ni m̃aladigi ki nia; ega wo da datagovi liliua ki nia mau ki tea ni m̃aladigi ki nia, kite ki taina; nalakena naveresiana ki Yehovah e po pei tea rogorogokiana.

³P̃a tape liliua ki tea ki nam̃enaki‐atatoko: ma tea anigo waina ku dua taim̃a asa, nam̃elearum̃a ega veresi a.

⁴Go lomau tea tika ega wo dika kiam̃a; (nalakena Yehovah ega wo pasa p̃ia ki‐go doko navanua waina Yehovah Sup̃e anigo e dua ko asa raki naveanipiolikiana sikai naga p̃a veani a;)

⁵Waina ku pe rogo parati ki m̃ata ki nadaleo ni Yehovah Sup̃e anigo po pavaigoro po mari natip̃akiana mamau puti waia, waina a dip̃aki‐go asa naaleatia waia.

⁶Nalakena Yehovah Sup̃e anigo ega wo pasa p̃ia ki‐go dapala waina e sai a paki‐go: go p̃a vitua ki tea seakiana paki nalauna laapa, ma p̃a ta sea mau; go p̃a wo maramara dap̃au nalauna laapa, ma nara euga wo da maramara dap̃au ko mau.

⁷Go waina taim̃a sikai e pe vei tea tika po doko sikoti ko doko roara ni namata‐pua anigo maga sikai kakada navanua anigo waina Yehovah Sup̃e anigo e dua ko asa, p̃a ta dum̃am̃a mari nap̃op̃om̃a ega kasua, go p̃a ta p̃ogoro nam̃elearum̃a paki taim̃a tika wanogoe mau:

⁸Ma p̃a vukesi nam̃elearum̃a paki nia, go p̃a vitua ki tea seakiana paki nia pataka ni namasauana aneana.

⁹P̃a vavaigoro mase namidodoaana sa sikai e pe toko nap̃op̃om̃a, po naga, Natau kelarua, natau ni naveresiana, e pei m̃aladigi; go mase namatam̃a e pe sa dip̃a taim̃a tika, go ku pe ta dua e te navatuna mau; go e pe vioso paki Yehovah dip̃a ko, go e pe vei namarinaleosaana paki‐go.

¹⁰P̃a tua e, go nap̃op̃om̃a ega ta dogokitesa mau ragi waina ku dua e: go nalakena tea wanogoe Yehovah Sup̃e anigo ega wo pasa p̃ia ki‐go ki sara nawosiana anigo, go ki sara naleo waina nam̃elearum̃a ega toko asa.

¹¹Nalakena tea tika ega wo da dika navanua te ragi mau. Nalakena tea wanogoe a pitip̃aki paki‐go, po naga, P̃a vukesi nam̃elearum̃a paki taim̃a, go paki tea tika anigo, go paki tea rogokitesa anigo doko navanua anigo.

¹²Go waina taim̃a, Heberu naanoai sikai, kite Heberu nagoroi sikai, e pe vei tea soriana paki‐go, po manigo suasua natau latesa; io, natau kelarua p̃a suasua peresi a.

¹³Go ragi waina p̃a veresi a, ma ega ta p̃alo pano mau:

¹⁴P̃a maneana mari m̃ata ki naleo wia laapa tea ni navata anigo, go tea ni malo wokalesue anigo, go tea ni m̃oru ni navasokiana ni nawa ni vaine anigo: dapala waina Yehovah Sup̃e anigo e pasa p̃ia ki‐go, dap̃ala nogoe p̃a tua e.

¹⁵Go p̃a midoaki parati ki naga nigo ku pea pei naviti navanua ni Ityipt, go Yehovah Sup̃e anigo e daulua ko: nalakena tea wanogoe a dip̃aki‐go naleo waia masoso.

¹⁶Go ega wo pakilina, waina e pe noa ki‐go, Aga wo da m̃elu dua ki‐go pano mau; nalakena e dodomi ko go tea ni nasum̃a anigo, go nalakena e doko p̃ia sikoti ko doko;

¹⁷Ragi wanogoe p̃a tape tea turisai sikai po durisai nadaligana paki namata, go nae ega wo pei tea suasua anigo pa pa ega tu mau du. Go p̃a mari ega vataka sikai paki tea suasua nagoroi anigo.

¹⁸P̃a ta midoaki sa ki nia mau ragi waina p̃a wo suasua naga ega vei tea veresiana; nalakena e manigo suasua natau latesa pataka ni namoriana paka rua ki tea vasadapuiana sikai: go Yehovah Sup̃e anigo ega wo pasa p̃ia ki‐go ki sara navatuna waina p̃a mari a.

¹⁹P̃a magi Yehovah Sup̃e anigo dapugoro takavea anoai maga mamau puti ni navata ni katel anigo go ni navata ni shiip anigo: p̃a ta mari takavea ni oks anigo ega wosiwosi mau, go p̃a ta alati takavea ni navata ni shiip anigo mau.

²⁰Sara natau p̃a wo gani a, nimu ma tea ni nasum̃a anigo, doko narae ni Yehovah Sup̃e anigo tokora waina Yehovah ega matadoa e.

²¹Go waina e pe veani te wotu sikai, dapala e pe vei pito, kite e pe kesa, kite e pe veani te wotu sa maau sa sikai, p̃a ta pitua ki nia ega vei naviriana paki Yehovah Sup̃e anigo mau.

²²P̃a wo gani a roara ni namata‐pua anigo maga: tea waina e da dautau go tea tautau euga wo mamau puti ganikani, dapala e pe vei kasel kite hart.

²³Ma p̃a ta gani nadana mau; p̃a taki nia natano dakiusi noai.