Read Nguna Togoa Etafe North DEUTERONOMY 16 Bible Online

DEUTERONOMY 16 - Nguna Togoa Etafe North bible

DEUTERONOMY 16

¹P̃a midoaki parati ki atelagi ni Abib, go p̃a magi Yehovah Sup̃e anigo pavaigoro navakalauana: nalakena atelagi ni Abib Yehovah Sup̃e anigo e piragi lua ko m̃elu dua ki Ityipt umai p̃ogi.

²Go p̃a vitua ki naviriana ni navakalauana paki Yehovah Sup̃e anigo ki navata ni shiip go ki navata ni katel, tokora waina Yehovah ega matadoa e naga nagisana ega toko asa.

³P̃a ta gani bred waina leven e doko asa ega vilake a mau; naaleatia larua p̃a wo gani bred waina leven e dika asa, ega vilake a, bred ni narogokitesaana; nalakena ku mari m̃araverave m̃elu dua ki navanua ni Ityipt umai: go naga p̃a midoaki parati ki naaleatia wanogoe waina ku m̃elu dua ki navanua ni Ityipt umai, naaleatia maga mamau puti ni namauriana anigo.

⁴Go leven ega ta pei tea vunusiana mau kiam̃a kokoi anigo maga mamau puti naaleatia larua; go te nap̃okasi waina p̃a wo pitua ki nia ega vei naviriana ragi melu ni naaleatia vea wanogoe, ega ta doko p̃ogi mamau wanogoe mau pa pa paki malip̃ogi.

⁵P̃a ta pitua ki naviriana mau ni navakalauana te roara ni namata‐pua anigo maga waina Yehovah Sup̃e anigo e dua ko asa:

⁶Ma tokora waina Yehovah Sup̃e anigo e matadoa e naga nagisana ega toko asa, tokora wanogoe p̃a vitua ki naviriana ni navakalauana asa ragi melu, ragi ni elo musu, ragi kakana waina ku m̃elu dua ki Ityipt umai.

⁷Go p̃a wo peni a po gani a tokora waina Yehovah Sup̃e anigo ega matadoa e: go malip̃ogi p̃a wo maradoa po paki tap̃aup̃au anigo maga pano.

⁸Naaleatia latesa p̃a kani bred waina leven e dika asa: go naaleatia kelarua ega vei nasaisaiana tapu ki Yehovah Sup̃e anigo; p̃a ta mari te nawosiana sikai asa mau.

⁹P̃a manigo peve wiik eu larua: pae ragi waina p̃a wo pea sai ki tea tagaukotovi korn lawodu, p̃a atulake po peve wiik eu larua.

¹⁰Go p̃a magi Yehovah Sup̃e anigo pavaigoro nasaisaiana ni wiik maga pilake navituaana ni navituaana suasuakiana ki nam̃elearum̃a, waina p̃a wo pitua ki nia pataka ni waina Yehovah Sup̃e anigo e pasa p̃ia ki‐go:

¹¹Go p̃a wo laelaea narae ni Yehovah Sup̃e anigo, nigo go natum̃a naanoai, go natum̃a nagoroi, go tea suasua naanoai anigo, go tea suasua nagoroi anigo, go tea ni naworawora ni Levi waina e doko roara ni namata‐pua anigo maga, go nam̃enaki, go namatapesu, go nagoroi malepu, waina eu doko m̃aleoputo kakam̃a, tokora waina Yehovah Sup̃e anigo ega matadoa e naga nagisana ega toko asa.

¹²Go p̃a midoaki parati ki naga nigo ku pea pei naviti doko Ityipt: go p̃a vavaigoro po mari natawonakiana maga waia.

¹³P̃a vavaigoro nasaisaiana ni tap̃aup̃au maga naaleatia larua, edaku ki waina ku pila saisai sua tea ni malo wokalesue anigo, go tea ni m̃oru ni navasokiana ni nawa ni vaine anigo:

¹⁴Go p̃a wo laelaea doko nasaisaiana anigo, nigo go natum̃a naanoai, go natum̃a nagoroi, go tea suasua naanoai anigo, go tea suasua nagoroi anigo, go tea ni naworawora ni Levi, go nam̃enaki, go namatapesu, go nagoroi malepu, waina eu doko roara ni namata‐pua anigo maga.

¹⁵Naaleatia larua p̃a magi Yehovah Sup̃e anigo pavaigoro nasaisaiana tokora waina Yehovah ega matadoa e: nalakena Yehovah Sup̃e anigo ega wo pasa p̃ia ki‐go ki nalapalapaana anigo, go ki nawosiana mamau ni nam̃elearum̃a maga, go p̃a wo laelaea p̃arua.

¹⁶Paka tolu natau sikai naanoai anigo maga mamau puti euga vakilina narae ni Yehovah Sup̃e anigo tokora waina nae ega matadoa e; ragi ni nasaisaiana ni bred waina leven e dika asa, go ragi ni nasaisaiana ni wiik maga, go ragi ni nasaisaiana ni tap̃aup̃au maga: go euga ta m̃alam̃alaaru pakilina narae ni Yehovah mau.

¹⁷Sara naata ega vitua dapala waina e mariatae pitua, pataka ni navasap̃iakiana waina Yehovah Sup̃e anigo e dua ko asa.

¹⁸P̃a tum̃am̃a dawona ki tea vasap̃otae maga go tea leoparati ki maga roara ni namata‐pua anigo maga mamau puti waina Yehovah Sup̃e anigo e dua ko asa, pataka ni naworaworam̃a maga: go euga wo pasa p̃otae narei ki navasap̃otaeana leana.

¹⁹P̃a ta p̃elukidoa navasap̃otaeana mau; p̃a ta piragi narae mau: go p̃a ta dape navituaana mau; nalakena navituaana e do mari p̃onoti namata ni tea manumatua, go e do doa sa ki navasaana maga ki tea leana.

²⁰Tea waina e leana puti, p̃a rausi a, naga p̃a wo mauri po peani pioli ki navanua waina Yehovah Sup̃e anigo e dua ko asa.

²¹P̃a ta manigo lawo ki te nakau mau ega vei nasup̃e sikai pisari tagura ki Yehovah Sup̃e anigo, waina p̃a wo manigo mari a.

²²Go p̃a ta manigo lawo ki tea lawodu sikai mau; waina Yehovah Sup̃e anigo e pilosi a.