Read Nguna Togoa Etafe North DEUTERONOMY 17 Bible Online

DEUTERONOMY 17 - Nguna Togoa Etafe North bible

DEUTERONOMY 17

¹P̃a ta pitua ki naviriana paki Yehovah Sup̃e anigo ki oks, kite shiip, waina e peani wotu, kite waina e da pei tea mamaau mau: tea wanogoe e pei namamaragokiana sikai paki Yehovah Sup̃e anigo.

²Waina e pei tea vap̃aiana doko m̃aleoputo kakam̃a, roara sikai ni namata‐pua anigo maga, waina Yehovah Sup̃e anigo e dua ko asa, naga te naanoai kite te nagoroi e mari tea waina e sa namata ni Yehovah Sup̃e anigo, doko do dapiri navasasokiana aneana,

³Po pano po magi sup̃e p̃ota maga suasua, po lotu ki da, kite elo, kite atelagi, kite tea sikai ki taua ni nakoroatelagi, waina kinau a da pitip̃aki asa mau;

⁴Go e pe vei tea noaana paki‐go, go ku pe rogo nalo kakana, ragi wanogoe p̃a vusuusu parati ki, go p̃a leo, waina e pe vei lomau, go e pe vei tea ataem̃atakiana naga namamaragokiana dapala nogoe e pe vei tea mariana Israel;

⁵Ragi wanogoe p̃a viragi naanoai wanogoe kite nagoroi wanogoe waina e mari naleo sa wanogoe umai paki namata‐pua anigo maga; go p̃a nadi ra ki vatu maga naga eroga mate.

⁶Pae navasaana ki tea noasokisoki dua kite dolu, tea waina ega wo mate ega wo pei tea maripunueana; pae navasaana ki tea noasokisoki sikai maau, ega wo da pei tea maripunueana mau.

⁷Nam̃elearu ni tea noasokisoki maga ega vei tea vea doko asa naga ega maripunue a, go edaku ki nia nam̃elearu ni narei mamau puti. Go dapala nogoe p̃a wo mari puoli ki tea sa wanogoe pa dua ki m̃aleoputo kakam̃a.

⁸Waina te navatuna ni navasap̃otaeana e pe vakilina waina e kasua liu ko, namawota ni nada go ni nada, go namawota ni navululuana go ni navululuana, go namawota ni naatugiana go ni naatugiana, waina eu pei naleo maga ni navileana roara ni namata‐pua anigo maga: ragi wanogoe p̃a tuleana po sake pano paki tokora waina Yehovah Sup̃e anigo ega matadoa e:

⁹Go p̃a vano po punusi tea viri maga, tea ni naworawora ni Levi, go tea vasap̃otae waina e doko naaleatia maga wanogoe: go p̃a vusuusu asa; go nara euga wo manigo noa pakasa ki navasap̃otaeana kakana:

¹⁰Go p̃a mari dapala navasaana ni navasap̃otaeana wanogoe, waina nara euga manigo noa pakasa ki nia, pae tokora waina Yehovah ega matadoa e; go p̃a vavaigoro po mari pataka ni tea mamau puti waina euga vasa pisei ki‐go asa:

¹¹P̃a mari pataka ni navasaana ni nawotaeana waina euga vasa pisei ki‐go asa, go pataka ni navasap̃otaeana waina euga noa ki‐go asa: p̃a ta doa sa ki navasaana ni navasap̃otaeana waina euga visei ki‐go asa, paki taleva ni matua kite paki taleva ni mawiri.

¹²Go naata waina e mari nap̃op̃ona e pakilagi po da dogo parati ki tea viri waina e lawodu tokora wanogoe po pei tea suasua narae ni Yehovah Sup̃e anigo, kite ki tea vasap̃otae mau, naata wanogoe ega wo mate: go p̃a wo mari puoli ki tea sa pa dua ki Israel.

¹³Go narei mamau puti euga rogo, po mataku, po da moro mari nap̃op̃oda euga vakilagi mau.

¹⁴Ragi waina p̃a va paraki navanua waina Yehovah Sup̃e anigo e dua ko asa po peani a, po doko asa doko; go p̃a wo noa, aga wo sike nawota sikai dap̃au au, dapala nalauna maga mamau puti waina eu doko dalivirigoro au;

¹⁵P̃a wo sike nawota sikai dap̃au ko, sikai waina Yehovah Sup̃e anigo ega matadoa e: sikai pae m̃aleoputo ni taim̃a maga, p̃a wo sike a ega vei nawota dap̃au ko: p̃a ta sike nam̃enaki‐atatoko sikai ega tap̃au ko mau, waina e da pei taim̃a.

¹⁶Go ega ta dum̃ana maneana mari horse aneana maga euga laapa, go ega ta mari narei maga euga liliu paki Ityipt pano mau, naga ega veani horse maga laapa: nalakena Yehovah e noa ki‐go, e naga, P̃a ta moro liliu pano napua wanogoe mau.

¹⁷Go ega ta dum̃ana maneana piragi nagoroi maga euga laapa mau, mase nap̃op̃ona e pe tawasi: go ega ta dum̃ana maneana daua ki p̃arua ki silver go kold.

¹⁸Go ega wo pakilina, ragi waina ega wo dasake malo tasake ni namarakiana aneana, naga ega tum̃ana maneana midiri navasaana maga ni nawotaeana waia tusi sikai, ega takiusi tea waina e doko narae ni tea viri maga, tea ni naworawora ni Levi maga:

¹⁹Go ega vei aneana, go ega veve a naaleatia maga mamau puti ni namauriana aneana: naga euga wo ataedogo po matau ki Yehovah Sup̃e aneana, po pavaigoro navasaana maga mamau puti ni nawotaeana waia, go natawonakiana maga, po mari ra:

²⁰Naga nap̃op̃ona ega ta pakilagi liu taina maga mau, go naga ega ta dawasi mau pa dua ki natip̃akiana paki taleva ni matua kite paki taleva ni mawiri: naga naaleatia aneana maga euga wo laapa namarakiana aneana, nae go natuna maga, doko m̃aleoputo ni Israel.