Read Nguna Togoa Etafe North DEUTERONOMY 18 Bible Online

DEUTERONOMY 18 - Nguna Togoa Etafe North bible

DEUTERONOMY 18

¹Tea viri maga waina eu pei naworawora ni Levi mamau euga ta peani te matele kite te naveanipiolikiana mau sikoti Israel: euga wo gani naviriana tap̃arakiana maga ki Yehovah, go naveanipiolikiana aneana.

²Go euga wo da peani naveanipiolikiana mau m̃aleoputo ni taida maga: Yehovah e pei naveanipiolikiana adeada, dapala waina e noa ki da asa.

³Go tea waia ega vei tea waina e one narei paki tea viri maga, pae nara waina eu pitua ki naviriana, e pe vei oks, kite e pe vei shiip, naga euga wo dua tea viri napauna, go napupuna dua, go nap̃oloalapana.

⁴Go takavea ni korn anigo, go ni waine anigo, go ni naroro anigo, go tea vea ni nalolu mamau ni shiip anigo, p̃a tua e ara.

⁵Nalakena Yehovah Sup̃e anigo e matadoa e ki naworaworam̃a mamau puti, naga ega lawodu po suasua pae nagisa ni Yehovah, nae go natuna maga pa pa po du mau du.

⁶Go waina naata sikai ni naworawora ni Levi e pe vae roara ni namata‐pua anigo maga sikai kakada ni Israel mamau umai, pae tokora waina e m̃enaki‐atatoko asa, go e pe umai pilake namasauana mamau ni nap̃op̃ona paki tokora waina Yehovah ega matadoa e;

⁷Ragi wanogoe nae ega wo suasua pae nagisa ni Yehovah Sup̃e aneana, dapala taina maga mamau puti, naworawora ni Levi, waina eu lawodu tokora wanogoe narae ni Yehovah.

⁸Euga veani matele rowogiana pataka sikai euga kanikani, go tea waina e pei aneana pae nasoriana ni p̃aumaso aneana.

⁹Ragi waina p̃a wo pano sua paki navanua waina Yehovah Sup̃e anigo e dua ko asa, p̃a ta ataedogo po mari namamaragokiana maga mau ki nalauna maga wanogoe.

¹⁰Te naata ega ta pei tea vap̃aiana mau m̃aleoputo kakam̃a waina e do mari natuna naanoai kite natuna nagoroi ega surata duaduru nakapu, kite tea waina e do mari nakaimasi, kite tea waina e do mari nakikitaana, kite tea gorokoro, kite tea wosidoa,

¹¹Kite tea vaugoro, kite tea vusuusu paki naata tapu, kite tea tapu vakamaligo, kite tea waina e pasa paki naatamate.

¹²Nalakena naata waina e do mari naleo maga wanogoe, nae e pei tea mamaragokiana sikai paki Yehovah: go nalakena namamaragokiana maga wanogoe, Yehovah Sup̃e anigo e kopasi lua ra m̃elu dua ki naraem̃a.

¹³P̃a vei tea wialua narae ni Yehovah Sup̃e anigo.

¹⁴Nalakena nalauna maga wanogoe, waina p̃a wo peani ra, nara eu daki dorogo paki tea maga waina eu do mari nakikitaana, go paki tea mari nakaimasi: ma nigo, Yehovah Sup̃e anigo e da suasua asa mau naga p̃a wo mari dapala nogoe.

¹⁵Yehovah Sup̃e anigo ega wo manigo sike profeta sikai m̃elu m̃aleoputo kakam̃a, sikai ki taim̃a maga, ega takiusi au; go p̃a taki dorogo paki nia;

¹⁶Dapala tea mamau puti waina ku pavara ni Yehovah Sup̃e anigo asa Horeb naaleatia ni nasaisaiana, po naga, Aga ta moro dogo nadaleo ni Yehovah Sup̃e aginau mau, go aga ta moro punusi nakapu warua wanogoe te ragi mau, naga aga ta mate mau.

¹⁷Go Yehovah e noa ki nau, e naga, Eu pasa p̃ia ki tea waina eu noa e.

¹⁸Aga wo madeada sike profeta sikai m̃elu m̃aleoputo ni taida maga, ega takiusi ko; go aga wo doropusi navasaana aginau maga nawokana, go nae ega wo pasa paki da ki tea mamau puti waina aga tip̃aki nia asa.

¹⁹Go ega wo pakilina, naga naata waina ega ta dogo parati ki navasaana aginau maga waina nae ega wo pasa ara pae nagisagu, naata wanogoe kinau aga wo datagovi a asa.

²⁰Ma profeta waina ega wo noa navasaana leomadaga sikai pae nagisagu, waina kinau a da dip̃aki nia asa mau naga ega noa e, kite waina ega vasa pae nagisa ni sup̃e p̃ota maga, profeta wanogoe ega wo mate.

²¹Go waina ku pe noa nap̃op̃om̃a, Tuga wo atae navasaana waina Yehovah e da noa e mau dapale sava?

²²Ragi waina te profeta sikai e pasa pae nagisa ni Yehovah, go waina naleo wanogoe e pe ta doko mau, kite e pe ta pakilina mau, tea wanogoe e pei naleo waina Yehovah e da pasa asa mau: profeta wanogoe e pasa leomadaga asa, go p̃a ta matau ki nia mau.