Read Nguna Togoa Etafe North DEUTERONOMY 19 Bible Online

DEUTERONOMY 19 - Nguna Togoa Etafe North bible

DEUTERONOMY 19

¹Ragi waina Yehovah Sup̃e anigo ega wo daekotovi nalauna maga waina Yehovah Sup̃e anigo e dua ko navanua adeada, go p̃a wo dielua ra, po doko natokoana adeada maga, go nasum̃a adeada maga doko;

²P̃a manigo mari masale ki natokoana dolu m̃aleoputo ni navanua anigo, waina Yehovah Sup̃e anigo e dua ko asa naga p̃a veani a.

³P̃a manigo mari m̃ata ki napua po dap̃otae kokoi maga ni navanua anigo, waina Yehovah Sup̃e anigo e mari ko p̃a veani a, euga vei matele dolu, naga tea maripunue naatam̃oli ega sava paki asa pano.

⁴Go tea waia e pei naleo nalo ni tea maripunue naatam̃oli, waina ega sava paki asa pano po mauri: naata waina e atugi tea ni m̃aladigi ki nia ragi waina e da midoa ki nia mau, po da pilosi a sala vea mau;

⁵Dapala waina naata sikai e paki maala ni nakau pilake tea ni m̃aladigi ki nia, naga ega tae nakau, go naruna e sila ki karau naga ega taekotovi nakau wanogoe, go nap̃au ni karau e pe m̃elu dua ki navarana, po nadi tea ni m̃aladigi ki nia, go e pe mate; naata wanogoe ega sava paki natokoana maga wanogoe sikai kakada, po mauri:

⁶Mase tea siko nada e pe sava dausi tea maripunue naatam̃oli wanogoe ragi waina namaetoana aneana e do pavaga, po pa parati ki nia nalakena napua e parau, go e pe maripunue a; waina e da p̃ia ki namateana nalakena e da pilosi a sala vea mau.

⁷Nalakena tea wanogoe kinau a dip̃aki‐go, po naga, P̃a manigo mari masale ki natokoana dolu.

⁸Go waina Yehovah Sup̃e anigo e pe risua ki kokoi anigo, dapala waina e pivisa asa paki tamam̃a maga, po dua ko navanua mamau waina e sai a naga ega tua tamam̃a maga asa;

⁹Go waina ku pe vavaigoro natip̃akiana mamau waia po mari a, waina a dip̃aki‐go asa naaleatia waia, naga p̃a dodomi Yehovah Sup̃e anigo po surata napua aneana maga sara ragi; ragi wanogoe p̃a wo moro manigo sokari natokoana dolu wanogoe ki natokoana p̃ota dolu:

¹⁰Dapala waina nada tautau ega ta pei tea takiana m̃aleoputo ni navanua anigo, waina Yehovah Sup̃e anigo e dua ko asa ega vei naveanipiolikiana sikai, go dapala waina nada ega ta doko ako mau.

¹¹Ma waina naata sikai e pe vilosi tea ni m̃aladigi ki nia, po kusugoro raki nia, po duleana dip̃a e, po atugi a naga ega mate, go e mate; go waina e pe sava paki natokoana maga wanogoe sikai kakada:

¹²Ragi wanogoe tea matua maga ni natokoana aneana euga wo pitip̃aki po piragi lua e umai, go euga wo pitua ki nia paki nam̃elearu ni tea siko nada naga ega mate.

¹³Namatam̃a ega ta maritadodomi a mau, ma p̃a mari puoli ki nada tautau pa dua ki Israel, naga ega wia ki‐go.

¹⁴P̃a ta disua ki kokoi ni navanua ki tea ni m̃aladigi ki‐go, waina tea ni tagona ni tuai eu pe lawo ki nia, doko tokora ni naveaniana anigo waina p̃a wo peani a, navanua waina Yehovah Sup̃e anigo e dua ko asa naga p̃a veani a.

¹⁵Tea noasokisoki sikai maau ega ta duleana dip̃a naatam̃oli te namarinaleotageleana sikai, kite te namarinaleosaana sikai, te namarinaleosaana waina e mari naleo sa asa: pae navasaana ki tea noasokisoki dua, kite pae navasaana ki tea noasokisoki dolu, naleo sikai ega vei tea lawosokiana.

¹⁶Waina tea noasokisoki tagele sikai e pe tuleana dip̃a te naatam̃oli naga ega noasokisoki dip̃a e ki nawosiana sa;

¹⁷Ragi wanogoe naatam̃oli dua wanogoe, waina ero dum̃ada pululu paki da, eroga wo lawodu narae ni Yehovah, go narae ni tea viri maga go tea vasap̃otae maga waina eu doko naaleatia maga wanogoe;

¹⁸Go tea vasap̃otae maga euga vusuusu parati ki: go kuga leo, waina tea noasokisoki wanogoe e pe vei tea noasokisoki sorosoro sikai, go waina e pe noasokisoki sorosoro dip̃a taina;

¹⁹Ragi wanogoe p̃a mari paki nia dapala waina nae e midoa ki nia naga ega mari a paki taina wanogoe: go dapala nogoe p̃a wo mari puoli ki tea sa pa dua ki m̃aleoputo kakam̃a.

²⁰Go nara waina eu doko euga wo dogo, po mataku, go euga wo da moro mari tea sa dapala nogoe te ragi mau m̃aleoputo kakam̃a.

²¹Go namatam̃a ega ta maritadodomi mau; namauriana oli namauriana, namata oli namata, napati oli napati, nam̃elearu oli nam̃elearu, natua oli natua.