Read Nguna Togoa Etafe North DEUTERONOMY 2 Bible Online

DEUTERONOMY 2 - Nguna Togoa Etafe North bible

DEUTERONOMY 2

¹Go tu maradoa po surata paki masop̃alo pae napua waina e paki Natasi Miala, dapala waina Yehovah e noa ki nau asa, go tu daliviri ki tava Seir naaleatia laapa.

²Go Yehovah e pasa paki nau, po naga,

³Ku po daliviri ki tava waia ragi varau: kuga maradoa paki taleva ni north.

⁴Go p̃a dip̃aki narei, po naga, Kuga wo surata duaduru kokoi ki taimu maga, Esau natuna maga waina eu doko Seir doko; go nara euga wo matau ki mu: nalakena tea wanogoe kuga tum̃amu pavaigoro mu:

⁵Kuga ta pululu paki da mau; nalakena aga wo da dua mu te matele ni navanua adeada mau; io te matele kiki mau pataka naga nam̃ele ni natuam̃a ega vasi a, aga wo da dua mu asa mau: nalakena a po dua Esau tava Seir naga ega vei naveaniana aneana.

⁶Kuga wo pakotovi navinaga pae ara ki m̃ane, naga kuga kanikani; go kuga wo pakotovi noai pae ara ki m̃ane, naga kuga munu.

⁷Nalakena Yehovah Sup̃e anigo e pasa p̃ia ki‐go nawosiana mamau puti ni nam̃elearum̃a: e atae nasurataana anigo duaduru masop̃alo warua waia: natau rualima pati waia Yehovah Sup̃e anigo e sikoti ko doko; go ku da dika te navatuna mau.

⁸Go dapala nogoe tu surata liu pano pa dua ki taigida maga, Esau natuna maga waina eu doko Seir doko, pa dua ki napua ni nap̃aloa ni Arabah, go pa dua ki Elath, go pa dua ki Esion‐keber. Go tu maradoa po surata pano pae napua ni masop̃alo ni Moab pano.

⁹Go Yehovah e noa ki nau, e naga, Kuga ta pululu paki Moab mau, go kuga ta mari navakalo paki da mau: nalakena aga wo da dua ko te matele ni navanua aneana mau, naga ega vei naveaniana animu; nalakena Ar a dua Lot natuna maga asa naga ega vei naveaniana adeada.

¹⁰(Sala vea tea ni Emim eu doko tokora wanogoe doko, eu pei narei warua, go eu laapa, go eu parau dakiusi tea ni Anakim:

¹¹Nara ma eu pei tea ni Refaim dapala tea ni Anakim; ma tea ni Moab eu soso ra ki tea ni Emim.

¹²Go sala vea naworawora ni Hor, nara ma eu doko Seir doko, ma Esau natuna maga eu dielua ra; go eu mari puoli ki da pa dua ki naraeda, go eu doko oli ra, dapala waina Israel e mari a ki navanua ni naveaniana aneana, waina Yehovah e dua ra asa.)

¹³Go ragi waia kuga tuleana, go kuga tuagoto nap̃ap̃a Sered. Go tu pano duagoto nap̃ap̃a Sered.

¹⁴Go naaleatia maga waina tu m̃elu pae Kadeshbarnea umai, pa pa paki ragi waina tu duagoto nap̃ap̃a Sered, eu pei natau rualima dolu tamate latolu; pa pa tagona mamau ni naatam̃oli maga ni navakalo eu mavunuvunu puti m̃elu dua ki m̃aleoputo ni tokora ni nam̃enakiana, dapala waina Yehovah e pivisa asa paki da.

¹⁵Go p̃arua liu, nam̃elearu ni Yehovah e dip̃a ra, naga ega mari sasa ki da m̃elu dua ki m̃aleoputo ni tokora ni nam̃enakiana, pa pa eu mavunuvunu puti.

¹⁶Go e pakilina, ragi waina naatam̃oli maga ni navakalo eu mavunuvunu puti po pei tea maripuolikiana m̃elu dua ki m̃aleoputo ni narei,

¹⁷Naga Yehovah e pasa paki nau, po naga,

¹⁸Masoso waia p̃a wo duagoto Ar kokoi ni Moab:

¹⁹Go ragi waina kuga wo umai paki m̃aladigi ki Ammon natuna maga, kuga ta pululu paki da, go kuga ta mari navakalo paki da mau: nalakena aga wo da dua mu mau te matele ni navanua ki Ammon natuna maga, naga ega vei naveaniana animu: nalakena a po dua Lot natuna maga asa naga ega vei naveaniana adeada.

²⁰(Tea wanogoe ma e pei tea sosoana ki navanua ki tea ni Refaim: sala vea Refaim maga eu doko asa doko; ma naworawora ni Ammon eu soso ra ki tea ni Samsumim;

²¹Eu pei narei warua, go eu laapa, go eu parau, pataka sikai ma naworawora ni Anakim; ma Yehovah e mari sasa ki da pa dua ki naraeda; go nara eu dielua ra, po doko oli ra doko:

²²Dapala waina e magi Esau natuna maga waina eu doko Seir doko mari a, ragi waina e mari puoli ki naworawora ni Hor pa dua ki naraeda; go nara eu dielua ra, po doko oli ra doko, pa pa paki masoso waia:

²³Go tea ni Avvim waina eu doko natokoana maga pa pa paki Casa, tea ni Kaftor waina eu m̃elu dua ki Kaftor umai, po mari puoli ki da, po doko oli ra doko.)

²⁴P̃a tuleana, p̃a surata nasurataana anigo, po duagoto nap̃aloa ni Arnon pano: p̃a leo, a dua ko Sihon tea ni Amor, nawota ni Heshbon, go navanua aneana, eu doko nam̃elearum̃a: p̃a atulake po peani a, po mari navakalo paki nia.

²⁵Naaleatia waia aga wo atulake po mari namatakilakila‐ki‐go‐ana, go namatauki‐go‐ana eroga toko narei maga etano ni nakoroatelagi mamau, tea maga waina euga wo dogo narogorogoana kakam̃a, go euga wo durururu, po dogokitesa p̃arua nalakena nigo.

²⁶Go a dip̃aki lua tea tautauana maga m̃elu masop̃alo ni Kedemoth pano pa punusi Sihon, nawota ni Heshbon, pilake navasaana maga ni natam̃ateana,

²⁷po naga, P̃a suasua ki nau naga aga surata duaduru navanua anigo: aga wo pano pae napua lapa, go aga wo da dawasi mau paki taleva ni matua kite paki taleva ni mawiri.

²⁸P̃a sori dua au navinaga raki m̃ane, naga aga kanikani; go p̃a tua au noai raki m̃ane naga aga munu: ma p̃a suasua ki nau naga aga surata duaduru ki nam̃elegu;

²⁹Dapala waina Esau natuna maga waina eu doko Seir doko, go naworawora ni Moab waina eu doko Ar doko, eu mari a paki nau; pa pa aga wo duagoto Yordan pano paki navanua waina Yehovah Sup̃e aginami e dua gami asa.

³⁰Ma Sihon nawota ni Heshbon, e da suasua naga tuga to liu sa pano mau: nalakena Yehovah Sup̃e anigo e mari naatana e kasua, go e mari nap̃op̃ona e kasua, naga ega vitua ki nia paki nam̃elearum̃a, dapala naaleatia waia.

³¹Go Yehovah e pasa paki nau, po naga, P̃a leo, a po atulake naga aga vitua ki Sihon go navanua aneana paki‐go: p̃a atulake po peani a naga ega vei naveanipiolikiana anigo.

³²Go ragi wanogoe Sihon e dave umai dip̃a gida, nara ma narei aneana mamau, po mari navakalo Yahas.

³³Go Yehovah Sup̃e anigida e pitua ki nia narae gida; go tu atugi a, nae go natuna naanoai maga, go narei aneana mamau puti.

³⁴Go doko ragi wanogoe tu puati puti ki natokoana aneana maga, po mari puoli ki puti ra, pilake nagoroi maga, go pilake tea vusavusa maga; go te sikai maau e da pei tea toropusiana doko mau:

³⁵Ma katel sikida tu puati ra euga vei anigida, pilake tea tapepavakotoana ni natokoana maga waina tu puati ra.

³⁶Pae Aroer, waina e doko nadigi ni nap̃aloa ni Arnon, go pae natokoana waina e doko nap̃aloa doko, pa pa paki Cilead, te natokoana e da doko mau waina e kasua liu gida: Yehovah Sup̃e anigida e pitua ki puti ra naraegida:

³⁷Ma navanua ki Ammon natuna maga, tea wanogoe sikina ku da umai paki m̃aladigi ki nia mau; go taleva ni nadigi ni noaisara Yabbok, go natokoana maga ni navanua ni tava, go tokora maga waina Yehovah Sup̃e anigida e dip̃agoro gida ara.