Read Nguna Togoa Etafe North DEUTERONOMY 20 Bible Online

DEUTERONOMY 20 - Nguna Togoa Etafe North bible

DEUTERONOMY 20

¹Ragi waina p̃a wo dave pano po mari navakalo paki tea kokona ki‐go maga, go ragi waina p̃a wo punusi horse maga, go kariot maga, go narei laapa liu ko, p̃a ta matau ki da mau: nalakena Yehovah Sup̃e anigo e sikoti ko doko, waina e piragi lua ko sake m̃elu dua ki navanua ni Ityipt umai.

²Go ega wo pakilina, ragi waina p̃a va paki m̃aladigi ki navakalo wanogoe, naga tea viri ega wo paki m̃aladigi po pasa paki narei,

³Po noa ki da, Kuga rogo, Israel O, naaleatia waia ku po umai paki m̃aladigi ki navakalo dip̃a tea kokona ki mu maga: nap̃op̃omu ega ta maladi mau; kuga ta mataku mau, go kuga ta duruuru mau, go kuga ta p̃ilake ki da mau;

⁴Nalakena Yehovah Sup̃e animu e pei nae waina e do sikoti mu pano, naga ega manimu marimari dip̃a tea kokona ki mu maga, naga ega mauti mu.

⁵Go tea maraki maga euga wo pasa paki narei, po naga, Naatam̃oli sei e doko waina e po davagi nasum̃a vau, ma e ko da peakotokotomau asa? Nae ega liliu po paki nasum̃a aneana pano, mase e pe mate navakalo, go naatam̃oli p̃ota e pe veakotokotomau asa.

⁶Go naatam̃oli sei e doko waina e po lawo roara ni vaine, ma e ko da lei nawana mau? Nae ega liliu po paki nasum̃a aneana pano, mase e pe mate navakalo, go naatam̃oli p̃ota e pe lei nawana wanogoe.

⁷Go naatam̃oli sei e doko waina e dum̃ana maneana pasasoki nagoroi sikai, ma e ko da dawiri a mau? Nae ega liliu paki nasum̃a aneana pano, mase e pe mate navakalo, go naatam̃oli p̃ota e pe tawiri a.

⁸Go tea maraki maga euga moro pasa paki narei, po naga, Naatam̃oli sei e doko waina e mataku go nap̃op̃ona e maladi? Nae ega liliu paki nasum̃a aneana pano, mase nap̃op̃o ni taina e pe sara dakiusi nap̃op̃ona.

⁹Go ega wo pakilina, ragi waina tea maraki maga euga makoto ki navasaana adeada paki narei, naga euga tawona ki tea maraki maga ni taua maga euga vei nap̃au ni narei.

¹⁰Ragi waina p̃a vaki m̃aladigi ki te natokoana warua sikai naga p̃a mari navakalo dip̃a e, p̃a rogorogo ki natam̃ateana paki nia.

¹¹Go ega wo pakilina, waina e pe vasadara ko ki natam̃ateana, po manigo p̃olagati, ragi wanogoe ega wo pakilina naga narei mamau puti waina eu pei tea vap̃aiana eu doko asa doko, euga wo pei tea ni nawosiana ni nasautoga paki‐go, po manigo suasua.

¹²Go waina e pe ta mari natam̃ateana paki‐go mau, ma e pe wo mari navakalo paki‐go, ragi wanogoe p̃a kelugoro e doko:

¹³Go ragi waina Yehovah Sup̃e anigo ega vitua ki nia paki nam̃elearum̃a, p̃a atugi sara naanoai kakana ki nawoka ni lova:

¹⁴Ma nagoroi maga, go piakirikiri maga, go katel, go sara naleo waina eu doko natokoana wanogoe doko, go naleo vutiluapavakotoana kakana mamau puti, p̃a tum̃am̃a manigo dape pavakoto ara; go p̃a kani naleo vutiluapavakotoana ki tea kokona ki‐go maga, waina Yehovah Sup̃e anigo e dua ko asa.

¹⁵Go p̃a mari dapala nogoe paki natokoana maga mamau puti waina eu doko uvea ki‐go, waina eu da pei tea ki natokoana maga ki nalauna maga waia.

¹⁶Ma ki natokoana maga ki narei waia, waina Yehovah Sup̃e anigo e dua ko asa ega vei naveaniana sikai, p̃a ta mauti te navatuna mau waina e do maromaaro ega mauri:

¹⁷Ma p̃a maripunuvunue puti ra; naworawora ni Heth, go naworawora ni Amor, go naworawora ni Kanaan, go naworawora ni Peris, go naworawora ni Hivah, go naworawora ni Yebus; dapala waina Yehovah Sup̃e anigo e dip̃aki‐go asa:

¹⁸Naga euga ta pasa pisei ki mu mau naga kuga rausi tea mamaragokiana adeada maga waina nara eu mari sua e paki nasup̃e adeada maga; naga kuga mari naleo sa dip̃a Yehovah Sup̃e animu.

¹⁹Ragi waina p̃a wo kelugoro te natokoana sikai doko naaleatia laapa, po mari navakalo dip̃a e naga p̃a wo dape a, p̃a ta mari sa ki nakau kakana maga po sila ki karau sikai dip̃a ra mau; nalakena p̃a wo gani nawada, go p̃a ta daekotovi ra mau; nakau ni vanua e pei naatam̃oli naga p̃a wo kelugoro e kite?

²⁰Ma nakau maga waina ku atae sua naga eu da pei nakau kaniana mau, p̃a mari sa ki da po daekotovi ra; go p̃a tavagi nakoro ni p̃aaka maga dip̃a natokoana waina e do mari navakalo paki‐go, pa pa ega rowo.