Read Nguna Togoa Etafe North DEUTERONOMY 21 Bible Online

DEUTERONOMY 21 - Nguna Togoa Etafe North bible

DEUTERONOMY 21

¹Waina naata sikai e pe vei tea vap̃aiana e pei tea maripunueana doko navanua waina Yehovah Sup̃e anigo e dua ko asa naga p̃a veani a, e pe one namalasi, go eu pe da atae naata waina e atugi a mau:

²Ragi wanogoe tea matua anigo maga go tea vasap̃otae anigo maga euga wo m̃elu umai po dowogi paki natokoana maga waina eu doko dalivirigoro tea waina e pei tea maripunueana:

³Go ega wo pakilina, naga natokoana waina e doko m̃aladigi ki naatam̃oli mate wanogoe, tea matua maga ni natokoana wanogoe euga wo puati kau atara sikai ni navata, waina e ko da p̃osiwosi mau, go waina e ko da ovi nakau ni nanoa mau;

⁴Go tea matua maga ni natokoana wanogoe euga vuati kau atara wanogoe siwo umai paki nap̃aloa ni noaisara, tokora waina eu da kili a mau kite sapura ki asa mau, go euga mari kotovi nanoa ni kau atara tokora wanogoe doko nap̃aloa:

⁵Go tea viri maga, naworawora ni Levi natuna maga, euga wo umai paki m̃aladigi; nalakena e pei nara waina Yehovah Sup̃e anigo e matadoa ra naga euga vei tea suasua aneana maga, go naga euga wo pasa p̃ia ki nagisa ni Yehovah; go ki navasaana adeada sara navululuana go sara naatugiana euga wo pei tea vasap̃otaeana asa:

⁶Go tea matua maga mamau puti ni natokoana wanogoe, waina e doko m̃aladigi ki naatam̃oli mate wanogoe, euga vavano elagi ki kau atara waina nanoana e pei tea marikotoviana nap̃aloa:

⁷Go euga wo pasadara, po naga, Nam̃elearugami maga eu da ligi nada waia, go namatagami maga eu da punusi a mau.

⁸Yehovah O, p̃a magi narei anigo Israel midoakikorokoro, waina ku daulua ra, go p̃a ta suasua naga nada tautau ega toko m̃aleoputo ni narei anigo Israel mau. Go nada ega wo madeada pei tea midoakikorokoroana.

⁹Go dapala nogoe p̃a wo mari puoli ki nada tautau pa dua ki m̃aleoputo kakam̃a, ragi waina p̃a wo mari tea waina e leana namata ni Yehovah.

¹⁰Ragi waina p̃a wo dave pano po mari navakalo dip̃a tea kokona ki‐go maga, go Yehovah Sup̃e anigo ega wo pitua ki da paki nam̃elearum̃a maga, go p̃a wo piragi lua ra euga vei tea viragiluapavakotoana,

¹¹Go waina ku pe vunusi m̃aleoputo ni tea viragiluapavakotoana maga wanogoe, nagoroi raewia sikai waina ku masauna naga ega vei nagoroi anigo;

¹²Ragi wanogoe p̃a viragi a umai paki nasum̃a anigo; go nae ega wo dum̃ana masi nap̃auna go nakini natap̃alakisina maga;

¹³Go ega wo sawolua sugoro ni naviragiluapavakotoana aneana, go ega wo doko nasum̃a anigo doko, po dagisi tamana go p̃ilana atelagi mamau sikai: go edaku ki nia p̃a wo sili pano punusi a po pei anawota, go nae ega wo pei nagoroi anigo.

¹⁴Go ega wo pakilina, waina ku pe ta midoaki m̃ata ki nia mau, ragi wanogoe p̃a suasua ki nia ega vaki tokora waina nae e pe masauna naga ega vaki asa pano; ma p̃a ta sori a mau raki m̃ane, p̃a ta mari paki nia dapala e pe vei naviti, nalakena ku po mari a e dogokitesa.

¹⁵Waina naata sikai e pe veani nagoroi dua, go e dodomi sikai po pilosi kerua, go nara dua ero maneana dape natuna maga, tea waina e dodomi a, go tea waina e pilosi a; go waina natuna takalapa e pe vei agi tea waina e pilosi a;

¹⁶Ragi wanogoe ega wo pakilina naaleatia waina ega mari natuna naanoai maga eroga veani pioli ki tea veaniana aneana, naga ega ta mari natu ni tea waina e dodomi a ega vei takalapa pea ki natu ni tea waina e pilosi a, waina e pei takalapa lomau:

¹⁷Ma ega wo atae m̃ata ki natu ni tea waina e pilosi a naga e pei takalapa po dua e paka rua ni naleo veaniana aneana: nalakena nae e pei tea vea ni nakasuaana aneana; tea ni naveitakalapaana e pei aneana.

¹⁸Waina naata sikai e pe veani natu naanoai p̃au kasua go p̃auluulu sikai, waina e da dogo parati ki nadaleo ni tamana, go nadaleo ni p̃ilana, go waina ero parati pisei ki nia ma e da daki dorogo paki da mau:

¹⁹Ragi wanogoe tamana go p̃ilana eroga wo puati a, po piragi lua e pa punusi tea matua maga ni natokoana aneana, go paki namata‐pua aneana;

²⁰Go eroga wo noa ki tea matua maga ni natokoana aneana, eroga naga, Natugami waia e pei p̃au kasua go p̃auluulu, e da dogo parati ki nadaleogami mau; e pei tea mari daratara, go tea matamaloku.

²¹Go naanoai maga mamau puti ni natokoana aneana euga wo nadi a ki vatu maga, naga ega mate: dapala nogoe p̃a wo mari puoli ki tea sa pa dua ki m̃aleoputo kakam̃a; go Israel mamau euga wo dogo e po mataku.

²²Go waina naata sikai e pe mari namariana sa sikai pataka ni namateana, go eu pe maripunue a, go ku pe sara ki nia e dau nakau sikai;

²³Nap̃atokona ega ta dau nakau wanogoe dau p̃ogi mamau, ma p̃a ova ki nia naaleatia sikai maau wanogoe; nalakena nae waina e dau nakau e pei tea vasasakiana ki Sup̃e; naga p̃a ta mari sa ki navanua anigo mau, waina Yehovah Sup̃e anigo e dua ko asa ega vei naveanipiolikiana sikai.