Read Nguna Togoa Etafe North DEUTERONOMY 22 Bible Online

DEUTERONOMY 22 - Nguna Togoa Etafe North bible

DEUTERONOMY 22

¹Waina ku pe vunusi oks ki taim̃a, kite shiip aneana, eu pe sasap̃o, p̃a ta dum̃am̃a dasuru ki‐go paki da mau: ma p̃a viragi ra euga moro liliu umai punusi taim̃a.

²Go waina taim̃a e pe ta doko m̃aladigi ki‐go, kite waina ku pe ta atae a mau, ragi wanogoe p̃a viragi a umai paki nasum̃a anigo, go ega wo doko sikoti ko doko pa pa waina taim̃a ega laaga asa, go p̃a wo mori a liliu paki nia.

³Go dapala nogoe p̃a mari a ki ass aneana; go dapala nogoe p̃a mari a ki sugoro aneana; go dapala nogoe p̃a mari a ki sara naleo puoli ki taim̃a, waina nae e dape puoli ki nia, go nigo ku pap̃ai a: p̃a wo da dum̃am̃a dasuru ki‐go mau.

⁴Waina ku pe vunusi ass ki taim̃a, kite oks aneana, eu pe rowo napua, p̃a ta dum̃am̃a dasuru ki‐go paki da mau: ma p̃a silae taim̃a naga ega sike ra euga moro duleana.

⁵Nagoroi ega ta suni tea suniana ki naanoai, go naanoai ega ta suni tea suniana ki nagoroi mau: nalakena naata waina e do mari naleo maga wanogoe e pei tea mamaragokiana ki Yehovah Sup̃e anigo.

⁶Waina vete sikai ni manu e pe toko naraem̃a napua, e pe toko te nakau kite e pe toko natano, waina e pilake tea vusavusa maga kite atolu maga, go p̃ilana e do dokovi tea vusavusa maga wanogoe, kite atolu maga wanogoe, p̃a ta dape p̃ilana ega vilake natuna maga mau:

⁷P̃a toropusi p̃ilana ega vano, ma tea vusavusa maga ku mariatae dape ra euga vei anigo; naga ega wia ki‐go, go naga naaleatia anigo maga euga laapa.

⁸Ragi waina p̃a wo davagi nasum̃a vau, p̃a mari nakoro sikai nap̃au ni nasum̃a anigo wanogoe, naga p̃a wo da mari nada ega toko nasum̃a anigo, waina te naata e pe rowo pae asa.

⁹P̃a ta sapura ki napati visarasara dua roara ni vaine anigo mau: mase nawa ni napati waina ku sapura ki nia, go nawana mamau ni roara ni vaine, eu pe vei tea mari‐masale‐kiana.

¹⁰P̃a ta sara ki saisai ki oks pilake ass mau naga eroga sisi natano.

¹¹P̃a ta suni sugoro ni wul waina e sarisari pilake linen mau.

¹²P̃a tum̃am̃a manigo mari tea sereserea maga nadigi pati ni tea suniana anigo, waina p̃a wo dum̃am̃a kovagoro ko asa.

¹³Waina te naata e pe tawiri nagoroi sikai, po pa punusi a, po karaikita e,

¹⁴Po pasa naleo ni namaliereana maga dip̃a e, po mari nagisana e sa, po naga, A dawiri nagoroi waia, go ragi waina a disugi a, a pap̃ai naga navaivaiana maga ni navei‐naatara‐ana eu da doko asa mau:

¹⁵Ragi wanogoe tama ni nagoroi wanogoe, go p̃ilana, eroga wo dape navaivaiana maga ni navei‐naatara‐ana ni nagoroi wanogoe umai paki tea matua maga doko namata‐pua ni natokoana wanogoe:

¹⁶Go tama ni nagoroi wanogoe ega wo noa ki tea matua maga, ega wo naga, A pitua ki natugu nagoroi dua naatam̃oli waia asa naga ega vei anagoroi, go nae e karaikita e;

¹⁷Go p̃a leo, e po pasa naleo ni namaliereana maga dip̃a e, po naga, A pap̃ai naga navaivaiana maga ni naveinataraana eu da doko natum̃a nagoroi mau; ma tea maga waia eu pei navaivaiana maga ni navei‐naataraana ki natugu nagoroi. Go euga wo p̃elesa ki tea suniana wanogoe narae ni tea matua maga ni natokoana.

¹⁸Go tea matua maga ni natokoana wanogoe euga vuati naatam̃oli wanogoe, po parati a;

¹⁹Go euga wo parati a ki shekel ni silver p̃onotia sikai, po dua tama ni nagoroi wanogoe asa, nalakena e mari nagisa sa e doko nagoroi mutawono ni Israel: go nae ega wo pei anagoroi; go naatam̃oli wanogoe e marisa doropusi a mau naaleatia mamau puti aneana.

²⁰Ma waina naleo wanogoe e pe vei lomau naga navaivaiana maga ni navei‐naatara‐ana eu da pei tea vap̃aiana mau doko nagoroi wanogoe:

²¹Ragi wanogoe euga viragi lua nagoroi wanogoe umai paki namata ni nasum̃a ki tamana, go naatam̃oli maga ni natokoana aneana euga wo nadi a ki vatu maga naga ega mate: nalakena e mari navei‐lala‐ana doko Israel, po maripele doko nasum̃a ki tamana: dapala nogoe p̃a wo mari puoli ki tea sa pa dua ki m̃aleoputo kakam̃a.

²²Waina naata sikai e pe vei tea vap̃aiana e one sikoti nagoroi sikai waina e laki paki anawota, ragi wanogoe eroga wo dua mate, naata waina e one sikoti nagoroi wanogoe, go nagoroi wanogoe: dapala nogoe p̃a wo mari puoli ki tea sa pa dua ki Israel.

²³Waina nagoroi mutawono sikai e doko waina e pe vei tea vasasokiana sua raki naanoai sikai, go waina naata sikai e pe vap̃ai a doko natokoana, po one sikoti a;

²⁴Ragi wanogoe kuga viragi lua sokota ki da paki namata‐pua ni natokoana wanogoe, go kuga nadi ra ki vatu maga naga eroga mate; naatara wanogoe, nalakena e da kuapioso mau ma e doko natokoana doko; go naanoai wanogoe, nalakena e mari sa ki nagoroi ki tea ni m̃aladigi ki nia: dapala nogoe p̃a wo mari puoli ki tea sa pa dua ki m̃aleoputo kakam̃a.

²⁵Ma waina naanoai sikai e pe vap̃ai naatara waina e pei tea vasasokiana sua, e pe toko vanua, go naanoai wanogoe e pe mari kasua ki nia, po one sikoti a; ragi wanogoe naanoai wanogoe waina e one sikoti a, ega sikina mate:

²⁶Ma p̃a ta mari te navatuna mau paki naatara wanogoe; te namarinaleosaana pataka ni namateana e da doko asa mau: nalakena dapala waina naata sikai e duleana dip̃a tea ni m̃aladigi ki nia, po maripunue a, naleo waia e dapala nogoe:

²⁷Nalakena e pap̃ai a doko vanua; nagoroi vasasokiana wanogoe e kuapioso, go tea waina ega mauti a, e dika sa.

²⁸Waina naanoai sikai e pe vap̃ai nagoroi mutawono sikai waina e ko da pei tea vasasokiana mau, go e pe vuati soki a, po one sikoti a, go ero pe vei tea vap̃aiana;

²⁹Ragi wanogoe naanoai wanogoe waina e one sikoti a, ega wo dua tama ni naatara wanogoe shekel ni silver rualima lima, go ega wo pei anagoroi, nalakena e mari sa ki nia; e marisa doropusi a mau naaleatia maga mamau puti aneana.

³⁰Naata sikai ega ta puati nagoroi ki tamana mau, go ega ta lagai nam̃asere ki tamana mau.