Read Nguna Togoa Etafe North DEUTERONOMY 23 Bible Online

DEUTERONOMY 23 - Nguna Togoa Etafe North bible

DEUTERONOMY 23

¹Tea waina e pe vei atavau sikai kite waina tea aneana e pe vei tea tovakotoviana, ega ta sili paki nasaisaiana ki Yehovah mau.

²Natunarau sikai ega ta sili paki nasaisaiana ki Yehovah mau; go pa pa paki tagona kerualima natuna maga euga ta sili paki nasaisaiana ki Yehovah mau.

³Tea ni naworawora ni Ammon sikai, go tea ni naworawora ni Moab sikai, ega ta sili paki nasaisaiana ki Yehovah mau; go pa pa paki tagona kerualima, sikai kakada ega ta sili paki nasaisaiana ki Yehovah mau pa pa ega tu mau du:

⁴Nalakena nara eu da sua mu napua mau ki navinaga go ki noai ragi waina ku m̃elu dua ki Ityipt umai; go nalakena eu sai ki ruku kakam̃a dua Balaam asa, natu ni Beor ni Pethor ni Mesopotamia, naga ega vasasa ki‐go.

⁵Ma Yehovah Sup̃e anigo e da daki dorogo paki Balaam mau; go Yehovah Sup̃e anigo e doa navasasakiana wanogoe e pei navasap̃iakiana sikai paki‐go, nalakena Yehovah Sup̃e anigo e dodomi ko.

⁶P̃a ta laaga natam̃ateana adeada go nawiaana adeada mau, naaleatia anigo maga mamau puti pa pa po du mau du.

⁷P̃a ta mamarago ki tea ni naworawora ni Edom mau; nalakena nae e pei taim̃a: p̃a ta mamarago ki tea ni naworawora ni Ityipt mau; nalakena ku pea pei nam̃enaki doko navanua aneana.

⁸Piakiki maga ni tagona ketolu waina eu madeada pakilina, nara euga wo sili paki nasaisaiana ki Yehovah.

⁹Ragi waina p̃a wo dave pano dip̃a tea kokona ki‐go maga doko tokora ni nam̃enakiana, p̃a tum̃am̃a pavaigoro ko pa dua ki sara naleo sa.

¹⁰Waina naata sikai kakamu e pe toko, waina e da dautau mau nalakena tea waina e pakilina ki nia p̃ogi, nae ega wo pano paki etaku ni tokora ni nam̃enakiana, go ega wo da sili paki tokora ni nam̃enakiana mau:

¹¹Ma ega wo doko naga ragi melu ega wo loloso noai: go edaku ki waina elo e musu go ega wo sili paki tokora ni nam̃enakiana.

¹²Go p̃a wo mari tokora ni nataveana sikai etaku ni tokora ni nam̃enakiana, waina p̃a wo paki asa pano:

¹³Go p̃a wo peani kali sikai pilake nalikau anigo maga; go ega wo doko, naga ragi waina p̃a wo dasake etaku, p̃a kili asa, go p̃a maradoa po doni tea waina e m̃elu ako:

¹⁴Nalakena Yehovah Sup̃e anigo e do surata usuraki tokora ni nam̃enakiana anigo, naga ega taulua ko, go naga ega vitua ki tea kokona ki‐go maga naraem̃a; nalakena tea wanogoe tokora ni nam̃enakiana anigo ega wo dapu: naga ega ta punusi tea waina e da dautau mau doko ako, po m̃elu dua ki‐go pano.

¹⁵Waina naviti sikai e pe sava dua ki nawota aneana pa punusi ko, p̃a ta pitua ki nia dua nawota aneana asa mau:

¹⁶Nae ega toko sikoti ko doko m̃aleoputo kakam̃a, tokora sikai waina ega matadoa e ki roara ni namata‐pua anigo maga, tokora sikai waina e midoaki m̃ata ki nia: p̃a ta diesoki a mau.

¹⁷Te nagoroi sikai ni Israel natuna maga ega ta pei nagoroi masausara mau, go te naanoai sikai ni Israel natuna maga ega ta pei tea masausara mau.

¹⁸P̃a ta dape namoriana ni nagoroi masausara kite namoriana ni naanoai masausara mau paki nasum̃a ki Yehovah Sup̃e anigo raki navivisaana sikai: nalakena nara dua ero pei tea mamaragokiana paki Yehovah Sup̃e anigo.

¹⁹P̃a ta pitua ki tea seakiana raki narogoviana paki taim̃a mau; narogoviana ni m̃ane, kite narogoviana ni navinaga, kite narogoviana ni te naleo mau waina e pei tea seakiana raki narogoviana:

²⁰Ku mariatae pitua ki tea seakiana raki narogoviana paki nam̃enaki; ma paki taim̃a p̃a ta pitua ki tea seakiana raki narogoviana mau: go Yehovah Sup̃e anigo ega vasap̃ia ki‐go ki sara naleo waina nam̃elearum̃a ega mari a, doko navanua waina p̃a wo paki asa po peani a.

²¹Waina ku pe sai te nasaiana sikai paki Yehovah Sup̃e anigo, p̃a ta mari daliali lagati dua e asa mau: nalakena Yehovah Sup̃e anigo e pe wo datagovi ko asa; go e pe wo pei namarinaleosaana sikai doko ako.

²²Ma waina ku pe tum̃am̃a dugoro ko po da sai mau, ega wo da pei namarinaleosaana sikai doko ako mau.

²³Tea waina e m̃elu nagolem̃a maga, tea wanogoe p̃a vavaigoro e po mari a; dakiusi waina ku sai paki Yehovah Sup̃e anigo, navituaana suasuakiana sikai, waina ku po sai a ki nawokam̃a.

²⁴Ragi waina p̃a wo umai paki roara ni vaine ki tea ni m̃aladigi ki‐go, ku mariatae gani nawa maga ni vaine pataka ni namasauana anigo; ma p̃a ta pai te seara mau paki nala anigo.

²⁵Ragi waina p̃a wo umai paki korn lawodu ki tea ni m̃aladigi ki‐go, ku mariatae lei m̃okai ni korn wanogoe ki nam̃elearum̃a; ma p̃a ta sai ki tea tagaukotovi paki korn lawodu ki tea ni m̃aladigi ki‐go mau.