Read Nguna Togoa Etafe North DEUTERONOMY 24 Bible Online

DEUTERONOMY 24 - Nguna Togoa Etafe North bible

DEUTERONOMY 24

¹Waina te naata e pe viragi te nagoroi po dawiri a, go e pe vakilina naga nagoroi wanogoe e da p̃ia mau namatana, nalakena e pe vap̃ai tea ni namaliereana doko asa, ragi wanogoe naata wanogoe ega wo maneana midiri tusi ni natoropusiana, po dua e asa nam̃elearuna, po dip̃aki lua e m̃elu dua ki nasum̃a aneana pano.

²Go ragi waina nagoroi wanogoe e po m̃elu dua ki nasum̃a aneana pano, e mariatae pano po laki paki naanoai p̃ota.

³Go waina anawota waina e pei tea edaku e pe karaikita e, po maneana midiri tusi ni natoropusiana po dua e asa nam̃elearuna, po dip̃aki lua e m̃elu dua ki nasum̃a aneana pano; kite waina anawota wanogoe e pe mate, waina e piragi a pei anagoroi;

⁴Anawota vea, waina e dip̃aki lua e pano, ega ta moro puati a mau naga ega vei anagoroi edaku ki waina e loa sua; nalakena naleo wanogoe e pei namamaragokiana narae ni Yehovah: go p̃a ta mari navanua ega mari naleo sa, navanua waina Yehovah Sup̃e anigo e dua ko asa naga ega vei naveanipiolikiana sikai.

⁵Waina te naata e pe tawiri te nagoroi vau, naata wanogoe ega wo da m̃elu pano sikoti tea ni navakalo maga mau, go ega wo da pei tea tip̃akiana ki te nawosiana mau: ega wo dum̃ana doko nasum̃a aneana natau sikai po pakale anagoroi waina e dawiri a.

⁶Te naata sikai ega wo da dape vatumaa ero dua kite vatumaa vakilagi ega vei nanadisokiana: nalakena e do dape namauriana ni naatam̃oli e pei nanadisokiana.

⁷Waina naata sikai e pe vei tea vap̃aiana e pe vanako te taina sikai tea ni Israel natuna maga, go e pe mari paki nia dapala waina e pei naviti, kite e pe sori a; ragi wanogoe naatam̃oli vanako wanogoe ega wo mate: dapala nogoe p̃a wo mari puoli ki tea sa m̃elu dua ki m̃aleoputo kakam̃a.

⁸P̃a vavaigoro, ragi ni nasasanaana ni navei‐lepero‐ana, naga p̃a wo leo parati ki m̃ata ki po mari tea mamau puti waina tea viri maga, tea ni naworawora ni Levi maga, euga wo pasa pisei ki mu ara: dapala waina kinau a dip̃aki da asa, dapala nogoe p̃a vavaigoro e, po mari a.

⁹P̃a midoaki parati ki tea waina Yehovah Sup̃e anigo e mari a paki Miriam doko napua ragi waina ku m̃elu dua ki Ityipt umai.

¹⁰Waina ku pe tua tea ni m̃aladigi ki‐go tea seakiana sikai, p̃a wo da sili paki nasum̃a aneana mau naga p̃a wo dape nanadisokiana aneana.

¹¹P̃a wo lawodu katama, go naata waina ku dua e tea seakiana ega wo dape nanadisokiana umai paki katama dua ko asa.

¹²Go waina naata wanogoe e pe vei tea tika, p̃a wo da maturu pilake nanadisokiana aneana:

¹³P̃a wo pitua liliua ki nanadisokiana wanogoe ragi waina elo ega musu, naga ega maturu pilake tea kovagoro aneana, po pasap̃ia ki‐go: go ega wo manigo pei namarinaleoleanaana narae ni Yehovah Sup̃e anigo.

¹⁴P̃a ta diesoki tea suasua vasadapuiana sikai waina e pei tea rogokitesa go tea tika, e pe vei taim̃a sikai, kite e pe vei nam̃enaki‐atatoko sikai waina e doko navanua anigo, roara ni namata‐pua anigo:

¹⁵Naaleatia aneana p̃a wo dua e namoriana aneana, go elo ega ta musugoro e mau; nalakena nae e pei tea tika, go e do lawo ki nap̃op̃ona doko asa: go mase e pe vioso paki Yehovah dip̃a ko, go e pe vei namarinaleosaana doko ako.

¹⁶Tamada maga euga wo da magi natuda maga pei tea maripunueana mau, go natuda maga euga wo da magi tamada maga pei tea maripunueana mau: sara naata sikasikai ega wo pei tea maripunueana dip̃a namarinaleosaana aneana.

¹⁷P̃a ta p̃elukidoa navasap̃otaeana ki nam̃enaki go ki namatapesu mau; go p̃a ta dape tea suniana ki nagoroi malepu naga ega vei nanadisokiana:

¹⁸Ma p̃a midoaki parati ki naga ku pea pei naviti doko Ityipt, go Yehovah Sup̃e anigo e daulua ko asa: nalakena tea wanogoe kinau a dip̃aki‐go naga p̃a wo mari naleo waia.

¹⁹Ragi waina p̃a wo dagaukotovi nalolovaeana anigo vanua anigo, go waina ku pe malio ki napu sikai doko vanua, p̃a ta moro pano naga p̃a wo dape a umai mau: ega wo doko naga ega wo pei agi nam̃enaki, go agi namatapesu, go agi nagoroi malepu: naga Yehovah Sup̃e anigo ega wo pasap̃ia ki nawosiana maga mamau puti ni nam̃elearum̃a maga.

²⁰Ragi waina p̃a wo sani nakau oliva anigo, p̃a ta sani arana maga sala kerua mau: ega wo doko naga ega wo pei agi nam̃enaki, go agi namatapesu, go agi nagoroi malepu.

²¹Ragi waina p̃a wo pai nawa ni vaine ni roara ni vaine anigo, p̃a ta moro pa vai sala kerua mau; ega wo doko naga ega wo pei agi nam̃enaki, go agi namatapesu, go agi nagoroi malepu.

²²Go p̃a midoaki parati ki naga ku pea pei naviti doko navanua ni Ityipt: nalakena tea wanogoe kinau e dip̃aki‐go naga p̃a wo mari naleo waia.