Read Nguna Togoa Etafe North DEUTERONOMY 25 Bible Online

DEUTERONOMY 25 - Nguna Togoa Etafe North bible

DEUTERONOMY 25

¹Waina navululuana sikai e pe toko namawota ni naatam̃oli dua, go ero umai paki navasap̃otaeana, go tea vasap̃otae maga eu pasap̃otae ra; ragi wanogoe euga wo mari leana ki naatam̃oli leana, po dip̃akotovi naatam̃oli sigisigileo;

²Go ega wo doko, waina naatam̃oli sigisigileo e pe vataka naga ega vei tea varatiana, naga tea vasap̃otae ega wo mari a ega one natano, po pei tea varatiana naraena, pataka ni nasigisigileoana aneana pae naveveana.

³Navaratiana rualima pati ega tua e asa, ega ta do liu sa mau: mase waina e pe to liu sa, po moro parati a do liu ki navaratiana laapa, taim̃a e pe takiusi waina e pe vei tea leosakiana namatam̃a.

⁴P̃a ta p̃auasi oks mau ragi waina e do pasi lesue korn.

⁵Waina tamataida ero pe tum̃ada doko sikoti ra, go sikai kakada e pe mate, go e dika natuna naanoai, nagoroi ki tea mate wanogoe ega wo da laki paki nam̃enaki sikai mau: tai ni anawota ega wo pa punusi a, po dawiri a ega vei anagoroi, po mari tea waina e one tai ni anawota one naga ega wo mari paki nia.

⁶Go ega wo doko, naga takalapa waina ega wo dape a, ega wo dape nagisa ni tea waina e mate, naga nagisana ega wo da puoli m̃elu dua ki Israel mau.

⁷Go waina naata wanogoe e pe ta masauna mau naga ega tawiri nagoroi ki taina, ragi wanogoe nagoroi ki taina ega wo sake paki namata‐pua pano punusi tea matua maga, po naga, Tai ni aguwota e karai magi taina sike nagisa Israel, e da suasua mari tea waina e one tai ni aguwota one naga ega mari a paki nau mau.

⁸Ragi wanogoe tea matua maga ni natokoana aneana euga wo soso e, po noa ki nia asa: go waina e pe lawodu, po naga, A da masau dawiri a mau;

⁹Ragi wanogoe nagoroi ki taina ega wo paki m̃aladigi ki nia narae ni tea matua maga, po peresi nam̃elevasiana aneana m̃elu dua ki nam̃elena, po daniu naraena: go ega wo pasadara, po naga, Tea wanogoe ega wo pei tea mariana paki naata waina e da davagi nasum̃a ki taina mau.

¹⁰Go nagisana ega wo pei tea sosoana Israel, ki Nasum̃a ni tea waina nam̃elevasiana aneana e pei tea veresiana.

¹¹Ragi waina naatam̃oli dua ero dum̃ada mari ra, go nagoroi ki sikai e pe umai paki m̃aladigi naga ega vualua anawota m̃elu dua ki nam̃elearu ni tea waina e do p̃okati a, go e pe sai ki naruna, po puasoki a ki tea tapu aneana:

¹²Ragi wanogoe p̃a wo daekotovi nam̃elearuna, go namatam̃a ega wo da maritadodomi a mau.

¹³P̃a ta peani vatu rowogi visarasara maga doko nala anigo mau, tea warua go tea kiki.

¹⁴P̃a ta peani vatu totowo visarasara maga doko nasum̃a anigo mau, tea warua go tea kiki.

¹⁵P̃a veani vatu totowo wialua go leana; p̃a veani tea rowogiana wialua go leana: naga naaleatia anigo maga euga wo laapa doko navanua waina Yehovah Sup̃e anigo e dua ko asa.

¹⁶Nalakena tea maga mamau puti waina eu do mari naleo maga wanogoe, go tea maga mamau puti waina eu do mari namarinaleotageleana, eu pei tea mamaragokiana paki Yehovah Sup̃e anigo.

¹⁷P̃a midoaki parati ki tea waina Amalek e mari a paki‐go napua ragi waina ku m̃elu dua ki Ityipt umai;

¹⁸Takana waina e sua ko napua, po atugi tea edaku mau kakam̃a maga, tea manainai maga mamau puti waina eu edakugoro ko, ragi waina ku manainai po mawosa; go e da matau ki Sup̃e mau.

¹⁹Nalakena tea wanogoe ega wo doko, ragi waina Yehovah Sup̃e anigo ega wo dua ko namaromaroana pa dua ki tea kokona ki‐go maga daliviri, navanua waina Yehovah Sup̃e anigo e dua ko asa ega vei naveanipiolikiana sikai naga p̃a wo peani a, ragi wanogoe p̃a wo kasilua namidoakiparatikiana ni Amalek m̃elu dua ki etano ni nakoroatelagi; p̃a ta malio ki nia mau.