Read Nguna Togoa Etafe North DEUTERONOMY 26 Bible Online

DEUTERONOMY 26 - Nguna Togoa Etafe North bible

DEUTERONOMY 26

¹Go ega wo doko, ragi waina p̃a wo umai paki navanua waina Yehovah Sup̃e anigo e dua ko asa ega vei naveanipiolikiana sikai, go p̃a wo peani a, po doko asa doko;

²Naga p̃a wo dape takavea ni nawa maga mamau puti ni natano, waina p̃a wo piragi ra umai pae navanua waina Yehovah Sup̃e anigo e dua ko asa; go p̃a wo pai a nala sikai po pano paki tokora waina Yehovah Sup̃e anigo ega matadoa e naga nagisana ega toko asa doko.

³Go p̃a wo pa punusi tea viri waina ega wo doko naaleatia maga wanogoe, po noa ki nia, Naaleatia waia a noasai paki Yehovah Sup̃e anigo naga a po umai paki navanua waina Yehovah e pivisa paki tamagida maga naga ega tua gida asa.

⁴Go tea viri wanogoe ega wo dape lua nala wanogoe pae nam̃elearum̃a, po doropusi a kivea ki tagura ki Yehovah Sup̃e anigo.

⁵Go p̃a wo pasadara po noa narae ni Yehovah Sup̃e anigo, Tamagu e pei tea ni Siria sikai, tea vanovano, go e siwo paki Ityipt pano, po m̃enaki doko tokora wanogoe doko, nara eu pisa maau; go e doko asa doko pa pa e po pei nalauna warua, tea kasua, go ni naatam̃oli laapa:

⁶Go tea ni Ityipt maga eu mari sa ki gida, po mari gida tu dogokitesa, po dua gida nawosiana kasua:

⁷Go tu pioso paki Yehovah, Sup̃e ki tamagida maga, go Yehovah e dogo nadaleogida, po punusi narogokitesaana anigida, go nawosiana anigida, go nariesokiana anigida:

⁸Go Yehovah e piragi lua gida m̃elu dua ki Ityipt umai ki nam̃elearuna kasua, go ki naru saikiana, go ki namataukiana warua, go ki navaivaiana maga, go ki tea ni namagaana maga:

⁹Go e piragi gida umai paki tokora waia go e dua gida navanua waia, navanua waina e do sara ki milk go ki honi.

¹⁰Go ragi waia, p̃a leo, a po dape takavea ni nawa ni natano umai, waina nigo Yehovah O, ku dua au asa. Go p̃a toropusi a narae ni Yehovah Sup̃e anigo, po lotu narae ni Yehovah Sup̃e anigo:

¹¹Go p̃a wo laelaea ki sara naleo wia waina Yehovah Sup̃e e dua ko asa, po dua tea ni nasum̃a anigo, nigo go tea ni naworawora ni Levi, go nam̃enaki waina e doko m̃aleoputo kakam̃a.

¹²Ragi waina p̃a wo pitua ki sua kekerualima mamau puti ni navinaga anigo natau ketolu, waina e pei natau ni navituaana ni kekerualima, ragi wanogoe p̃a wo dua tea ni naworawora ni Levi asa, go nam̃enaki, go namatapesu, go nagoroi malepu, naga euga wo ganikani roara ni namata‐pua anigo maga, po puka;

¹³Go p̃a wo noa narae ni Yehovah Sup̃e anigo, p̃a naga, A po dape lua naleo tapu maga m̃elu dua ki nasum̃a aginau, po moro pitua ki da paki tea ni naworawora ni Levi, go paki nam̃enaki, go paki namatapesu, go paki nagoroi malepu, dapala natip̃akiana mamau anigo waina ku dip̃aki nau asa: A da dapiri te natip̃akiana anigo mau, go a da malio ki da mau:

¹⁴A da gani te seara kakada ragi ni nasusueana aginau mau, go a da dape lua te seara kakada ragi waina a loa mau, go a da pitua ki te seara kakada nalo ni tea mate mau: a dogo parati ki nadaleo ni Yehovah Sup̃e aginau, go a po mari dapala waina ku dip̃aki nau asa.

¹⁵P̃a leo siwo pae natokoana tapu anigo, pae nakoroatelagi, po pasap̃ia ki narei anigo Israel, go natano waina ku dua gami asa, dapala waina ku pivisa paki tamagami maga asa navanua waina e do sara ki milk go ki honi.

¹⁶Naaleatia waia Yehovah Sup̃e anigo e dip̃aki‐go naga p̃a wo mari natawonakiana maga waia go navasap̃otaeana maga waia: nalakena tea wanogoe p̃a vavaigoro ra po mari ra ki nap̃op̃om̃a mamau, go ki naatam̃a mamau.

¹⁷Naaleatia waia ku noakisai naga Yehovah e pei Sup̃e anigo, go naga p̃a wo surata napua aneana maga, po pavaigoro natawonakiana aneana maga, go natip̃akiana aneana maga, go navasap̃otaeana aneana maga, po dogo parati ki nadaleona:

¹⁸Go naaleatia waia Yehovah e noakisai naga nigo ku pei narei matadoaana aneana, dapala waina e sai a paki‐go, go naga p̃a wo pavaigoro natip̃akiana aneana maga mamau puti;

¹⁹Go naga ega wo mari ko p̃a wo pakilagi liu nalauna maga mamau puti waina e mari ra, ki nasamasamaniana, go ki nagisa, go ki nadodomadaganiana; go naga p̃a wo pei narei tapu ki Yehovah Sup̃e anigo, dapala waina e noa e.