Read Nguna Togoa Etafe North DEUTERONOMY 27 Bible Online

DEUTERONOMY 27 - Nguna Togoa Etafe North bible

DEUTERONOMY 27

¹Go Moses go tea matua maga ni Israel eu dip̃aki narei, po naga, Kuga vavaigoro natip̃akiana mamau waina kinau a dip̃aki mu asa naaleatia waia.

²Go ega wo pakilina, naaleatia waina kuga wo duagoto Yordan paki navanua waina Yehovah Sup̃e anigo e dua ko asa, naga p̃a wo manigo lawo ki vatu warua maga, po puluti ra ki napulu:

³Go p̃a midiri sara navasaana ni nawotaeana waia ara, edaku ki waina p̃a wo duagoto sua; naga p̃a vaki navanua waina Yehovah Sup̃e anigo e dua ko asa, navanua waina e do sara ki milk go ki honi, dapala waina Yehovah, Sup̃e ki tamam̃a maga, e sai a paki‐go.

⁴Go ega wo doko, edaku ki waina kuga wo duagoto sua Yordan, naga kuga lawo ki vatu maga wanogoe, waina a dip̃aki mu asa naaleatia waia, doko tava Ebal, go p̃a vuluti ra ki napulu.

⁵Go tokora wanogoe p̃a magi Yehovah Sup̃e anigo davagi tagura ni naviriana sikai, tagura ni vatu maga: p̃a ta sike airon paki asa mau.

⁶P̃a tavagi tagura ni naviriana ki Yehovah Sup̃e anigo ki vatu maga waina eu da pei tea taeana mau: go p̃a vitua ki navituaana tap̃arakiana maga asa paki Yehovah Sup̃e anigo:

⁷Go p̃a vitua ki navituaana ni natam̃ateana maga, po ganikani tokora wanogoe; go p̃a laelaea narae ni Yehovah Sup̃e anigo.

⁸Go p̃a midiri m̃ata ki sara navasaana ni nawotaeana waia euga toko vatu maga wanogoe.

⁹Go Moses go tea viri maga, tea ni naworawora ni Levi, eu pasa paki Israel mamau, po naga, P̃a vunuta, po daki dorogo, Israel O; naaleatia waia ku po pei narei ki Yehovah Sup̃e anigo.

¹⁰Nalakena tea wanogoe, p̃a rogo parati ki nadaleo ni Yehovah Sup̃e anigo, po mari natip̃akiana aneana maga go natawonakiana aneana maga, waina kinau a dip̃akigo asa naaleatia waia.

¹¹Go naaleatia sikai maau wanogoe Moses e dip̃aki narei,

¹²po naga, Tea maga waia euga wo lawodu tava Cerisim po pasa m̃ata ki narei, ragi waina kuga wo duagoto sua Yordan; Simeon, go Levi, go Yudah, go Issakar, go Yosef, go Benyamin:

¹³Go tea maga waia euga wo lawodu tava Ebal po pasasa ki narei, Reuben, Cad, go Asher, go Sebulun, Dan, go Naftali.

¹⁴Go tea maga ni naworawora ni Levi euga wo pasadara ki nadaleo kasua, po noa ki naatam̃oli maga mamau puti ni Israel,

¹⁵Navasasakiana ega wo doko naata waina e do mari nasup̃e taeana kite takiana sikai, tea mamaragokiana paki Yehovah, nawosiana ni nam̃elearu ni tea vei mataisau, po do lawo ki sili ki nia. Go narei mamau euga wo pasadara po naga, Amen.

¹⁶Navasasakiana ega wo doko naata waina e dododao tamana go p̃ilana. Go narei mamau euga wo naga, Amen.

¹⁷Navasasakiana ega wo doko naata waina e disua ki kokoi ki tea ni m̃aladigi ki nia. Go narei mamau euga wo naga, Amen.

¹⁸Navasasakiana ega wo doko naata waina e mari tea kesa e surata sasap̃o m̃elu dua ki napua. Go narei mamau euga wo naga, Amen.

¹⁹Navasasakiana ega wo doko naata waina e p̃elukidoa ki navasap̃otaeana ki nam̃enaki, go ki namatapesu, go ki nagoroi malepu. Go narei mamau euga wo naga, Amen.

²⁰Navasasakiana ega wo doko naata waina e one sikoti nagoroi ki tamana; nalakena e po lagai nam̃asere ki tamana. Go narei mamau euga wo naga, Amen.

²¹Navasasakiana ega wo doko naata waina e one sikoti te nalo tuavati. Go narei mamau euga wo naga, Amen.

²²Navasasakiana ega wo doko naata waina e one sikoti gorena, natu ni tamana, kite natu ni p̃ilana. Go narei mamau euga wo naga, Amen.

²³Navasasakiana ega wo doko naata waina e one sikoti m̃ona. Go narei mamau euga wo naga, Amen.

²⁴Navasasakiana ega wo doko naata waina e atugi panako tea ni m̃aladigi ki nia. Go narei mamau euga wo naga, Amen.

²⁵Navasasakiana ega wo doko naata waina e dape navago naga ega maripunue naatam̃oli wia. Go narei mamau euga wo naga, Amen.

²⁶Navasasakiana ega wo doko naata waina e da lawosoki navasaana maga ni nawotaeana waia ki narogoparatikiana. Go narei mamau euga wo naga, Amen.