Read Nguna Togoa Etafe North DEUTERONOMY 28 Bible Online

DEUTERONOMY 28 - Nguna Togoa Etafe North bible

DEUTERONOMY 28

¹Go ega wo pakilina, waina ku pe rogo parati ki m̃ata ki nadaleo ni Yehovah Sup̃e anigo, po pavaigoro po mari natip̃akiana aneana maga mamau puti waina a dip̃aki‐go asa naaleatia waia, naga Yehovah Sup̃e anigo ega wo sike ko pakilagi dap̃au nalauna maga mamau puti ni maramana:

²Go waina ku pe rogo parati ki nadaleo ni Yehovah Sup̃e anigo, navasam̃atakiana maga mamau puti waia euga wo pa parati ki‐go, po doko ako doko.

³P̃a wo pei tea vasam̃atakiana natokoana, go p̃a wo pei tea vasam̃atakiana vanua.

⁴Nawa ni nap̃atokom̃a ega wo pei tea vasam̃atakiana, go nawa ni natano anigo, go nawa ni katel anigo, go navavakaworaana ni navata anigo, go tea vusavusa maga ni navata ni shiip anigo.

⁵Nala anigo go siloa anigo eroga wo pei tea vasam̃atakiana.

⁶P̃a wo pei tea vasam̃atakiana ragi waina p̃a wo umai paki ekopu, go p̃a wo pei tea vasam̃atakiana ragi waina p̃a wo dave pano.

⁷Yehovah ega wo mari tea kokona ki‐go maga euga wo duleana dip̃a ko po pei tea atugiana naraem̃a: euga wo dave umai dip̃a ko pae napua sikai maau, go euga wo sava pa dua ki naraem̃a pano pae napua larua.

⁸Yehovah ega wo dip̃aki navasap̃iakiana ega toko nasum̃a ni korn anigo maga, go sara nawosiana ni nam̃elearum̃a; go ega wo pasa p̃ia ki‐go navanua waina Yehovah Sup̃e anigo e dua ko asa.

⁹Yehovah ega wo lawo‐ki‐laketoko ako p̃a wo pei narei tapu aneana, dapala waina e pivisa asa paki‐go; waina ku pe vavaigoro natip̃akiana maga ki Yehovah Sup̃e anigo, po surata napua aneana maga.

¹⁰Go narei maga mamau puti ni maramana euga wo punusi naga ku pei tea sosoana ki nagisa ni Yehovah; go euga wo matau ki‐go.

¹¹Go Yehovah ega wo mari narisup̃iaana anigo ega wo laapa, ki nawa ni nap̃atokom̃a, go ki nawa ni katel anigo, go ki nawa ni natano anigo, doko navanua waina Yehovah e pivisa paki tamam̃a maga asa naga ega tua ko asa.

¹²Yehovah ega wo manigo p̃olagati nasum̃a aneana ni naleo tauakiana maga nakoroatelagi, po pitua ki usa ni navanua anigo ragi kakana, po pasa p̃ia ki nawosiana mamau ni nam̃elearum̃a: go p̃a wo pitua ki tea seakiana paki nalauna laapa, ma p̃a wo da sea mau.

¹³Go waina ku pe rogo parati ki natip̃akiana maga ki Yehovah Sup̃e anigo, waina a dip̃aki‐go asa naaleatia waia, po pavaigoro ra po mari ra, Yehovah ega wo mari ko p̃a wo pei nap̃au, po da pei napue mau; go p̃a wo doko elagi sikina, go p̃a wo da doko etano mau;

¹⁴Go waina ku pe ta dalele mau m̃elu dua ki te navasaana waina a dip̃aki‐go asa naaleatia waia, paki taleva ni matua, kite paki taleva ni mawiri, po dausi sup̃e p̃ota maga po madeada suasua.

¹⁵Ma ega wo pakilina, waina ku pe ta dogo parati ki nadaleo ni Yehovah Sup̃e anigo mau, po pavaigoro po mari natip̃akiana aneana maga go natawonakiana aneana maga waina kinau a dip̃aki‐go asa naaleatia waia; naga sara navasasakiana maga mamau puti waia euga wo pa parati ki‐go po doko ako doko.

¹⁶P̃a wo pei tea vasasakiana natokoana, go p̃a wo pei tea vasasakiana vanua.

¹⁷Nala anigo go siloa anigo eroga wo pei tea vasasakiana.

¹⁸Nawa ni nap̃atokom̃a ega wo pei tea vasasakiana, go nawa ni natano anigo, go navavakaworaana ni navata anigo, go tea vusavusa maga ni navata ni shiip anigo.

¹⁹P̃a wo pei tea vasasakiana ragi waina p̃a wo umai paki ekopu, go p̃a wo pei tea vasasakiana ragi waina p̃a wo dave pano.

²⁰Yehovah ega wo dip̃aki navasasakiana paki‐go, go navinovinoiana, go navasakasuaana, doko sara nawosiana ni nam̃elearum̃a pa pa p̃a wo pei tea marisasakiana, go pa pa p̃a wo m̃araverave pano puoli; nalakena namariana sa anigo waina ku doropusi au.

²¹Yehovah ega wo mari nasasanaana ni namateana ega wo puluti ko, pa pa p̃a wo mavunuvunu m̃elu dua ki navanua waina p̃a vaki asa pano naga p̃a veani a.

²²Yehovah ega wo atugi ko ki nasasanaana ni rosa, go ki namasakiana, go ki natap̃anu p̃anuana, go ki navitivitinuana, go ki nagaragaraana, go ki nalagaiana, go ki navusivusigaana; go euga wo kopasi ko pa pa p̃a wo pano puoli.

²³Go nakoroatelagi anigo waina e doko elagi ki‐go, ega wo pei brass, go navanua waina e doko etano ki‐go ega wo pei airon.

²⁴Yehovah ega wo mari usa ni navanua anigo ega vei nop̃o go nam̃otam̃ota: ega wo pae nakoroatelagi siwo umai po lawo ko pa pa p̃a wo pei tea maripuolikiana.

²⁵Yehovah ega wo mari ko p̃a vei tea atugiana narae ni tea kokona ki‐go maga: P̃a wo dave pano pae napua sikai maau dip̃a ra, po sava dua ki naraeda pano pae napua larua: go p̃a wo pei tea kopasiluaana ki sara nalauna maga mamau puti ni maramana.

²⁶Go nap̃atoko mate kakam̃a ega wo pei tea kaniana ki sara manu maga ni namalopa, go ki sara nalo tuavati maga ni maramana, go tea waina ega kopasi lua ra ega wo dika.

²⁷Yehovah ega wo atugi ko ki namanuka ni Ityipt, go ki topu, go ki nakarokaroana, go ki namakalakalaana, waina ku marisa pei tea maripauriana asa mau.

²⁸Yehovah ega wo atugi ko ki naroropaana go ki nakesaana, go ki p̃op̃o vinovinoi:

²⁹Go p̃a wo dotogo aleati matua dakiusi waina tea kesa e do dotogo namaligo, go p̃a wo da disu p̃ia ki natomariana anigo maga mau: go p̃a wo pei tea riesokiana mau po pei tea marisakiana, go tea waina ega mautipauri ko ega wo dika.

³⁰P̃a wo dawiri nagoroi sikai, go naanoai p̃ota ega wo one sikoti a: p̃a wo davagi nasum̃a sikai, go p̃a wo da doko asa doko mau: p̃a wo lawo roara sikai ni vaine, go p̃a wo da gani nawana mau.

³¹Oks anigo ega wo pei tea maripunueana naraem̃a, go p̃a wo da gani a mau: ass anigo ega wo pei tea vuati‐kasua‐kiana m̃elu dua ki naraem̃a, go ega wo da moro pei tea vitua‐ki‐liliua‐kiana paki‐go mau: shiip anigo maga euga wo pei tea vituakiana paki tea kokona ki‐go maga, go tea waina ega mautipauri ko ega wo dika.

³²Natum̃a naanoai maga go natum̃a nagoroi maga euga wo pei tea vituakiana paki tea ni nalauna p̃ota, go namatam̃a eroga wo punusi a, po sirinopu nalo kakada naaleatia mamau: go nakasuaana ni nam̃elearum̃a ega wo pei tea m̃oli.

³³Nalauna sikai waina ku da atae a mau, ega wo gani nawa ni natano anigo go ni sara nawosiana anigo maga; go p̃a wo pei tea riesokiana mau po pei tea marip̃oraworaeana sara ragi:

³⁴Go p̃a wo daratara nalakena tea waina namatam̃a eroga wo punusi a.

³⁵Yehovah ega wo atugi ko ki namanuka sa waina e marisa apu mau, napatuam̃a maga go natuam̃a, pae nam̃ele natuam̃a pa pa paki nam̃asua ni nap̃aum̃a.

³⁶Yehovah ega wo piragi ko, nigo ma nawota anigo waina p̃a wo sike a dap̃au ko, umai paki nalauna sikai waina ku da pea atae a mau, nigo go tamam̃a maga; go tokora wanogoe p̃a wo magi sup̃e p̃ota maga suasua, sup̃e maga ni nakau go ni vatu.

³⁷Go p̃a wo pei tea ni namatakuana sa, go tea ni naluluakia, go tea ni navasasakiana m̃aleoputo ni narei maga tokora waina Yehovah ega wo doropusi ko asa.

³⁸P̃a wo dape sara naleo lawoana laapa pano paki vanua, ma p̃a wo dape tea kiki liliu umai; nalakena midiri ega wo gani a.

³⁹P̃a wo lawo roara maga ni vaine po mari usi ra, ma p̃a wo da munu waine kakana mau, kite lei nawana mau; nalakena sukai ega wo gani ra.

⁴⁰Nakau maga ni oliva euga wo doko usuraki kokoi anigo maga mamau puti, ma p̃a wo da dum̃am̃a puvurai ki‐go ki naroro kakana mau; nalakena nawa ni oliva anigo ega wo m̃alesu.

⁴¹P̃a wo pesi natu naanoai maga go natu nagoroi maga, ma euga wo da pei tea anigo mau; nalakena euga wo pei tea viragi‐luapavakotokiana pano.

⁴²Sara nawatikau anigo maga, go nawa ni natano anigo, midiri ega wo gani puti ra.

⁴³Nam̃enaki waina e doko m̃aleoputo kakam̃a ega wo sake pakilagi liu ko, ega moro pakilagi po moro pakilagi liu; go nigo p̃a wo siwo pakitano, p̃a wo pakitano po moro pakitano mau.

⁴⁴Nae ega wo pitua ki tea seakiana paki‐go, ma nigo p̃a wo da sea paki nia mau: nae ega wo pei nap̃au, go nigo p̃a wo pei napue.

⁴⁵Go sara navasasakiana maga mamau puti euga wo pakilina ki‐go, po kopasi ko, po pa parati ki‐go, pa pa p̃a wo pei tea maripuolikiana; nalakena ku da dogo parati ki nadaleo ni Yehovah Sup̃e anigo mau, po pavaigoro natip̃akiana aneana maga go natawonakiana aneana maga waina nae e dip̃aki‐go ara:

⁴⁶Go euga wo pei navaivaiana go tea ni namagaana doko ako go doko naworaworam̃a pa pa po du mau du:

⁴⁷Nalakena ku da magi Yehovah Sup̃e anigo suasua pilake nalaelaeaana go ki p̃op̃o wia, nalo ni nalapalapaana ni sara naleo:

⁴⁸Nalakena tea wanogoe p̃a wo magi tea kokona ki‐go maga suasua waina Yehovah ega wo dip̃aki da paki‐go, ki navitoloana, go ki namadouana, go ki nam̃alam̃alaana, go ki natikaana ni sara naleo: go ega wo doropusi nakau ni nanoa, tea ni airon, ega wo doko nanoam̃a, pa pa ega wo mari puoli ki‐go.

⁴⁹Yehovah ega wo piragi nalauna sikai pae uvea umai dip̃a ko, pae namatap̃ago ni maramana dakiusi waina ikila e do diri; nalauna sikai waina ku da atae masileo adeada mau;

⁵⁰Nalauna rae kasua sikai waina ega wo midoaki p̃alo ki tea matua maga, po da midoaki m̃ata ki tea vusavusa maga mau:

⁵¹Go ega wo gani nawa ni katel anigo, go nawa ni natano anigo, pa pa p̃a wo pei tea maripuolikiana: go ega wo da manigo doropusi korn, kite waine, kite naroro, kite nawa ni katel anigo, kite tea vusavusa ni navata ni shiip anigo, pa pa p̃a wo pei tea maripuolikiana.

⁵²Go ega wo kelugoro ko doko sara namata‐pua anigo maga, pa pa p̃aaka vakilagi anigo maga waina ku pavatu ara euga wo dowo puti usuraki navanua mamau anigo: go ega wo kelugoro ko doko sara namata‐pua anigo maga usuraki navanua mamau anigo waina Yehovah Sup̃e anigo e dua ko asa.

⁵³Go p̃a wo gani nawa ni nap̃atokom̃a, nap̃okasi ni natum̃a naanoai maga go ni natum̃a nagoroi maga waina Yehovah Sup̃e anigo e dua ko ara; doko nakelugoroana go doko sogi waina tea kokona ki‐go maga euga wo sogi p̃onoti ko asa.

⁵⁴Naata waina e matemate doko m̃aleoputo kakamu, go waina e p̃ia liu, namatana ega wo sa ki taina, go ki nagoroi ki narum̃ana, go ki namagovai ni natuna maga waina eu pei namagovai doko:

⁵⁵Go ega wo da dua sikai kakada te nap̃okasi ni natuna maga mau waina ega wo gani a, nalakena te navatuna e da moro maneana doko mau; doko nakelugoroana, go doko sogi waina tea kokona ki‐go ega wo sogi p̃onoti ko asa doko sara namata‐pua anigo maga.

⁵⁶Nagoroi matemate go wia liu doko m̃aleoputo kakam̃a, waina e da lawo ki nam̃ele natuana natano nalo ni namatemateana go nawialiuana, namatana ega wo sa ki naanoai ni narum̃ana, go ki natuna naanoai go ki natuna nagoroi;

⁵⁷Go ki napura waina e m̃elu navilana, go ki natuna maga waina ega wo pisola ki da; ega wo gani sili ki da nalakena natikaana ni sara naleo: doko nakelugoroana, go doko sogi waina tea kokona ki‐go ega wo sogi p̃onoti ko asa doko namata‐pua anigo maga.

⁵⁸Waina ku pe wo da pavaigoro po da mari pataka ni sara navasaana maga ni nawotaeana waia waina eu pei tea midiriana doko tusi waia, naga p̃a wo matau ki nagisa samasamaniana go mataukiana, Yehovah Sup̃e anigo:

⁵⁹Ragi wanogoe Yehovah ega wo mari nasasanaana maga ni namateana anigo euga wo pei tea ni nam̃anaunauana, go nasasanaana ni namateana ni naworaworam̃a, nasasanaana warua maga ni namateana, go waina euga wo doko mau doko, go nasasanaana sa maga waina euga wo doko mau doko.

⁶⁰Go ega wo moro piragi liliu paki‐go nasasanaana maga ni namateana mamau puti ni Ityipt, waina ku matau ki nia; go euga wo puluti ko.

⁶¹Go sara namasakiana, go sara nasasanaana sa, waina e da pei tea midiriana mau tusi ni nawotaeana waia, nara ma, Yehovah ega wo piragi ra paki‐go, pa pa p̃a wo pei tea maripuolikiana.

⁶²Go kuga wo pei namagovai pisa maau sa doko, ma sala vea ku laapa dapala m̃asoe maga ni nakoroatelagi; nalakena ku da dogo parati ki nadaleo ni Yehovah Sup̃e anigo mau.

⁶³Go ega wo pakilina, naga dapala waina Yehovah e maro nalo kakamu, po mari p̃ia ki mu, po mari mu ku disu po laapa; dapala nogoe Yehovah ega wo maro nalo kakamu, po mari sa ki mu, po mari puoli ki mu; go kuga wo pei tea vakudakatiana pa dua ki navanua waina p̃a wo paki asa pano naga p̃a veani a.

⁶⁴Go Yehovah ega wo daperavera ki‐go usuraki narei maga mamau puti pae namatap̃ago sikai ni maramana pa pa paki namatap̃agona kerua; go tokora wanogoe p̃a wo magi sup̃e p̃ota maga suasua, sup̃e maga ni nakau go ni vatu, waina ku da atae ra mau, nigo go tamam̃a maga.

⁶⁵Go doko m̃aleoputo ni nalauna maga wanogoe, p̃a wo da pap̃ai namaromaroana mau, go nawoka nam̃elem̃a ega wo da maromaro mau: go tokora wanogoe Yehovah ega wo dua ko p̃op̃o duruuru, go mata siri, go naatana manainai:

⁶⁶Go namauriana anigo ega wo liko dau naraem̃a; go p̃a wo mataku p̃ogi go aleati, go p̃a wo dika ki nasaralomauana nalo ni namauriana anigo:

⁶⁷Malip̃ogi p̃a wo noa, Ko, e pe vei ragi melu! Go ragi melu p̃a wo noa, Ko, e pe vei malip̃ogi! Nalakena namatakuana ni nap̃op̃om̃a, go nalakena tea waina namatam̃a ega wo punusi a.

⁶⁸Go Yehovah ega wo moro piragi ko liliu pae rarua maga paki Ityipt, pae napua waina e pea noa ki sua ko asa, P̃a wo da moro punusi a mau: go tokora wanogoe kuga wo dum̃amu sori mu asa paki tea kokona ki mu maga, kuga wo pei naviti naanoai maga, go naviti nagoroi maga, go tea waina ega vakotovi mu ega wo dika.