Read Nguna Togoa Etafe North DEUTERONOMY 29 Bible Online

DEUTERONOMY 29 - Nguna Togoa Etafe North bible

DEUTERONOMY 29

¹Tea maga waia eu pei navasaana maga ni navasasokiana waina Yehovah e dip̃aki Moses asa, naga ega mari a paki Israel natuna maga navanua ni Moab, edaku ki navasasokiana waina e pea mari a paki da doko Horeb.

²Go Moses e soso saisai ki Israel mamau, po noa ki da, e naga, Nimu ku punusi tea mamau puti waina Yehovah e mari a naraemu navanua ni Ityipt, paki Faraoh go paki tea suasua aneana maga mamau puti, go paki navanua mamau aneana;

³Namaridogoana warua maga waina namatam̃a eu punusi ra, go navaivaiana maga, go tea ni namagaana warua maga wanogoe:

⁴Ma Yehovah e da dua mu p̃op̃o atae, kite mata leo, kite daliga rogo, pa pa paki naaleatia waia.

⁵Go kinau a maraki mu natau rualima pati masop̃alo: tea suniana animu maga eu da disu duai mau, go nam̃elevasiana anigo e da disu duai mau.

⁶Ku da gani bred, go ku da munu waine kite namunuana kasua mau: naga kuga atae naga kinau a pei Yehovah Sup̃e animu.

⁷Go ragi waina ku umai sua paki tokora waia, Sihon nawota ni Heshbon, go Ok nawota ni Bashan, ero dave umai dip̃a gida ki navakalo, go tu atugi ra:

⁸Go tu dape navanua adeada po pitua ki nia e pei naveanipiolikiana sikai paki tea ni naworawora ni Reuben, go paki tea ni naworawora ni Cad, go paki namagovai ni tea ni naworawora ni Manasseh.

⁹Nalakena tea wanogoe kuga vavaigoro navasaana maga ni navasasokiana waia po mari ra, naga kuga risu p̃ia ki sara nawosiana waina kuga wo mari a.

¹⁰Naaleatia waia ku lawodu puti narae ni Yehovah Sup̃e animu; nap̃aumu maga, go naworaworamu maga, go tea matua animu maga, go tasiga animu maga, go naatam̃oli maga mamau puti ni Israel.

¹¹Go piakirikiri animu maga, go nagoroi animu maga, go nam̃enaki anigo waina e doko m̃aleoputo ni tokora ni nam̃enakiana anigo maga, tea tae nakapu anigo, go tea vautui noai anigo:

¹²Naga p̃a sili paki navasasokiana ki Yehovah Sup̃e anigo, go paki navivisaana aneana, waina Yehovah Sup̃e anigo e mari a paki‐go naaleatia waia:

¹³Naga ega lawosoki ko naaleatia waia p̃a wo maneana pei narei sikai, go naga nae ega wo manigo pei Sup̃e sikai, dapala waina e noa ki‐go asa, go dapala waina e pivisa paki tamam̃a maga asa, paki Abraham, go paki Isaak, go paki Yakob.

¹⁴Go a da mari navasasokiana waia go navivisaana waia paki mu sikimu mau;

¹⁵Ma paki tea waina e lawodu nea sikoti gida naaleatia waia narae ni Yehovah Sup̃e anigida, go paki tea waina e da sikoti gida nea naaleatia waia mau:

¹⁶(Nalakena nimu ku atae takana waina tu doko navanua ni Ityipt doko; go takana waina tu surata duaduru umai m̃aleoputo ni nalauna maga waina ku surata duaduru ara;

¹⁷Go ku punusi tea mamaragokiana adeada maga, go nasup̃e adeada maga, tea ni nakau go ni vatu, go ni silver go ni kold, waina eu doko m̃aleoputo kakada:)

¹⁸Mase te naanoai, kite te nagoroi, kite te namatarau, kite te naworawora, e pe toko m̃aleoputo kakamu, waina e pe roa nap̃op̃ona naaleatia waia m̃elu dua ki Yehovah Sup̃e anigida, po pano po magi sup̃e maga ni nalauna maga wanogoe suasua; mase te nakoa e pe toko m̃aleoputo kakamu waina e do pitua ki noai kokona go nakokonae;

¹⁹Go e pe vakilina, ragi waina e pe rogo navasaana maga ni navasasakiana waia, naga e pe tum̃ana pasa p̃ia ki nia nap̃op̃ona, po naga, A do surata nakasuaana ni nap̃op̃ogu naga aga marisasa ki naleo mamau puti, ma aga veani natam̃ateana:

²⁰Yehovah ega wo da maneana midoakikorokoro e mau, ma namaetoana ki Yehovah go natotowo‐kasua‐ana aneana eroga wo pavaga dip̃a naatam̃oli wanogoe, go sara navasasakiana mamau waina eu pei tea midiriana doko tusi waia euga wo dowo asa, go Yehovah ega wo kasi lua nagisana pa dua ki etano ni nakoroatelagi.

²¹Go Yehovah ega wo pualua e m̃elu dua ki naworawora maga mamau puti ni Israel paki tea sa, pataka ni navasasakiana maga mamau puti ni navasasokiana waina e pei tea midiriana doko tusi ni nawotaeana waia.

²²Go tagona waina ega wo edaku umai, natumu maga waina euga wo duleana edaku ki mu, go nam̃enaki waina ega wo pae navanua sikai ni uvea umai, euga wo noa, ragi waina euga wo punusi naatugiana maga ni navanua wanogoe, go nasasanaana maga waina Yehovah e mari a e sasana asa;

²³Go naga navanua mamau wanogoe e pei brimstone, go natasimena, go navivitinuana kasua, navanua waina eu marisa sapura ki asa mau, go waina e da pisou mau, go waina nam̃enau e da p̃ora asa mau, dakiusi natap̃olosiwoana ki Sodom go Comorrah, Admah go Seboim, waina Yehovah e dap̃olosiwo ki da ki namaetoana aneana, go ki namaritausuana aneana:

²⁴Go nalauna maga mamau puti euga wo naga, Ekasava Yehovah e mari dapala nogoe paki navanua waia? Navivitinuana ni namaetoana warua waia e pei nasava?

²⁵Ragi wanogoe naatam̃oli maga euga wo naga, Nalakena eu doropusi navasasokiana ki Yehovah, Sup̃e ki tamada maga, waina e mari a paki da ragi waina e piragi lua ra m̃elu dua ki navanua ni Ityipt umai;

²⁶Go eu pano po magi sup̃e p̃ota maga suasua, po lotu ki da, sup̃e maga waina eu da atae ra mau, go waina nae e da dua ra asa mau:

²⁷Nalakena tea wanogoe namaetoana ki Yehovah e pavaga dip̃a navanua waia, po piragi paki nia navasasakiana mamau waina e pei tea midiriana doko tusi waia.

²⁸Go Yehovah e pakulua ra m̃elu dua ki navanua adeada ki namaetoana, go ki namaritausuana, go ki navivitinuana ni namaetoana warua, po nadi ki da paki navanua p̃ota sikai, dapala waina e doko naaleatia waia.

²⁹Naleo tokoloku maga eu pei agi Yehovah Sup̃e anigida: ma naleo tokolina maga eu pei anigida go agi natugida maga pa pa po du mau du, naga tuga mari sara navasaana maga mamau puti ni nawotaeana waia.