Read Nguna Togoa Etafe North DEUTERONOMY 30 Bible Online

DEUTERONOMY 30 - Nguna Togoa Etafe North bible

DEUTERONOMY 30

¹Go ega wo pakilina, ragi waina tea maga mamau puti wanogoe euga wo pakilina ki‐go, navasam̃atakiana go navasasakiana wanogoe waina kinau a doropusi ra naraem̃a, go p̃a wo midoaki parati ki da m̃aleoputo ni nalauna maga mamau puti, tokora waina Yehovah Sup̃e anigo e kopasi lua ko paki asa,

²Go p̃a wo maradoa paki Yehovah Sup̃e anigo, po dogo parati ki nadaleona ki sara naleo waina kinau a dip̃aki‐go asa naaleatia waia, nigo go natum̃a maga, ki nap̃op̃om̃a mamau, go ki naatam̃a mamau;

³Naga ragi wanogoe Yehovah Sup̃e anigo ega wo piragi liliua ki naviragilua‐pavakoto‐ki‐go‐ana, po maritadodomi ko, go ega wo moro liliu po piragi saisai ki‐go m̃elu dua ki narei mamau, tokora waina Yehovah Sup̃e anigo e daperavera ki‐go paki asa.

⁴Waina tea sikai ki tea kopasiluaana anigo maga e pe toko namatap̃ago ni elagi mau, ma pae tokora wanogoe Yehovah Sup̃e anigo ega wo piragi saisai ki‐go asa, go pae tokora wanogoe nae ega wo piragi lua ko asa umai:

⁵Go Yehovah Sup̃e anigo ega wo piragi ko umai paki navanua waina tamam̃a maga eu peani a, go p̃a wo peani a; go nae ega wo mari p̃ia ki‐go, po mari ko p̃a wo disu po laapa liu tamam̃a maga.

⁶Go Yehovah Sup̃e anigo ega wo dovadavivi nap̃op̃om̃a, go nap̃op̃o ni naworaworam̃a, naga p̃a wo dodomi Yehovah Sup̃e anigo ki nap̃op̃om̃a mamau go ki naatam̃a mamau, naga p̃a mauri.

⁷Go Yehovah Sup̃e anigo ega wo doropusi sara navasasakiana maga wanogoe euga wo doko tea kokona ki‐go maga, po doko tea maga waina eu pilosi ko, waina eu kopalele ako.

⁸Go p̃a wo maradoa po dogo parati ki nadaleo ni Yehovah Sup̃e, po mari natip̃akiana aneana maga mamau puti waina kinau a dip̃aki‐go asa naaleatia waia.

⁹Go Yehovah Sup̃e anigo ega wo mari nawosiana mamau ni nam̃elearum̃a ega wo disu po laapa, nawa ni nap̃atokom̃a, go nawa ni katel anigo, go nawa ni natano anigo: nalakena Yehovah ega wo moro laelaea ako p̃a wo p̃ia, dapala waina e pea laelaea tamam̃a maga:

¹⁰Waina ku pe wo dogo parati ki nadaleo ni Yehovah Sup̃e anigo, po pavaigoro natip̃akiana aneana maga go natawonakiana aneana maga waina eu pei tea midiriana doko tusi ni nawotaeana waia; waina ku pe maradoa paki Yehovah Sup̃e anigo ki nap̃op̃om̃a mamau go ki naatam̃a mamau.

¹¹Nalakena natip̃akiana waia waina a dip̃aki‐go asa naaleatia waia, e da kasua sa ki‐go, go e da doko uvea ki‐go mau.

¹²E da doko nakoroatelagi mau naga p̃a noa, Sei ega wo manigida sake paki nakoroatelagi pano po manigida piragi a siwo umai, po dogorogo ki nia paki gida naga tuga mari a.

¹³Go e da doko taleva kerua ni natasi naga p̃a noa, Sei ega wo manigida duagoto natasi po manigida piragi a umai, po dogorogo ki nia paki gida naga tuga mari a.

¹⁴Nalakena navasaana wanogoe e doko m̃aladigi sa ki‐go, e doko nawokam̃a, go e doko nap̃op̃om̃a, naga ku mariatae mari a.

¹⁵P̃a leo, naaleatia waia a doropusi namauriana pilake nawiaana, go namateana pilake nasaana eu doko naraem̃a;

¹⁶Go a dip̃aki‐go naaleatia waia naga p̃a wo dodomi Yehovah Sup̃e anigo, po surata napua aneana maga, go naga p̃a wo pavaigoro natip̃akiana aneana maga go natawonakiana aneana maga go navasap̃otaeana aneana maga, naga p̃a mauri po disu po laapa, go naga Yehovah Sup̃e anigo ega wo pasa m̃ata ki‐go navanua waina p̃a wo paki asa pano po peani a.

¹⁷Ma waina ku pe roa nap̃op̃om̃a, po da daki dorogo mau, ma ku pe vei tea surueana po lotu ki sup̃e p̃ota maga po madeada suasua;

¹⁸A noakisai mu naaleatia waia, naga kuga wo mate puoli lomau; naaleatia animu maga euga wo da laapa mau navanua waina p̃a wo duagoto Yordan paki asa po peani a.

¹⁹A soso nakoroatelagi go maramana naga eroga noasokisoki dip̃a mu naaleatia waia, naga a doropusi namauriana go namateana, navasam̃atakiana go navasasakiana eu doko naraem̃a: nalakena tea wanogoe p̃a matadoa namauriana naga p̃a mauri, nigo go naworaworam̃a maga:

²⁰Go naga p̃a dodomi Yehovah Sup̃e anigo, po dogo parati ki nadaleona, po puluti a: nalakena nae e pei namauriana anigo, go navarauana ni naaleatia anigo maga: naga p̃a wo doko navanua waina Yehovah e pivisa asa paki tamam̃a maga, paki Abraham, go paki Isaak, go paki Yakob, naga ega tua ra asa.