Read Nguna Togoa Etafe North DEUTERONOMY 31 Bible Online

DEUTERONOMY 31 - Nguna Togoa Etafe North bible

DEUTERONOMY 31

¹Go Moses e pano, po pasa ki navasaana maga wanogoe paki Israel mamau.

²Go e noa ki da, e naga, Masoso kinau a peani natau p̃onotia sikai rualima takuna dua; a marisa moro dave pano, kite sili umai mau: go Yehovah e po noa ki nau, e po naga, P̃a wo da duagoto Yordan waia mau.

³Yehovah Sup̃e anigo ega wo duagoto pea ki‐go; nae ega wo mari puoli ki nalauna maga wanogoe pa dua ki naraem̃a, go p̃a wo peani ra: go Yoshua ega wo duagoto pea ki‐go, dapala waina Yehovah e noa e.

⁴Go Yehovah ega wo mari paki da dapala waina e mari paki Sihon go paki Ok, nawota maga ni tea ni naworawora ni Amor, go paki navanua adeada; waina e mari puoli ki da.

⁵Go Yehovah ega wo pitua ki da naraem̃a, go p̃a wo mari paki da pataka ni natip̃akiana mamau waina kinau a dip̃aki‐go asa.

⁶P̃a kasua, go p̃a viviari, p̃a ta mataku, go p̃a ta p̃ilake ki da mau: nalakena e pei Yehovah Sup̃e anigo waina e do sikoti ko pano; nae ega wo da puoli ki‐go kite doropusi ko mau.

⁷Go Moses e soso Yoshua, po pasa paki nia narae ni Israel mamau, po naga, P̃a kasua, go p̃a viviari: nalakena nigo p̃a wo sikoti narei waia pano paki navanua waina Yehovah e pivisa paki tamada maga naga ega tua ra asa; go p̃a wo mari ra euga veanipioli ki nia.

⁸Go e pei Yehovah waina e do pea ki‐go pano; nae ega wo sikoti ko, ega wo da puoli ki‐go kite doropusi ko mau: p̃a ta mataku mau, go p̃a ta m̃anaunau mau.

⁹Go Moses e midiri nawotaeana waia, po pitua ki nia paki tea viri maga, Levi natuna maga, waina eu dapetape areka ni navasasokiana ki Yehovah, go paki tea matua maga mamau puti ni Israel.

¹⁰Go Moses e dip̃aki da, po naga, Ragi waina namatap̃ago ni sara natau kelarua ega nopu, ragi ni natatutakiana ni natau ni naveresiana, ragi ni nasaisaiana ni tap̃aup̃au maga,

¹¹Ragi waina Israel mamau euga umai po pakilina narae ni Yehovah Sup̃e anigo tokora waina nae ega wo matadoa e, p̃a wo peve nawotaeana waia narae ni Israel mamau naga euga rogo e.

¹²P̃a viragi saisai ki narei, naanoai maga go nagoroi maga go piakirikiri maga, go nam̃enaki waina e doko roara ni namata‐pua anigo maga, naga euga rogo e, go naga euga rogoatae a, po matau ki Yehovah Sup̃e animu, po pavaigoro po mari sara navasaana maga ni nawotaeana waia;

¹³Go naga natuda maga waina eu da pea atae a mau, euga rogo e, go euga rogoatae po matau ki Yehovah Sup̃e animu, sara naaleatia ni namauriana animu doko navanua waina kuga wo duagoto Yordan asa po peani a.

¹⁴Go Yehovah e noa ki Moses, e naga, P̃a leo, naaleatia anigo maga eu pei m̃aladigi waina p̃a wo mate: P̃a soso Yoshua, go koro tum̃amu lawo ki mu tap̃aup̃au ni nasaisaiana, naga aga tua e natip̃akiana sikai. Go Moses ma Yoshua ero pano, po dum̃ada lawo ki da tap̃aup̃au ni nasaisaiana.

¹⁵Go Yehovah e pakilina Tap̃aup̃au wanogoe e doko napopouru lawodu: go napopouru lawodu wanogoe e du namata ni Tap̃aup̃au.

¹⁶Go Yehovah e pasa paki Moses, po naga, P̃a leo, p̃a wo maturu sikoti tamam̃a maga; go narei waia ega wo duleana pano, po maripele dausi sup̃e p̃ota maga ni navanua waina euga vaki asa pano po doko m̃aleoputo kakada, go euga wo doropusi au, po dapiri navasasokiana aginau waina kinau a mari a paki da.

¹⁷Go namaetoana aginau ega wo pavaga dip̃a ra naaleatia wanogoe, go kinau aga wo doropusi ra, po dasuru ki naraegu pa dua ki da, go nara euga wo pei tea tinomiana, go nasaana maga laapa go narogokitesaana maga euga wo pa parati ki da; go naaleatia wanogoe euga wo naga, Nasaana maga waia eu pa parati ki gida nalakena Sup̃e anigida e da doko m̃aleoputo kakagida mau kite?

¹⁸Go naaleatia wanogoe aga wo dasuru ki naraegu lomau, nalakena nasaana mamau waina euga wo mari a, po maradoa pano paki sup̃e p̃ota maga.

¹⁹Go nalakena tea wanogoe kuga tum̃amu manimu midiri nalegaana waia, go kuga vasa pisei ki Israel natuna maga asa: kuga toropusi a nawokada maga, naga nalegaana waia ega maginau pei nanoasokisokiana sikai dip̃a Israel natuna maga.

²⁰Nalakena ragi waina aga wo piragi ra umai sua paki navanua waina a pivisa paki tamada maga asa, navanua waina e do sara ki milk go ki honi; go ragi waina euga wo ganikani, po puka, po p̃arua; ragi wanogoe euga wo maradoa paki sup̃e p̃ota maga, po madeada suasua, po midoaki p̃alo ki nau, po dapiri navasasokiana aginau.

²¹Go ega wo pakilina, ragi waina nasaana laapa go narogokitesaana maga euga wo pakilina ki da, naga nalegaana waia ega wo noasokisoki naraeda ega vei nanoasokisokiana sikai; nalakena ega wo da pei tea maliokiana mau nawoka ni naworaworada maga: nalakena kinau a atae namidoakiana adeada ragi waia, pea ki waina a ko da piragi ra umai paki navanua waina a pivisa asa.

²²Go Moses e midiri nalegaana waia naaleatia sikai maau wanogoe, po pasa pisei ki Israel natuna maga asa.

²³Go e dua Yoshua, natu ni Nun, natip̃akiana sikai, po naga, P̃a kasua, go p̃a viviari: nalakena p̃a wo piragi Israel natuna maga pano paki navanua waina a pivisa asa paki da: go kinau aga wo sikoti ko doko.

²⁴Go e pakilina, ragi waina Moses e midiri sua navasaana maga ni nawotaeana wanogoe tusi sikai, pa pa e nopu,

²⁵Naga Moses e dip̃aki tea ni naworawora ni Levi maga, waina eu dapetape areka ni navasasokiana ki Yehovah,

²⁶po naga, Kuga tape tusi waia ni nawotaeana pano, po doropusi a nadigi ni areka ni navasasokiana ki Yehovah Sup̃e animu, naga ega toko tokora wanogoe doko po pei nanoasokisokiana sikai dip̃a ko.

²⁷Nalakena kinau a atae nasigisigileoana anigo, go noa kasua anigo: p̃a leo, a ko mauri doko sikoti mu masoso waia, ma ku do mari p̃auluulu dip̃a Yehovah; go edaku ki namateana aginau, ega wo sa do liu!

²⁸P̃a maginau viragi saisai ki tea matua maga mamau puti ni naworaworamu maga, go tea maraki animu maga, naga aga noa navasaana maga waia nadaligada maga, po soso nakoroatelagi go maramana naga eroga wo noasokisoki dip̃a ra.

²⁹Nalakena a atae naga edaku ki namateana aginau, kuga wo dum̃amu mari sasa ki mu, po dawasi m̃elu dua ki napua waina a dip̃aki mu asa; go tea sa ega wo pa parati ki mu naaleatia edaku maga; nalakena kuga wo mari tea waina e sa namata ni Yehovah, po mari a ega maeto nawosiana ni nam̃elearumu maga.

³⁰Go Moses e pasa navasaana maga ni nalegaana waia, pa pa eu nopu, paki nadaliga maga ni nasaisaiana mamau ni Israel.