Read Nguna Togoa Etafe North DEUTERONOMY 32 Bible Online

DEUTERONOMY 32 - Nguna Togoa Etafe North bible

DEUTERONOMY 32

¹Kuga taki dorogo, nakoroatelagi maga O, go kinau aga wo pasa; Go maramana ega rogo navasaana maga ni nawokagu:

²Nawotaeana aginau ega wo lawolawo dapala usa. Navasaana aginau ega wo pevera dapala nasovaki; Dapala nameura paki tea visou, Go dapala narikiti paki nataputea:

³Nalakena aga wo dogorogo ki nagisa ni Yehovah: Kuga vitua ki nakasuaana paki sup̃e anigida.

⁴Vatu Laketoko, nawosiana aneana e p̃ia usuraki; Nalakena napua aneana maga eu mamau pei navasap̃otaeana: Sup̃e ni navei‐lomau‐ana go tea tika namarinaleotageleana, Nae e leana go e p̃ia.

⁵Eu mari dagelegele paki nia, Eu da pei natuna maga, eu pei wotu; Eu pei tagona lolop̃ota go dagele.

⁶Narei manumatavusa go lala O, Ku do dua liliu dapalana paki Yehovah kite? Nae e da pei tamam̃a waina e pakotovi ko kite? Nae e dawona ki‐go po lawosoki ko.

⁷P̃a midoaki parati ki naaleatia maga ni tuai, Pa midoakiusiusi natau maga ni tagona laapa: Pa vusuusu paki tamam̃a, go nae ega wo pisei ki‐go asa; Tea matua anigo, go nara euga wo noakisai ko asa,

⁸Ragi waina Tea Vakilagi Mau e dua nalauna maga naveanipiolikiana adeada, Ragi waina e dap̃otawotae naatam̃oli natuna maga, E lawo ki kokoi maga ki narei maga pataka ni naveveana ni Israel natuna maga.

⁹Nalakena p̃aumaso ki Yehovah e pei narei aneana; Yakob e pei naveanipiolikiana aneana.

¹⁰E pap̃ai a doko navanua maladi, Go doko masop̃alo maladi sa: E dalivirigoro e, e pakale a, E pavaigoro e dapala atolu matana:

¹¹Dapala waina ikila e pulevule natuna maga doko vetena, Po do lagalagaavaru, Dapala nogoe e p̃elesa ki nalivaruna maga, Po dape dakati ra po suna ki da ki nalivaruna maga:

¹²Yehovah sikina e maraki a, Go te sup̃e p̃ota e da sikoti a mau.

¹³E mari a e sava pae tokora vakilagi maga ni maramana, Go e do gani nawa ni vanua; Go e mari a e dum̃ili lua honi m̃elu vatu, Go naroro m̃elu vatu kasua mau;

¹⁴Batar ni kau, go milk ni shiip, Go nam̃aladua ni shiip natuna maga, Go ni shiip anoai maga ni Bashan, Go naninani maga, go whiit wia liu; Go ku munu waine, nasua ni vaine.

¹⁵Ma Yeshurun e m̃anopunopu, go e kup̃e ki natuana: Nigo ku po p̃arua, ku po pukavuka, ku po m̃anopunopu: Go e doropusi Sup̃e waina e mari a, Po midoaki p̃alo ki Vatu Laketoko ni namautipauri‐a‐ana.

¹⁶Eu mari a e dotowo kasua ki sup̃e p̃ota maga, Eu mari a e maeto ki tea mamaragokiana maga.

¹⁷Eu mari naviriana paki dimon maga waina eu da pei Sup̃e mau, Paki sup̃e maga waina eu da pea atae ra mau, Paki sup̃e vau maga waina eu pakilina edaku, Waina tamamu maga eu da matau ki da mau.

¹⁸Ku midoaki p̃alo ki Vatu Laketoko waina e pesi ko, Go ku malio ki Sup̃e waina e dua ko namauriana.

¹⁹Go Yehovah e punusi a, po mamarago ki da, Nalakena natuna naanoai go natuna nagoroi maga eu mari p̃auluulu paki nia.

²⁰Go e naga, Aga wo dasuru ki naraegu pa dua ki da, Aga wo punusi tea waina ega wo pakilina ki da ragi edaku: Nalakena nara eu pei tagona waina eu pei malauweluki, Piakiki maga waina eu dika ki nasaralomauana.

²¹Eu mari au a dotowo kasua ki tea waina e da pei Sup̃e mau; Eu mari au a maeto ki tea p̃alo adeada maga: Go kinau aga wo mari ra euga wo dotowo kasua ki tea maga waina eu da pei narei mau; Aga wo mari ra euga wo maeto ki nalauna veilala sigisigileo sikai.

²²Nalakena nakapu sikai e pavaga namaetoana aginau, Go e do pavaga paki m̃oru vakipua mau, Po do gani dinomi natano go nawana, Po dokoni laketano ni tava warua maga.

²³Aga wo daua ki tea sa maga ara; Aga wo dipe ra ki nalua mamau puti aginau:

²⁴Euga wo pamate nalakena navitoloana, Po pei tea tinomiana ni navivitinuana vavaga go ki namarisasakiana kokona; Go aga wo dip̃aki napati ni nalo tuavati mila maga dip̃a ra, Go noai kokona ni nalo mauri maga waina eu do kakaravi nam̃otam̃ota.

²⁵Lova ega wo maripuoli ki da doko katama, Go tea mataukiana doko ekopu maga; Go ega wo mari sa ki natureai go naatara, Go tea susu go tea kapuara.

²⁶Kinau a noa, A pe taperavera ki da uvea, Po mari namidoaki‐parati‐ki‐dana e pe makoto Pa dua ki naatam̃oli maga:

²⁷A pe ta matau ki navei‐p̃auluuluana ki tea kokona, Mase tea vasadip̃a adeada maga eu pe midoaki sap̃ona, Go mase eu pe naga, Nam̃elearugami e pakilagi, Go Yehovah e da mari tea wanogoe mau,

²⁸Nalakena nara eu pei nalauna waina eu dika namidoakip̃otaeana, Go namidoakiataeana e da doko ara mau.

²⁹Ko, eu pe manumatua, po midoakiatae tea wanogoe, Naga eu pe midoakiusiusi tea waina ega wo pakilina ki da ragi edaku adeada!

³⁰Tea sikai maau e mariatae kopasi lua manu sikai dapale sava, Go edua ero mariatae kopasi lua tivilia dapale sava, Waina Vatu Laketoko adeada e pe ta sori ra mau, Go Yehovah e pe ta pitua ki da mau?

³¹Nalakena vatu laketoko adeada e da dakiusi Vatu Laketoko anigida mau, Go tea kokona ki gida eu dum̃ada pei tea vasap̃otae maga.

³²Nalakena vaine adeada e pei tea ni vaine ni Sodom, go ni vanua maga ni Comorrah: Nawa ni vaine adeada eu pei nawa ni vaine kokona, m̃okai adeada eu kokona sa:

³³Waine adeada e pei noai kokona ni drakon maga, Go noai ni namateana sa ni m̃aata maga.

³⁴Tea wanogoe e da pei tea tauakiana kiagu, Tea vulusokiana m̃aleoputo ni naloriki wia liu aginau maga kite?

³⁵Nasikoana e pei aginau, go navitua‐dip̃a‐ana, Doko ragi waina natuada ega wo pa parasai: Nalakena naaleatia ni nariesokira‐ana e pei m̃aladigi, Go naleo maga waina euga wo pa parati ki da, euga wo mari m̃araverave umai.

³⁶Nalakena Yehovah ega wo pasap̃otae narei aneana, Go ega wo dum̃ana midoakipiri nalo ni tea suasua aneana maga; Ragi waina ega wo punusi naga nakasuaana adeada e pano puoli, Go naga te sikai e da doko mau, naviti kite tea tum̃ana doko.

³⁷Go ega wo naga, Sup̃e adeada maga wai, Vatu laketoko waina eu pavatu asa;

³⁸Waina eu gani nap̃eletia ni naviriana adeada maga, Po munu waine ni navituaana takiana adeada? Euga tuleana po silae mu, Euga kovagoro mu.

³⁹Kuga vunusi naga kinau a pei nae, Go te sup̃e p̃ota e da doko mau, ma kinau a sikigu: Kinau a maripunue, go a moro maripauri; A po mari ra eu pei wotu, go a moro mari ra eu apu: Go tea waina e mariatae pualua ki nam̃elearugu e da doko mau.

⁴⁰Nalakena a sike nam̃elearugu pakilagi, Po naga, Kinau a mauri doko, po doko mau doko,

⁴¹Go waina a pe vakali lova lidalida aginau, Go nam̃elearugu e pe vuasoki navasap̃otaeana; A pe wo lagati pitua ki nasikoana dip̃a tea kokona ki nau maga, Po lagati dua tea maga waina eu pilosi au.

⁴²Aga wo mari nalua aginau maga euga matamaloku ki nada, Go lova aginau ega wo gani dinomi nap̃okasi; Ki nada ni tea maripunueana go ni tea tapepavakoto maga, Pae nap̃au ni tea maraki maga ki tea kokona maga.

⁴³Kuga laelaea, nalauna maga O, narei aneana: Nalakena nae ega wo siko nada ni tea suasua aneana maga, Go ega wo lagati pitua ki nasikoana dip̃a tea kokona ki nia maga, Go ega wo magi navanua aneana, narei aneana, mari natap̃augoroana sikai.

⁴⁴Go Moses e umai po pasa ki navasaana maga mamau puti ni nalegaana wanogoe nadaliga ni narei aneana, nae go Hoshea, natu ni Nun.

⁴⁵Go Moses e pasa sua navasaana mamau puti wanogoe waina e noa ki Israel mamau asa:

⁴⁶Go e noa ki da, e naga, Kuga lawo ki nap̃op̃omu doko navasaana maga mamau puti waina kinau a noasokisoki paki mu ara naaleatia waia; waina kuga wo dip̃aki natumu maga ara, naga euga vavaigoro po mari sara navasaana maga ni nawotaeana waia.

⁴⁷Go e da pei tea p̃alo paki mu mau; nalakena e pei namauriana animu, go tea wanogoe kuga wo mari naaleatia animu maga euga wo laapa doko navanua waina kuga wo duagoto Yordan asa po peani a.

⁴⁸Go naaleatia sikai maau wanogoe Yehovah e pasa paki Moses, po naga,

⁴⁹P̃a sake paki tava ni Abarim pano, paki tava Nebo, waina e doko navanua ni Moab, waina e doko kivea ki Yeriko; go p̃a vunusi navanua ni Kanaan, waina kinau a dua Israel natuna maga asa naga ega vei naveaniana sikai:

⁵⁰Go p̃a mate tava wanogoe waina p̃a wo sake paki asa pano, po pei tea saisaikiana paki namatarau anigo; dapala waina taim̃a Aaron e mate tava Hor, po pei tea saisaikiana paki namatarau aneana:

⁵¹Nalakena ku dapiri dip̃a au m̃aleoputo ni Israel natuna maga pisari noai maga ni Meribah ni Kadesh, doko masop̃alo ni Sin; nalakena ku da dapugoro au m̃aleoputo ni Israel natuna maga mau.

⁵²Go p̃a wo punusi navanua kivea ki‐go; ma p̃a wo da paki asa pano paki navanua wanogoe mau waina a dua Israel natuna maga asa.