Read Nguna Togoa Etafe North DEUTERONOMY 33 Bible Online

DEUTERONOMY 33 - Nguna Togoa Etafe North bible

DEUTERONOMY 33

¹Go tea waia e pei navasap̃iakiana waina Moses, naatam̃oli ki Sup̃e, e pasa p̃ia ki Israel natuna maga asa, pea ki namateana aneana.

²Go e naga, Yehovah e pae Sinai umai, E sake pae Seir umai punusi ra; E maramalaga pae tava Paran, Go e m̃elu tivilia maga ni tea tapu maga umai: Nawotaeana vavaga e madeada doko nam̃elearuna ni matua.

³Io, e do dodomi narei maga; Tea tautau aneana maga eu mamau puti doko nam̃elearum̃a: Go eu dasake pisari natuam̃a; Sara naata euga wo piragi soki navasaana anigo.

⁴Moses e dip̃aki gida nawotaeana sikai, Ega vei naveanipiolikiana sikai agi nasaisaiana ki Yakob.

⁵Go nae e pei nawota ni Yeshurun, Ragi waina nap̃au maga ni narei eu pei tea viragi‐saisai‐kiana, Naworawora maga ni Israel eu mamau.

⁶Reuben ega mauri, po da mate mau; Ma naatam̃oli aneana maga euga visa maau.

⁷Go tea waia e pei navasap̃iakiana ni Yudah: Go e naga, P̃a rogo, Yehovah O, nadaleo ni Yudah, Po piragi a umai paki narei aneana: E maneana marimari ki nam̃elearuna; Go p̃a wo pei tea silae a dip̃a tea kokona ki nia maga.

⁸Go nalo ni Levi, e naga, Tummim anigo go Urim anigo ero doko sikoti naatam̃oli wia anigo, Waina ku maridogo e Massa, Go waina ku pululu paki nia doko noai ni Meribah;

⁹Waina e noa nalo ni tamana, go nalo ni p̃ilana, A da punusi a mau; Go e da leoatae taina maga, kite atae natuna maga mau: Nalakena nara eu dogo parati ki navasaana anigo, Go eu do pavaigoro navasasokiana anigo.

¹⁰Euga wo pasa pisei ki Yakob navasap̃otaeana anigo maga, Go Israel nawotaeana anigo: Euga wo doropusi tea ni nap̃o wia naraem̃a, Go navituaana tap̃arakiana mamau tagura anigo.

¹¹Yehovah O, p̃a vasa p̃ia ki naleo aneana maga, Po dape parati ki nawosiana ni nam̃elearuna: Pa atugi naware ni tea maga waina eu duleana dip̃a e, Go ni tea maga waina eu pilosi a, Naga euga ta moro duleana mau.

¹²Go nalo ni Benyamin, e naga, Tea dodomiana ki Yehovah ega toko p̃ia doko kiana; E do dap̃augoro e naaleatia mamau, Go e do doko namawota ni napauna dua.

¹³Go nalo ni Yosef, e naga, Navasap̃iakiana ki Yehovah ega toko navanua aneana; Ki naleo wia liu ni nakoroatelagi, go ki nasovaki, Go ki epua waina e doko etano,

¹⁴Go ki naleo wia liu ni nawa ni elo, Go ki naleo wia liu ni nawa ni atelagi maga,

¹⁵Go ki naleo wia vea ni tava tuai, Go ki naleo wia liu ni tava toko mau,

¹⁶Go ki naleo wia liu ni navanua go navuraana kakana, Go ki nasaup̃iaana ni tea waina e doko nakau makalikali: Navasap̃iakiana ega wo umai doko nap̃au ni Yosef, Po doko nam̃asua ni nap̃au ni tea maraki ni taina maga.

¹⁷Takalapa ni kau natuna tureai aneana, nawaruaana e pei aneana, Go natip̃aana ero pei nati ni oks mila: Ega wo dip̃a narei maga mamau puti ara, Pa pa paki namatap̃ago ni maramana: Go nara eu pei tivilia maga ni Efraim, Go eu pei manu maga ni Manasseh.

¹⁸Go nalo ni Sebulun, e naga, Pa laelaea, Sebulun O, natavepano‐ana anigo; Go Issakar, doko tap̃aup̃au anigo maga.

¹⁹Euga wo soso saisai ki narei maga paki tava; Tokora wanogoe euga wo pitua ki naviriana ni namarinaleoleanaana: Nalakena euga wo dum̃ili nalapalapaana ni natasi, Go tea tauakiana surukiana maga ni naworaone.

²⁰Go nalo ni Cad, e naga, Tea waina e mari Cad e p̃elewelea, ega vei tea vasap̃iakiana: E doko dakiusi laion goroi, e do p̃orae naruna, go nam̃asuaana.

²¹Go e leo punusi namagovai vea e pei tea aneana; Nalakena tokora wanogoe matele sikai e magi tea maraki pei tea mautiana; Go e umai punusi nap̃au maga ni narei, Emari nawosiana leana ki Yehovah, Go navasap̃otaeana aneana maga ma, Israel.

²²Go nalo ni Dan, e naga, Dan e pei natu ni laion, Waina e soka dave m̃elu Bashan.

²³Go nalo ni Naftali, e naga, Naftali O, ku maro ki nasaup̃iaana, Go ku pura ki navasap̃iakiana ki Yehovah: Pa veani taleva ni west go taleva ni sauth.

²⁴Go nalo ni Asher, e naga, Asher ega vei tea vasap̃iakiana ki natuna maga; Taina maga euga midoaki m̃ata ki nia, Go ega pupugi natuana naroro.

²⁵Tea walagoto anigo euga wo pei airon go brass; Go dapala naaleatia anigo maga, nakasuaana anigo ega wo pataka sikai.

²⁶Tea tapala Sup̃e e dika, Yeshurun O, Waina e do sakesaake nakoroatelagi pei nasilae‐ko‐ana, Po do doko natatap̃auana aneana doko napopouru maga.

²⁷Sup̃e doko mau e pei nasum̃atokoana anigo, Po naru toko mau ero doko etano. Go e dielua tea kokona pa dua ki naraem̃a, Po naga, P̃a mari puoli ki da.

²⁸Go Israel e doko p̃ia doko, Namata noai ni Yakob e sikina, Doko navanua ni korn go ni waine; Io, nakoroatelagi aneana maga eu lawolawo ki nasovaki.

²⁹Ku maro pa, Israel O: Sei e dakiusi ko, narei mautiana ki Yehovah, Nakokoro ni nasilae‐ko‐ana, Go waina e pei lova ni natatap̃auana anigo! Go tea kokona ki‐go maga euga wo doko etano sorosoro paki‐go; Go p̃a wo pasi tokora vakilagi adeada maga.