Read Nguna Togoa Etafe North DEUTERONOMY 4 Bible Online

DEUTERONOMY 4 - Nguna Togoa Etafe North bible

DEUTERONOMY 4

¹Go ragi waia, Israel O, kuga taki dorogo paki natawonakiana maga, go paki navasap̃otaeana maga, waina a do pasa pisei ki mu ara, naga kuga wo mari ra; naga kuga mauri, go kuga sili pano po peanipioli ki navanua waina Yehovah, Sup̃e ki tamamu maga, e dua mu asa.

²Kuga ta sokari mau ki navasaana waina a dip̃aki mu asa, go kuga ta doropusi seara kakana mau, go dapala nogoe kuga wo pavaigoro natip̃akiana maga ki Yehovah Sup̃e animu waina a dip̃aki mu ara.

³Namatamu maga eu punusi tea waina Yehovah e mari a nalakena tea ni Baal‐peor: naatam̃oli maga mamau puti waina eu dausi Baal‐peor, Yehovah Sup̃e anigo e mari puoli ki da pa dua ki m̃aleoputo kakam̃a.

⁴Ma nimu waina ku puluti Yehovah Sup̃e animu, ku po mauri puti naaleatia waia.

⁵Kuga leo, a pasa pisei ki mu natawonakiana maga go navasap̃otaeana maga, dapala Yehovah Sup̃e aginau e dip̃aki nau asa, naga kuga wo mari ra doko m̃aleoputo ni navanua waina kuga wo sili paki asa pano po peani a.

⁶Nalakena tea wanogoe kuga vavaigoro ra po mari ra; nalakena eu pei namanumatuaana animu go namidoakiataeana animu narae ni narei maga, go nara waina euga wo dogo natawonakiana mamau puti waia, euga wo noa, Lomau, nalauna warua waia e pei narei manumatua go midoakiatae.

⁷Nalakena seve nalauna warua waina e doko waina e peani sup̃e sikai doko m̃aladigi ki da, dapala Yehovah Sup̃e anigida e doko m̃aladigi ki gida ragi waina tu pioso paki nia?

⁸Go seve nalauna warua waina e doko waina e peani natawonakiana maga go navasap̃otaeana maga waina eu leana p̃ia dapala nawotaeana mamau waia, waina kinau a lawo ki nia naraemu naaleatia waia?

⁹Ma p̃a tum̃am̃a leo parati ki‐go, po dum̃am̃a pavaigoro naatam̃a, mase ku pe malio ki naleo maga waina namatam̃a ero punusi ra, go mase eu pe va dua ki nap̃op̃om̃a naaleatia maga mamau puti ni namauriana anigo; ma p̃a mari ra euga wo pei tea ataeana ki natum̃a maga, go ki natum̃a natuda maga;

¹⁰Naaleatia waina ku lawodu narae ni Yehovah Sup̃e anigo doko Horeb, ragi waina Yehovah e noa ki nau, e naga, P̃a maginau piragi saisai ki narei umai, go aga wo mari ra euga rogo navasaana aginau maga, naga euga rogoatae po matau ki nau naaleatia maga mamau puti ni namauriana adeada doko maramana, go naga euga vasa pisei ki natuda maga asa.

¹¹Go ku umai paki m̃aladigi po lawodu nalake ni tava; go tava wanogoe e soro ki nakapu paki m̃aleoputo ni elagi mau, pilake namaligo, go pilake napopouru, go pilake namaligo wono.

¹²Go Yehovah e pasa paki mu m̃elu m̃aleoputo ni nakapu vavaga: ku dogo nadaleo ni navasaana, ma ku da punusi te naleo mau; ku dogo nadaleo e sikina.

¹³Go e noasai paki mu navasasokiana aneana, waina e dip̃aki mu asa naga kuga mari a, navasaana rualima sikai; go e midiri ra vatu welewelea dua.

¹⁴Go ragi wanogoe Yehovah e dip̃aki nau naga aga vasa pisei ki mu natawonakiana maga go navasap̃otaeana maga naga kuga mari ra navanua waina kuga tuagoto asa po peani a.

¹⁵Nalakena tea wanogoe kuga tum̃amu pavaigoro mu; nalakena ku da punusi te naleo mau naaleatia waina Yehovah e pasa paki mu Horeb, m̃elu m̃aleoputo ni nakapu vavaga:

¹⁶Mase ku pe tum̃amu mari sa ki mu, po manimu mari te nasup̃e sikai, nunu ni te naleo mau, natakiusiana ni tea anoai, kite tea goroi,

¹⁷Kite natakiusiana ni te nalo tuavati waina e doko maramana, kite natakiusiana ni te manu waina e pilake nalivaru waina e diri namalopa,

¹⁸Kite natakiusiana ni te naleo waina e do kakaravi natano, kite natakiusiana ni te naika waina e doko noai etano ni maramana:

¹⁹Go mase ku pe sike namatam̃a paki nakoroatelagi, go waina ku punusi elo, go atelagi, go m̃asoe maga, go taua mamau ni nakoroatelagi, ku pe vei tea vuatiluaana po lotu ki da, po madeada suasua, nara waina Yehovah Sup̃e anigo e dap̃otawotae ra euga vei agi narei mamau puti etano ni nakoroatelagi mamau.

²⁰Ma Yehovah e dape lua mu, go e piragi lua mu m̃elu dua ki upu ni airon, m̃elu dua ki Ityipt umai, naga kuga wo maneana pei narei veanipiolikiana, dapala waina e doko naaleatia waia.

²¹Go Yehovah e maeto ki nau nalakena nimu, po pivisa naga aga ta duagoto Yordan mau, go naga aga ta sili pano mau paki navanua wia wanogoe, waina Yehovah Sup̃e anigo e dua ko asa naga ega vei naveanipiolikiana sikai.

²²Ma aga wo mate navanua waia, aga wo da duagoto Yordan mau: ma nimu kuga wo duagoto pano, po peani navanua wia wanogoe.

²³Kuga tum̃amu pavaigoro mu, mase ku pe malio ki navasasokiana ki Yehovah Sup̃e animu, waina e dua mu asa, go mase ku pe manimu mari te nasup̃e taeana sikai, nunu ni te naleo sikai, waina Yehovah Sup̃e anigo e dip̃agoro ko asa.

²⁴Nalakena Yehovah Sup̃e anigo e pei nakapu kanikani, go e pei Sup̃e totowo kasua.

²⁵Ragi waina kuga wo pesi natumu maga, go natumu natuda maga, go kuga wo doko sua navanua ragi varau, po dum̃amu mari sa ki mu, po manimu mari te nasup̃e, nunu ni te naleo, go kuga wo mari tea waina e sa narae ni Yehovah Sup̃e anigo, po mari p̃auluulu paki nia naga ega maeto:

²⁶A soso nakoroatelagi go maramana naga eroga noasokisoki dip̃a mu naaleatia waia, naga kuga wo m̃araverave mate puoli pa dua ki navanua waina ku duagoto Yordan paki asa naga kuga veani a; kuga wo da doko parau asa mau, ma kuga wo pei tea maripuolikiana.

²⁷Go Yehovah ega wo daperavera ki mu m̃aleoputo ni narei maga, go naveveana kakamu waina kuga wo pei tea toropusiana doko m̃aleoputo ni nalauna maga kuga wo pei tea visa maau, tokora waina Yehovah ega maraki mu paki asa pano.

²⁸Go tokora wanogoe kuga wo magi sup̃e maga suasua waina eu pei nawosiana ni nam̃elearu ni naatam̃oli, sup̃e maga ni nakau go ni vatu, waina eu da leosai mau, go eu da dogo, go eu da ganikani, go eu da sidogo.

²⁹Ma waina ku pe laaga Yehovah Sup̃e anigo pae tokora wanogoe, go ku pe wo pap̃ai a, waina ku pe laaga asa ki nap̃op̃om̃a mamau go ki naatam̃a mamau.

³⁰Ragi waina ku pe toko nariesokiana, go tea maga mamau puti waia eu pe va parati ki‐go, ragi ni naaleatia edaku maga p̃a wo liliu paki Yehovah Sup̃e anigo, po dogo parati ki nadaleona:

³¹Nalakena Yehovah Sup̃e anigo e pei Sup̃e dodomi sikai; nae ega wo da doropusi ko mau, go ega wo da mari puoli ki‐go mau, go ega wo da malio ki navasasokiana waina e pivisa paki tamam̃a maga asa.

³²Go p̃a vusuusu ragi waia nalo ni naaleatia maga waina eu pano sua, waina eu pea ki‐go, pae naaleatia waina Sup̃e e dawona ki naatam̃oli doko maramana, go pae namatap̃ago sikai ni nakoroatelagi pa pa paki namatap̃ago kerua, naga te naleo sikai e pe toko, waina e dapala naleo warua waia, kite e pe vei tea rogoana e dapala nogoe?

³³Te naatam̃oli e pe rogo nadaleo ni Sup̃e te ragi, doko po pasa m̃elu nakapu vavaga, dapala waina nigo ku dogo e, go e po mauri kite?

³⁴Kite Sup̃e e maridogo pano po maneana puati lua nalauna sikai m̃elu dua ki m̃aleoputo ni nalauna p̃ota sikai, ki namaridogoana maga, ki navaivaiana maga, go ki tea ni namagaana maga, go ki navakalo, go ki nam̃elearu kasua, go ki naru saikiana sikai, go ki namatakuana warua maga, dapala tea maga mamau puti waina Yehovah Sup̃e animu e manimu mari a Ityipt naraemu kite?

³⁵E pei tea viseikiana paki‐go, naga p̃a wo atae naga Yehovah nae e pei Sup̃e; tea p̃ota e da doko mau, ma nae e sikina.

³⁶E mari ko ku dogo nadaleona m̃elu nakoroatelagi naga ega tapavanau ko: go e mari ko ku punusi nakapu vavaga warua aneana doko maramana; go ku dogo navasaana aneana maga m̃elu m̃aleoputo ni nakapu vavaga.

³⁷Go nalakena e dodomi tamam̃a maga, e matadoa naworaworada edaku ki da, go e piragi lua ko m̃elu dua ki Ityipt umai, ki natoko‐sikoti‐ko‐ana aneana, go ki nakasuaana warua aneana.

³⁸Naga ega kopasi lua nalauna maga, tea warua liu go tea kasua liu ko, pa dua ki naraem̃a, naga ega tua ko navanua adeada ega vei naveanipiolikiana, dapala waina e doko naaleatia waia.

³⁹Nalakena tea wanogoe p̃a atae po midoakisokisoki nap̃op̃om̃a naaleatia waia naga Yehovah nae e pei Sup̃e doko nakoroatelagi ni elagi, go doko maramana ni etano: tea p̃ota e da doko mau.

⁴⁰Go p̃a vavaigoro natawonakiana aneana maga, go natip̃akiana aneana maga, waina kinau a dip̃aki‐go ara naaleatia waia, naga ega wia ki‐go, go ki natum̃a maga waina eu edakugoro ko naga naaleatia anigo maga euga wo parau doko navanua waina Yehovah Sup̃e anigo e dua ko asa, pa pa po du mau du.

⁴¹Go ragi wanogoe Moses e mari masale ki natokoana dolu taleva kerua ni Yordan, taleva ni elo sake;

⁴²Naga tea maripunue waina e atugi tea ni m̃aladigi ki nia ragi waina e da midoa ki nia mau, po da pilosi a sala vea mau, ega sava paki asa; go ega sava sili natokoana maga wanogoe sikai kakada, po mauri:

⁴³Eu pei Beser doko masop̃alo malo matemate ega vei agi naworawora ni Reuben; go Ramoth doko Cilead ega vei agi naworawora ni Cad; go Colan doko Bashan ega vei agi naworawora ni Manasseh.

⁴⁴Go tea waia e pei nawotaeana waina Moses e doropusi a narae ni Israel natuna maga:

⁴⁵Tea maga waia eu pei nanoasokisokiana maga, go natawonakiana maga, go navasap̃otaeana maga, waina Moses e noa ki Israel natuna maga ara, ragi waina eu m̃elu dua ki Ityipt umai;

⁴⁶Taleva kerua ni Yordan, doko nap̃aloa pisari Beth‐peor, navanua ki Sihon nawota ni naworawora ni Amor, waina eu doko Heshbon, waina Moses go Israel natuna maga eu atugi ra, ragi waina eu m̃elu dua ki Ityipt umai:

⁴⁷Go eu puati navanua aneana, go navanua ki Ok, nawota ni Bashan, nawota dua ki naworawora ni Amor, waina ero doko taleva kerua ni Yordan, taleva ni elo sake;

⁴⁸Pae Aroer waina e doko nadigi ni nap̃aloa ni Arnon pa pa paki tava Sion (waina e pei Hermon),

⁴⁹Go Arabah mamau taleva kerua ni Yordan paki elo sake, pa pa paki natasi ni Arabah doko nalake ni tava Piskah.