Read Nguna Togoa Etafe North DEUTERONOMY 5 Bible Online

DEUTERONOMY 5 - Nguna Togoa Etafe North bible

DEUTERONOMY 5

¹Go Moses e soso saisai ki Israel mamau po noa ki da, e naga, Kuga rogo, Israel O, natawonakiana maga, go navasap̃otaeana maga waina a pasa ara nadaligamu maga naaleatia waia, naga kuga rogoatae ra po pavaigoro ra naga kuga mari ra.

²Yehovah Sup̃e anigida e mari navasasokiana sikai paki gida Horeb.

³Yehovah e da mari navasasokiana waia paki tamagida maga mau, ma e mari a paki gida waina tu mauri puti nea naaleatia waia.

⁴Yehovah e pasa paki mu tava, narae paki narae, m̃elu m̃aleoputo ni nakapu vavaga,

⁵(Ragi wanogoe kinau a lawodu namawota ni Yehovah go nimu naga aga visei ki mu navasaana ki Yehovah: nalakena ku matau ki nakapu vavaga, go ku da sake paki tava pano mau;) go e naga.

⁶Kinau a pei Yehovah Sup̃e anigo waina a piragi lua ko m̃elu dua ki navanua ni Ityipt, m̃elu dua ki nasum̃a ni naviti maga.

⁷P̃a ta peani te sup̃e p̃ota sikai naraegu mau.

⁸P̃a ta manigo mari te nasup̃e mau, go te nunu naleo mau, tea ni nakoroatelagi ni elagi, go tea ni maramana ni etano, go tea ni noai ni etano ni maramana:

⁹P̃a ta kolo suai natano paki da mau, go p̃a ta madeada suasua mau: nalakena Kinau Yehovah Sup̃e anigo a pei Sup̃e totowo kasua, a parati natuda namarinaleotageleana ki tamada, go pa pa paki tagona ketolu go kevati ni tea waina eu pilosi au;

¹⁰Go a saup̃ia ki manu laapa waina eu dodomi au po dogo parati ki natip̃akiana aginau maga.

¹¹P̃a ta noa m̃oli ki nagisa ni Yehovah Sup̃e anigo mau: nalakena Yehovah ega wo da noa naga sogi e puoli ki naata waina e noa m̃oli ki nagisana.

¹²P̃a midoaki naaleatia ni sabbath naga p̃a tapugoro e, dapala waina Yehovah Sup̃e anigo e dip̃aki‐go asa.

¹³Naaleatia latesa p̃a wosiwosi, po mari puti nawosiana anigo:

¹⁴Ma naaleatia kelarua e pei sabbath ki Yehovah Sup̃e anigo: p̃a ta mari te nawosiana seara asa mau, nimu ma natum̃a naanoai, go natum̃a nagoroi, tea suasua naanoai anigo, go tea suasua nagoroi anigo, go oks anigo, go ass anigo, go katel anigo, go nam̃enaki anigo waina e doko roara ni namata‐pua anigo maga; naga tea suasua naanoai anigo go tea suasua nagoroi anigo, kuga mamau puti maromaro.

¹⁵Go p̃a midoaki parati ki naga nigo ku pea pei naviti doko navanua ni Ityipt, go Yehovah Sup̃e anigo e piragi lua ko m̃elu dua ki nia umai ki nam̃elearu kasua go ki naru saikiana sikai: nalakena tea wanogoe Yehovah Sup̃e anigo e dip̃aki‐go naga p̃a vavaigoro naaleatia ni sabbath po dapugoro e.

¹⁶P̃a dodomadagani tamam̃a go p̃ilam̃a, dapala waina Yehovah Sup̃e anigo e dip̃aki‐go asa: naga naaleatia anigo maga euga toko parau doko, go naga ega wia ki‐go, navanua waina Yehovah Sup̃e anigo e dua ko asa.

¹⁷P̃a ta maripunue mau.

¹⁸P̃a ta maripele mau.

¹⁹Go p̃a ta panako mau.

²⁰Go p̃a ta pasasokisoki sorosoro dip̃a tea ni m̃aladigi ki‐go mau.

²¹Go p̃a ta matam̃agura ki nagoroi ki tea ni m̃aladigi ki‐go mau; go p̃a ta matam̃agura ki nasum̃a ki tea ni m̃aladigi ki‐go mau, go vanua aneana, go tea suasua naanoai aneana, go tea suasua nagoroi aneana, go ass aneana, go te navatuna sikai waina tea ni m̃aladigi kigo e peani a.

²²Navasaana maga waia Yehovah e pasa ara ki nadaleo warua paki nasaisaiana animu mamau tava, m̃elu m̃aleoputo ni nakapu vavaga, go m̃elu napopouru, go m̃elu namaligo wono: go e da sokari a mau. Go e midiri ra vatu welewelea dua, po dua au ara.

²³Go e pakilina, ragi waina ku dogo nadaleo m̃elu m̃aleoputo ni namaligo, ragi waina tava e soro ki nakapu vavaga, naga ku umai paki m̃aladigi ki nau, nimu ma nap̃au maga mamau puti ni naworaworamu maga, go tea matua animu maga;

²⁴Go ku naga, Kuga leo, Yehovah Sup̃e anigida e pisei ki gida nasamasamaana go nawaruaana aneana, go tu dogo nadaleona m̃elu m̃aleoputo ni nakapu vavaga: naaleatia waia tu punusi naga Yehovah e do pasa paki naatam̃oli, go e mauri.

²⁵Go nalakena tea wanogoe ekasana tuga mate.? Nalakena nakapu vavaga warua waia ega tinomi gida: waina tu pe moro dogo nadaleo ni Yehovah Sup̃e anigida, ragi wanogoe tuga wo mate.

²⁶Nalakena sei e doko ni sara nap̃okasi waina e pe rogo nadaleo ni Sup̃e mauri, doko po pasa m̃elu m̃aleoputo ni nakapu vavaga, dakiusi gida go e po mauri doko?

²⁷P̃a vaki m̃aladigi po dogo tea mamau puti waina Yehovah Sup̃e anigida ega wo noa e: go p̃a noa ki gami tea mamau puti waina Yehovah Sup̃e anigida ega wo noa ki‐go asa; go auga wo dogo e, po mari a.

²⁸Go Yehovah e dogo nadaleo ni navasaana animu maga ragi waina ku pasa paki nau; go Yehovah e noa ki nau, e naga, A po dogo nadaleo ni navasaana maga ki narei waia, waina eu pasa paki‐go asa: eu pasa p̃ia ki navasaana mamau puti waina eu pasa ara.

²⁹Ko eu pe veani nap̃op̃o sikai dapala waina eu pe matau ki nau, po pavaigoro natip̃akiana aginau maga sara ragi, naga ega wia ki da go ki natuda maga pa pa po du mau du!

³⁰P̃a vano po noa ki da, p̃a naga, Kuga liliu paki tap̃aup̃au animu maga pano.

³¹Ma nigo, p̃a lawodu nea pisari au, go aga wo noa ki‐go natip̃akiana maga mamau puti, go natawonakiana maga, go navasap̃otaeana maga, waina p̃a wo pasa pisei ki da ara naga euga wo mari ra navanua waina a dua ra asa naga euga veani a.

³²Nalakena tea wanogoe kuga manimu pavaigoro po mari tea waina Yehovah Sup̃e animu e dip̃aki mu asa: kuga ta dawasi mau paki taleva ni matua, kite paki taleva ni mawiri.

³³Kuga surata napua mamau waina Yehovah Sup̃e animu e dip̃aki mu asa, naga kuga mauri, go naga ega wia ki mu, go naga naaleatia animu maga euga laapa navanua waina kuga wo peanipioli ki nia.