Read Nguna Togoa Etafe North DEUTERONOMY 6 Bible Online

DEUTERONOMY 6 - Nguna Togoa Etafe North bible

DEUTERONOMY 6

¹Go tea waia e pei natip̃akiana, go natawonakiana maga, go navasap̃otaeana maga waina Yehovah Sup̃e animu e dip̃aki nau naga aga vasa pisei ki mu ara, naga kuga mari ra navanua waina kuga tuagoto asa po peani a:

²Naga kuga matau ki Yehovah Sup̃e animu po pavaigoro natawonakiana aneana maga mamau puti go natip̃akiana aneana maga mamau puti, waina a dip̃akigo asa, nimu ma natum̃a naanoai, go natu ni natum̃a naanoai, naaleatia maga mamau puti ni namauriana anigo; go naga naaleatia anigo maga euga laapa.

³Nalakena tea wanogoe kuga rogo, Israel O, po manimu pavaigoro naga kuga mari a; naga ega wia ki mu, go naga kuga risu p̃arua dapala waina Yehovah Sup̃e ki tamamu maga e sai paki mu navanua waina e do sara ki milk go ki honi.

⁴P̃a rogo, Israel O: Yehovah Sup̃e anigida e pei Yehovah sikai maau:

⁵Go p̃a dodomi Yehovah Sup̃e anigo ki nap̃op̃om̃a mamau, go ki naatam̃a mamau, go ki nakasuaana anigo mamau.

⁶Go navasaana maga waia, waina a dip̃aki‐go ara naaleatia waia, euga toko nap̃op̃om̃a:

⁷Go p̃a m̃arekareka pasa pisei ki natum̃a maga ara, go p̃a vasa asa ragi waina ku dasake doko nasum̃a anigo, go ragi waina ku do surata napua, go ragi waina ku do one natano, go ragi waina ku duleana.

⁸Go p̃a solisoki ra nam̃elearum̃a naga euga vei navaivaiana sikai, go euga vei tea tokorae maga namawota ni namatam̃a.

⁹Go p̃a midiri ra nakautu ni namata maga ni nasum̃a anigo, go namata‐pua anigo maga.

¹⁰Go ega wo doko, ragi waina Yehovah Sup̃e anigo ega viragi ko umai paki navanua waina e pivisa asa paki tamam̃a maga, go paki Abraham, go paki Isaak, go paki Yakob, naga ega tua ko asa; natokoana warua go wia maga, waina ku da davagi ra mau,

¹¹Go nasum̃a waina eu pura ki sara naleo wia, waina ku da pakavuro ra mau, go namata noai kiliana maga waina ku da kili ra mau, go roara maga ni vaine go nakau oliva maga waina ku da lawo ra mau, go kuga kanikani po puka;

¹²Go ragi wanogoe p̃a vavaigoro mase ku pe malio ki Yehovah waina e piragi lua ko m̃elu dua ki navanua ni Ityipt umai, m̃elu dua ki nasum̃a ni naviti maga.

¹³P̃a matau ki Yehovah Sup̃e anigo; go p̃a maneana suasua, go p̃a vivisa pae nagisana.

¹⁴Kuga ta dausi sup̃e p̃ota maga mau, sup̃e maga ki narei maga waina eu dalivirigoro mu;

¹⁵Nalakena Yehovah Sup̃e anigo e pei Sup̃e totowo kasua sikai m̃aleoputo kakam̃a; go mase namaetoana ki Yehovah Sup̃e anigo e pe vavaga dip̃a ko, go e pe maripuoli ki‐go pa dua ki narae ni maramana.

¹⁶Kuga ta maridogo Yehovah Sup̃e animu mau, dapala waina ku maridogo e Massah.

¹⁷Kuga rogo parati ki m̃ata ki natip̃akiana maga ki Yehovah Sup̃e animu, go nanoasokisokiana aneana maga, go natawonakiana aneana maga, waina e dip̃akigo ara.

¹⁸Go p̃a to mari tea waina e leana go e p̃ia namata ni Yehovah: naga ega wia kigo, go naga p̃a sili pano po peani navanua wia waina Yehovah e pivisa paki tamam̃a maga asa.

¹⁹Naga ega tae lua tea kokona ki‐go maga mamau puti pa dua ki naraem̃a, dapala waina Yehovah e noa e.

²⁰Ragi waina natum̃a naanoai ega vusuusu pakigo ragi edaku, po naga, Nanoasokisokiana maga eu pei nasava, go natawonakiana maga, go navasap̃otaeana maga waina Yehovah Sup̃e anigo e dip̃akigo ara?

²¹Ragi wanogoe p̃a wo noa ki natum̃a naanoai, p̃a naga, Au pei naviti maga ki Faraoh doko Ityipt; go Yehovah e piragi lua gami m̃elu dua ki Ityipt ki nam̃elearu kasua:

²²Go Yehovah e pisei ki navaivaiana maga go tea ni namagaana maga, tea warua go tea madaga, paki Ityipt go paki Faraoh go paki nasum̃a aneana mamau naraegami:

²³Go e piragi lua gami m̃elu dua ki tokora wanogoe naga ega viragi gami umai po dua gami navanua waina e pivisa paki tamagami maga asa.

²⁴Go Yehovah e dip̃aki gami naga auga mari natawonakiana maga mamau puti wanogoe, doko po matau ki Yehovah Sup̃e aginami, naga ega wia ki gami sara ragi, go naga ega mauti gami auga mauri, dapala waina e doko naaleatia waia.

²⁵Go ega wo pei namarinaleoleanaana anigida waina tu pe vavaigoro po mari natip̃akiana mamau wanogoe narae ni Yehovah Sup̃e anigida dapala waina e dip̃aki gida asa.