Read Nguna Togoa Etafe North DEUTERONOMY 7 Bible Online

DEUTERONOMY 7 - Nguna Togoa Etafe North bible

DEUTERONOMY 7

¹Ragi waina Yehovah Sup̃e anigo ega wo piragi ko umai paki navanua waina p̃a vaki asa po peani a, go ega wo kopasi lua nalauna laapa pa dua ki naraem̃a, naworawora ni Heth, go naworawora ni Cirkash, go naworawora ni Amor, go naworawora ni Kanaan, go naworawora ni Peris, go naworawora ni Hivah, go naworawora ni Yebus, nalauna larua waina eu p̃arua go eu kasua liu ko;

²Go ragi waina Yehovah Sup̃e anigo ega wo pitua ki da naraem̃a go p̃a wo atugi ra; ragi wanogoe p̃a wo mari puoli ki da; p̃a ta mari te navasasokiana sikai paki da, go p̃a ta dodomi ra mau:

³Go p̃a ta dawiri ra mau; p̃a ta pitua ki natum̃a nagoroi ega laki paki natuna naanoai, go natuna nagoroi ega ta laki paki natum̃a naanoai.

⁴Nalakena ega wo doa natum̃a naanoai naga ega ta dausi au, naga euga magi sup̃e p̃ota maga suasua: dapala nogoe namaetoana ki Yehovah ega wo pavaga dip̃a ko go ega wo m̃araverave mari puoli ki‐go.

⁵Ma kuga mari ega tapala waia paki da; kuga rakai wede ni naviriana adeada maga, po p̃okap̃oraworae tea lawodu adeada maga, go kuga taekotokotovi Asherah adeada maga, po dap̃ara ki nasup̃e taeana adeada maga ki nakapu.

⁶Nalakena ku pei narei tapu sikai agi Yehovah Sup̃e anigo: Yehovah Sup̃e anigo e matadoa ko m̃elu dua ki narei maga mamau puti waina eu doko narae ni maramana, naga p̃a vei tea aneana, narei tautau sikai.

⁷Yehovah e da dodomi ko po matadoa ko nalakena ku laapa liu narei p̃ota maga; nalakena ku pei tea visa maau sa ni narei maga mamau puti:

⁸Ma nalakena Yehovah e dodomi mu, go nalakena ega vavaigoro navivisaana waina e pivisa asa paki tamamu maga, tea wanogoe e pei nalakena Yehovah e piragi lua mu ki nam̃elearu kasua, po daulua mu m̃elu dua ki nasum̃a ni naviti maga, m̃elu dua ki nam̃elearu ni Faraoh nawota ni Ityipt.

⁹Nalakena tea wanogoe p̃a atae naga Yehovah Sup̃e anigo, nae e pei Sup̃e; Sup̃e lomau waina e do magi tea maga waina eu dodomi a po dogo parati ki natip̃akiana aneana maga pa pa paki tagona manu sikai, midoaki parati ki navasasokiana go nadodomiana;

¹⁰Go e do pitua dip̃a paki naraeda tea maga waina eu pilosi a, naga ega mari puoli ki da: ega wo da mari daliali mau, ma ega wo pitua dip̃a paki naraena tea waina e pilosi a.

¹¹Nalakena tea wanogoe p̃a rogo parati ki natip̃akiana, go natawonakiana maga, go navasap̃otaeana maga, waina a dip̃aki‐go asa naaleatia waia, naga p̃a mari ra.

¹²Go ega wo pakilina, waina ku pe taki dorogo paki navasap̃otaeana maga waia, po pavaigoro ra po mari ra, naga Yehovah Sup̃e anigo ega manigo midoaki parati ki navasasokiana go nadodomiana waina e pivisa paki tamam̃a maga asa:

¹³Go ega wo dodomi ko po pasa p̃ia ki‐go, po mari ko p̃a wo laapa: go ega wo pasa m̃ata ki nawa ni nap̃elem̃a, go nawa ni natano anigo, go korn anigo, go waine anigo, go naroro anigo, go navavakaworaana ni katel anigo, go tea vusavusa maga ni navata anigo, navanua waina e pivisa paki tamam̃a maga naga ega tua ko asa.

¹⁴P̃a wo pei tea vasam̃atakiana ki narei maga mamau puti: te naanoai animu kite te nagoroi animu ega ta dim̃o mau, go katel animu.

¹⁵Go Yehovah ega wo dape lua sara nasasanaana kiam̃a; go ega wo da doropusi te nasasanaana sa ni Ityipt naga ega toko ako mau, waina nigo ku atae ra, ma ega wo doropusi ra euga toko tea maga mamau puti waina eu pilosi ko.

¹⁶Go p̃a wo mari puoli ki narei maga mamau puti waina Yehovah Sup̃e anigo ega tua ko ara; namatam̃a ega ta maritadodomi ra mau: go p̃a ta magi sup̃e adeada maga suasua mau; nalakena tea wanogoe e pe wo pei nasasa sikai pakigo.

¹⁷Ku pe noa nap̃op̃om̃a, Nalauna maga waia eu laapa liu au; kinau aga kopasi lua ra dapale sava?

¹⁸P̃a ta matau ki da mau: p̃a midoaki parati ki m̃ata ki tea waina Yehovah Sup̃e anigo e mari a paki Faraoh go paki Ityipt mamau;

¹⁹Namaridogoana warua maga waina namatam̃a ero punusi ra, go navaivaiana maga, go tea ni namagaana maga, go nam̃elearu kasua, go naru saikiana, waina Yehovah Sup̃e anigo e piragi lua ko asa: dapala nogoe Yehovah Sup̃e anigo ega wo mari a paki narei maga mamau puti waina ku matau ki da.

²⁰Go Yehovah Sup̃e anigo ega wo dip̃aki lida ega toko m̃aleoputo kakada, pa pa namagovai waina eu ko dum̃ada dasuru ki da doko, euga wo pei tea maripuolikiana pa dua ki naraem̃a.

²¹P̃a ta maga nalo kakada mau: nalakena Yehovah Sup̃e anigo e doko m̃aleoputo kakam̃a, Sup̃e warua go mataukiana.

²²Go Yehovah Sup̃e anigo ega wo kopasi lua nalauna maga wanogoe pa dua ki naraem̃a, tea kiki go tea kiki: p̃a ta mari puoli ki puti ra ragi sikai maau mau, mase nalo mila maga ni namalasi eu pe laapa paki‐go.

²³Ma Yehovah Sup̃e anigo ega wo pitua ki da paki naraem̃a, go ega wo atugi ra ki naatugiana warua pa pa euga wo mavunuvunu.

²⁴Go ega wo pitua ki nawota adeada maga paki nam̃elearum̃a, go p̃a wo mari nagisada ega wo pano puoli pa dua ki etano ni nakoroatelagi: te naata sikai ega wo da mariatae lawodu naraem̃a mau, pa pa p̃a wo mari puoli ki da.

²⁵Nasup̃e taeana ni sup̃e adeada maga, p̃a wo dap̃ara ki da ki nakapu: p̃a ta matam̃agura ki silver kite kold waina e doko ara, go p̃a ta dape a ega vei anigo, mase ku pe vei tea soliana asa: nalakena e pei namamaragokiana sikai paki Yehovah Sup̃e anigo:

²⁶Go p̃a ta piragi namamaragokiana sikai paki nasum̃a anigo mau, po pei naleo vasasakiana sikai dakiusi a: p̃a wo mamarago ki nia po dip̃a doa e, nalakena e pei naleo vasasakiana sikai.