Read Nguna Togoa Etafe North DEUTERONOMY 8 Bible Online

DEUTERONOMY 8 - Nguna Togoa Etafe North bible

DEUTERONOMY 8

¹Natip̃akiana maga mamau puti waina a dip̃akigo ara naaleatia waia, kuga vavaigoro ra po mari ra, naga kuga mauri po pavakawora, go kuga wo sili pano po peani navanua waina Yehovah e pivisa paki tamamu maga asa.

²Go p̃a midoaki parati ki napua mamau waina Yehovah Sup̃e anigo e marakigo pae asa natau rualima pati wanogoe masop̃alo, naga ega mari ko p̃a vakitano naga ega maridogo ko naga ega atae tea waina e doko nap̃op̃om̃a, mase ku pe vavaigoro natip̃akiana aneana maga, kite e pe tika.

³Go e mari ko ku pakitano, po suasua naga p̃a vitolo, go e pagani ko ki manna waina ku da atae a mau, go waina tam̃am̃a maga eu da atae a mau; naga ega mari ko p̃a wo atae naga naatam̃oli e da mauri pae bred e sikina mau, ma ega wo mauri pae sara navasaana waina e dave pae nawoka ni Yehovah umai.

⁴Sugoro anigo e da disu duai mau, go nam̃elem̃a e da pei woka mau, natau rualima pati wanogoe.

⁵Go p̃a midoakiusiusi nap̃op̃om̃a naga dapala waina naatam̃oli sikai e parati pisei ki natuna, dapala nogoe Yehovah Sup̃e anigo e parati pisei kigo.

⁶Go p̃a vavaigoro natip̃akiana maga ki Yehovah Sup̃e anigo, naga p̃a surata napua aneana maga, go naga p̃a matau ki nia.

⁷Nalakena Yehovah Sup̃e anigo e do piragi ko paki navanua wia, navanua ni nap̃ap̃a maga ni noai, go ni noai maga, go ni luku noai maga, waina eu do putaputa nap̃aloa maga go tava maga;

⁸Navanua ni whiit go barle, go ni vaine go nakau napuliva go pomekranet; navanua ni naroro ni nakau oliva, go ni honi;

⁹Navanua waina p̃a wo gani navinaga asa masale ki natikaana; p̃a wo da dika ki te navatuna asa mau; navanua waina vatu kakana maga eu pei airon, go p̃a wo kili lua brass m̃elu tava kakana maga.

¹⁰Go p̃a wo ganikani po puka, go p̃a wo pasa m̃ata ki Yehovah Sup̃e anigo nalakena navanua wia waina e po dua ko asa.

¹¹P̃a vavaigoro mase ku pe malio ki Yehovah Sup̃e anigo, po da dogo parati ki natip̃akiana aneana maga, go navasap̃otaeana aneana maga, go natawonakiana aneana maga, waina a dip̃aki‐go ara naaleatia waia:

¹²Go mase waina ku po ganikani sua po puka, go ku po davagi sua nasum̃a wia maga po doko ara doko;

¹³Go ragi waina navata ni katel anigo maga, go navata ni shiip anigo maga eu disu po laapa, go silver anigo go kold anigo eu disu po laapa, go sara naleo anigo eu disu po laapa;

¹⁴Ragi wanogoe nap̃op̃om̃a e pe vakilagi, go ku pe malio ki Yehovah Sup̃e anigo waina e piragi lua ko m̃elu dua ki navanua ni Ityipt umai, m̃elu dua ki nasum̃a ni naviti maga;

¹⁵Nae waina e marakigo duaduru masop̃alo warua go mataukiana, tokora waina m̃aata sa go mataloa eu doko asa, go natano garagara waina noai e dika asa; waina e manigo piragi lua noai m̃elu vatu kasua mau;

¹⁶Waina e pagani ko masop̃alo ki manna waina tamam̃a maga eu da pea atae a mau; naga ega mari ko p̃a vakitano, go naga ega maridogo ko, naga ega wia kigo naaleatia edaku anigo maga:

¹⁷Go ku pe noa nap̃op̃om̃a, Namarimatuaana aginau go nakasuaana ni nam̃elearugu ero maginau mari nasogolapaana waia.

¹⁸Ma p̃a midoaki parati ki Yehovah Sup̃e anigo nalakena nae e dua ko namarimatuaana naga p̃a veani nasogolapaana; naga ega lawosoki navasasokiana aneana waina e pivisa asa paki tamam̃a maga, dapala waina e doko naaleatia waia.

¹⁹Go ega wo pakilina, waina ku pe malio ki Yehovah Sup̃e anigo, po dausi sup̃e p̃ota maga, po madeada suasua, po lotu ki da, a noasokisoki dip̃a ko naaleatia waia naga p̃a wo mate puoli lomau.

²⁰Dapala nalauna maga waina Yehovah e mari puoli ki da naraem̃a, dapala nogoe kuga wo mate puoli; nalakena ku da dogo parati ki nadaleo ni Yehovah Sup̃e animu mau.