Read Nguna Togoa Etafe North DEUTERONOMY 9 Bible Online

DEUTERONOMY 9 - Nguna Togoa Etafe North bible

DEUTERONOMY 9

¹P̃a rogo, Israel O: naaleatia waia p̃a wo duagoto Yordan po sili po peani nalauna maga waina eu p̃arua go eu kasua liu ko, natokoana warua maga waina eu pei p̃aaka vakilagi mau,

²Narei warua go varau, Anakim natuna maga, waina ku atae ra, go waina ku dogo e, e pei tea noaana nalo kakada, Sei e mariatae lawodu narae ni Anak natuna maga?

³Nalakena tea wanogoe, naaleatia waia p̃a atae naga Yehovah Sup̃e anigo e pei nae waina e duagoto pea ki‐go dapala nakapu kanikani; nae ega wo mari sa ki da, go ega wo mari ra euga vakitano naraem̃a: dapala nogoe p̃a wo kopasi lua ra, po mari puoli ki da m̃araverave, dapala waina Yehovah e noa ki‐go asa.

⁴Edaku ki naga Yehovah Sup̃e anigo ega wo dielua ra pa dua ki naraem̃a, p̃a ta noa nap̃op̃om̃a, Nalakena namarinaleoleanaana aginau, Yehovah e piragi au umai naga aga veani navanua waia: ma e pei nasigisigileoana ki nalauna maga waia waina e pei nalakena Yehovah e kopasi lua ra pa dua ki naraem̃a.

⁵E da pei nalakena namarinaleoleanaana anigo mau, go naleanaana ni nap̃op̃om̃a, naga p̃a wo sili pano po peani navanua adeada: ma nalakena nasigisigileoana ki nalauna maga waia Yehovah Sup̃e anigo e do kopasi lua ra pa dua ki naraem̃a, go naga ega lawosoki navasaana waina Yehovah e pivisa asa paki tamam̃a maga, paki Abraham, go paki Isaak, go paki Yakob.

⁶Nalakena tea wanogoe p̃a atae naga namarinaleoleanaana anigo e da pei nalakena Yehovah Sup̃e anigo e dua ko navanua wia waia mau naga p̃a wo peani a; nalakena ku pei narei ni noa kasua.

⁷P̃a midoaki parati ki, p̃a ta malio ki nia mau, takana waina ku mari p̃auluulu paki Yehovah Sup̃e anigo masop̃alo naga e maeto: pae naaleatia waina ku dave m̃elu dua ki navanua ni Ityipt pano, pa pa ku po umai paki tokora waia, ku mari p̃auluulu dip̃a Yehovah.

⁸Go doko Horeb ku mari p̃auluulu paki Yehovah naga e maritausu, go Yehovah e maeto ki mu naga ega mari puoli ki mu.

⁹Ragi waina a sake paki tava pano naga aga tape vatu welewelea maga, vatu welewelea ni navasasokiana waina Yehovah e manimu mari a, ragi wanogoe a doko tava doko naaleatia rualima pati go nap̃ogiana rualima pati; a da gani navinaga mau, go a da munu noai mau.

¹⁰Go Yehovah e dua au vatu welewelea dua, nakini ni Sup̃e e midiri ra; go navasaana maga mamau puti eu pei tea midiriana doko ara waina Yehovah e noa ki‐go ara tava m̃elu m̃aleoputo ni nakapu vavaga naaleatia ni nasaisaiana.

¹¹Go e pakilina, ragi waina naaleatia rualima pati go nap̃ogiana rualima pati eu nopu, naga Yehovah e dua au vatu welewelea dua wanogoe, vatu welewelea ni navasasokiana.

¹²Go Yehovah e noa ki nau, e naga, P̃a tuleana, p̃a vano, p̃a siwo m̃araverave; nalakena narei anigo waina ku piragi ra m̃elu dua ki Ityipt umai eu dum̃ada mari sa ki da; eu m̃araverave dawasi m̃elu dua ki napua waina a dip̃aki da asa; eu dum̃ada madeada mari nasup̃e takiana sikai.

¹³Go Yehovah e moro noa ki nau, e naga, A po punusi narei waia go p̃a leo, eu pei narei ni noa kasua:

¹⁴P̃a toro au naga aga mari puoli ki da, po kasi lua nagisada m̃elu dua ki etano ni nakoroatelagi: go aga wo mari ko p̃a wo pei nalauna kasua go warua liu ra.

¹⁵Go a dum̃agu doa au po siwo pae tava umai, go tava wanogoe e soro ki nakapu: go vatu welewelea dua ni navasasokiana ero doko nam̃elearugu dua.

¹⁶Go a leo punusi, go kuga leo, ku po mari naleo sa dip̃a Yehovah Sup̃e animu; ku po dum̃amu manimu mari kau natuna takiana sikai: ku po dawasi m̃araverave m̃elu dua ki napua waina Yehovah e dip̃aki mu asa.

¹⁷Go a dape soki vatu welewelea dua wanogoe po nadi ki da m̃elu dua ki nam̃elearugu dua, po marip̃oraworae ra naraemu.

¹⁸Go a dowo pakitano narae ni Yehovah dapala sala vea naaleatia rualima pati go nap̃ogiana rualima pati; a da gani navinaga mau, go a da munu noai mau; nalakena namarinaleosaana animu waina ku mari a, doko po mari tea waina e sa narae ni Yehovah, po mari a e maeto.

¹⁹Nalakena a matau ki namaetoana go namaritausuana waina Yehovah e maeto ki mu asa naga ega mari puoli ki mu. Go Yehovah e moro daki dorogo paki nau.

²⁰Go Yehovah e maeto p̃arua ki Aaron naga ega mari puoli ki nia: go ragi sikai maau wanogoe a magi Aaron ma dapasavasa.

²¹Go a dape namarinaleosaana animu, kau natuna anoai waina ku mari a, po dap̃ara ki nia ki nakapu, po duki p̃orae a, po marip̃oroworosi a pa pa e pei nam̃otam̃ota: go a sapura ki nam̃otam̃ota kakana paki nap̃ap̃a noai waina e sara siwo m̃elu tava.

²²Go ku mari p̃auluulu dip̃a Yehovah naga ega maeto, doko Taberah, go doko Massah, go doko Kibroth hattaavah.

²³Go ragi waina Yehovah e dip̃aki mu pae Kadesh‐barnea pano, po naga, Kuga sake pano po peani navanua waina a po dua mu asa; ragi wanogoe ku mari p̃auluulu dip̃a natip̃akiana ki Yehovah Sup̃e animu, go ku da saralomau asa mau, go ku da daki dorogo nadaleona mau.

²⁴Pae naaleatia waina a pea atae mu, ku mari p̃auluulu dip̃a Yehovah.

²⁵Nalakena tea wanogoe a dowo pakitano narae ni Yehovah naaleatia rualima pati go nap̃ogiana rualima pati, waina a dowo pakitano; nalakena Yehovah e naga ega wo mari puoli ki mu.

²⁶Go a pavara ni Yehovah, po naga, Yehovah Sup̃e O, p̃a ta mari puoli ki narei anigo mau, go naveanipiolikiana anigo, waina ku po daulua ra ki nawaruaana anigo, go waina ku po piragi lua ra m̃elu dua ki Ityipt umai ki nam̃elearu kasua.

²⁷P̃a midoaki parati ki tea suasua anigo maga, Abraham, go Isaak, go Yakob; p̃a ta leo punusi nap̃op̃okasuaana ki narei waia mau, go nasigisigileoana adeada, go namarinaleosaana adeada:

²⁸Mase navanua waina ku piragi lua gami m̃elu asa e pe naga, Yehovah e po piragi lua ra naga ega maripunue ra masop̃alo, nalakena e marisa piragi ra umai paki navanua waina e sai a paki da, go nalakena e pilosi ra.

²⁹Ma eu pei narei anigo go naveanipiolikiana anigo, waina ku piragi lua ra ki namarimatuaana anigo, go ki narum̃a saikiana.