Read Nguna Togoa Etafe North YOANE 1 Bible Online

YOANE 1 - Nguna Togoa Etafe North bible

YOANE 1

¹Ragi ni naatulakeana Navasaana e doko, go Navasaana e sikoti Sup̃e doko, go Navasaana e pei Sup̃e.

²Nae e doko ragi ni naatulakeana sikoti Sup̃e doko.

³Naleo maga mamau puti eu pei tea mariana pae asa; go masale ki nia te navatuna sikai e da pei tea mariana mau waina e pei tea mariana.

⁴Namauriana e doko asa; go namauriana wanogoe e pei namarama ki naatam̃oli maga.

⁵Go namarama wanogoe e maramalaga namaligo, go namaligo e da midoaki atae a mau.

⁶Naatam̃oli sikai e pakilina, e pei tea tip̃akiluaana m̃elu Sup̃e umai, nagisana Yoane.

⁷Nae e umai raki nanoasokisokiana, naga ega noasokisoki nalo ni namarama wanogoe, naga tea maga mamau puti euga saralomau pae asa.

⁸Nae e da pei namarama wanogoe mau, ma e umai naga ega noa sokisoki nalo ni namarama wanogoe.

⁹Namarama lomau, waina e maramalagati sara naatam̃oli, e umai paki maramana.

¹⁰E doko maramana, go maramana e pei tea mariana pae asa, go maramana e da atae a mau.

¹¹E umai paki kiana, go tea aneana maga eu da piragi a mau.

¹²Ma tea maga waina eu piragi a e dua ra nakasuaana naga euga vei Sup̃e natuna maga, e dua tea maga asa waina eu saralomau nagisana;

¹³waina eu da pakilina m̃elu nada mau, go eu da pakilina m̃elu namasauana ni nap̃okasi mau, go eu da pakilina m̃elu namasauana ki naatam̃oli mau, ma eu pakilina m̃elu Sup̃e.

¹⁴Go Navasaana e pei tea mariana e pei nap̃okasi, go e doko m̃aleoputo kakagami (go au leo punusi nasamasamaana aneana, nasamasamaana dapala tea ni Natuna sikedau waina e m̃elu Tamana umai), e pura ki nasaup̃iaana go nalomauana.

¹⁵Yoane e do noa sokisoki nalo kakana, po do pioso, e naga, Tea waia e pei tea waina a noa e, a naga, Tea waina e edaku goro au umai e pei tea mariana e pea ki nau: nalakena e doko pea ki nau.

¹⁶Nalakena navuraana aneana kinami mamau puti au dape te seara kakana, go nasaup̃iaana oli nasaup̃iaana.

¹⁷Nalakena nawotaeana e pei tea vituakiana pae Moses; nasaup̃iaana go nalomauana ero umai pae Yesu Kristo.

¹⁸Te naata sikai e ko da punusi Sup̃e te ragi mau; Natuna sikedau, waina e doko narum̃a ni Tamana, nae e noa pakasa ki nia.

¹⁹Go tea waia e pei nanoasokisokiana ki Yoane, ragi waina navarapule maga ni Yudea eu dip̃aki lua tea viri seara go tea ni nawora ni Levi seara eu pae Yerusalem umai punusi a naga euga vusuusu paki nia, po naga, Nigo ku pei sei?

²⁰Go e noa sai, po da pasa goro mau; go e noa sai, naga Kinau a da pei Kristo mau.

²¹Go eu pusuusu paki nia, eu naga; Go ku pei nasava? Ku pei Eliyah kite? Go e naga, A da pei Eliyah mau. Nigo ku pei profeta waina kite? Go e pasa dara, e naga, Ee.

²²Nalakena tea wanogoe eu noa ki nia, eu naga, Ku pei sei? Naga auga vitua ki navasadaraana paki tea maga waina eu dip̃aki lua gami umai. Ku noa nasava nalo kakam̃a?

²³E naga, Kinau a pei nadaleo ni tea waina e do pioso masop̃alo, po naga, Kuga mari napua ki Yehovah ega leana, dakiusi waina profeta Isaiah e noa e.

²⁴Go eu pei tea tip̃akiluaana m̃elu Farisi maga umai.

²⁵Go eu pusuusu paki nia, po noa ki nia, eu naga, Ku pe ta pei Kristo mau, go ku pe ta pei Eliyah mau, go ku pe ta pei profeta waina mau, ma ekasana ku do bapetiso?

²⁶Yoane e pasa dara ra, po naga, Kinau a do bapetiso ki noai: sikai e lawodu m̃aleoputo kakamu waina nimu ku da atae a mau,

²⁷tea waina e edaku goro au umai, waina kinau a da p̃ia mau naga aga veresi natali ni nam̃elevasiana aneana.

²⁸Tea maga wanogoe eu pei tea mariana Bethania, taleva kerua ni Yordan tokora waina Yoane e do bapetiso asa.

²⁹Matamai ki nia e punusi Yesu e umai punusi a, go e naga, Kuga leo, Shiip Natuna ki Sup̃e, waina e dape lua namarinaleosaana ni maramana!

³⁰Tea waia e pei tea waina kinau a noa nalo kakana, a naga, Naatam̃oli sikai e edaku goro au umai waina e pei tea mariana e pea ki nau: nalakena e doko pea ki nau.

³¹Go kinau a da atae a mau; ma naga ega vei tea mariana ega toko lina ki Israel, nalakena tea wanogoe kinau a umai a do bapetiso ki noai.

³²Go Yoane e noa sokisoki, po naga, A po leo punusi Naatana e siwo dapala tokopea sikai pae nakoroatelagi umai; go e doko asa doko.

³³Go kinau a da atae a mau: ma tea waina e dip̃aki lua au naga aga bapetiso ki noai, nae e noa ki nau, e naga, Naata waina p̃a wo punusi Naatana e siwo umai paki asa, po doko asa doko, nae e pei tea waina e do bapetiso ki Naatana Tapu.

³⁴Go kinau a po punusi, go a po noa sokisoki naga nae e pei Sup̃e Natuna.

³⁵Matamai ki nia Yoane e moro lawodu, go tea vasasapiseikiana aneana maga tea rua kakada;

³⁶go e leo soki Yesu waina e surata, go e naga, Koroga leo, Shiip Natuna ki Sup̃e.

³⁷Go tea vasapiseikiana dua wanogoe ero dogoe e pasa, go ero dausi Yesu.

³⁸Go Yesu e dum̃ana doa e po punusi ra ero dausi a, go e noa ki da, e naga, Koro laaga nasava? Go ero noa ki nia, ero naga Rabbi (waina e pei tea noaana, ragi waina e pei tea vasadoaana, e pei Tea Vasapiseiki). Ku doko esava?

³⁹E noa ki da, e naga, Koroga umai, go koroga wo punusi. Nalakena tea wanogoe ero umai po punusi tokora waina e doko asa; go ero doko sikoti a naaleatia wanogoe: e alagoro pei aura kerualima.

⁴⁰Tea rua wanogoe waina ero dogo Yoane e pasa, po dausi Yesu, sikai kakada e pei Anderea, Simon Petero taina.

⁴¹Nae e pea pap̃ai aneana taina Simon, po noa ki nia, e naga, Au po pap̃ai Messiah (waina e pei tea vasadoaana e pei Kristo).

⁴²E piragi a umai punusi Yesu. Yesu e leo soki a, po naga, Nigo ku pei Simon natu ni Yoane: nigo p̃a wo pei tea sosoana ki Kefa (waina e pei tea vasadoaana e pei Petero.)

⁴³Matamai ki nia e midoaki nia naga ega vaki Calilea pano, go e pap̃ai Filipo: go Yesu e noa ki nia, e naga, P̃a rausi au.

⁴⁴Go Filipo e pei tea ni Bethsaida, natokoana ki Anderea go Petero.

⁴⁵Filipo e pap̃ai Nathanael, po noa ki nia, e naga, Au po pap̃ai tea waina Moses e midiri a nawotaeana, go waina profeta maga eu midiri a, Yesu ni Nasareth, natu ni Yosef.

⁴⁶Go Nathanael e noa ki nia, e naga, Te navatuna wia e mari atae pei tea ni Nasareth kite? Filipo e noa ki nia, e naga, P̃a umai, po punusi.

⁴⁷Yesu e punusi Nathanael e umai punusi a, go e noa nalo kakana, e naga, Kuga leo, nawora ni Israel lomau, waina te nasorosoroana e da doko asa mau!

⁴⁸Nathanael e noa ki nia, e naga, Ku atae au pae esava? Yesu e pasa dara po noa ki nia, e naga, Ragi waina Filipo e ko da soso ko mau, go ku doko etano ki napuliva, a punusi ko.

⁴⁹Nathanael e pasa dara e, e naga, Rabbi, Nigo ku pei Sup̃e Natuna; nigo ku pei Nawota ki Israel.

⁵⁰Yesu e pasa dara po noa ki nia, e naga, Nalakena a noa ki‐go, naga A punusi ko etano ki napuliva, ku saralomau kite? P̃a wo punusi tea maga waina eu p̃arua liu tea maga wanogoe.

⁵¹Go e noa ki nia, e naga, Lomau, lomau, a noa ki mu, naga Kuga wo punusi nakoroatelagi ega wo pamawota, go agelo maga ki Sup̃e euga wo do sake go euga wo do siwo pae naatam̃oli Natuna.